नवी दिल्लीत केंद्रीय मंत्री नितीन गडकरी यांची भेट; बदलापूरच्या विकासासाठी महत्त्वाच्या मागण्या मांडल्या

नवी दिल्ली, प्रतिनिधी : बदलापूर शहर आणि परिसराच्या विकासासाठी आज नवी दिल्ली येथे भारत सरकारचे केंद्रीय रस्ते वाहतूक व महामार्ग मंत्री नितीन गडकरी यांची भेट घेण्यात आली. या बैठकीत बदलापूरच्या पायाभूत सुविधा, वाहतूक व्यवस्था आणि औद्योगिक विकासासंदर्भातील अनेक महत्त्वाच्या विषयांवर सविस्तर चर्चा करण्यात आली.

या भेटीत बदलापूर शहरालगत जाणाऱ्या मुंबई–वडोदरा राष्ट्रीय द्रुतगती मार्गावर एरंजाड येथे एंट्री आणि एक्झिट मार्ग उपलब्ध करून देण्याची मागणी करण्यात आली. ही सुविधा उपलब्ध झाल्यास बदलापूर, अंबरनाथ आणि परिसरातील नागरिकांना द्रुतगती मार्गाचा थेट लाभ मिळणार असून प्रवास अधिक सोयीस्कर होणार आहे.

तसेच सापे ते बदलापूर गाव दरम्यान उल्हास नदीवर दोन पदरी समांतर पूल उभारण्याचा प्रस्ताव मांडण्यात आला. बदलापूर शहरात वाढत्या वाहतुकीमुळे निर्माण होणारी कोंडी कमी करण्यासाठी हा पूल अत्यंत उपयुक्त ठरणार असल्याचे यावेळी सांगण्यात आले. या पुलामुळे शहरातील अंतर्गत वाहतूक अधिक सुरळीत होण्यास मदत होईल.

याशिवाय, बदलापूर आणि परिसराच्या औद्योगिक तसेच आर्थिक विकासाला गती देण्यासाठी लॉजिस्टिक पार्क उभारण्याची मागणी देखील करण्यात आली. लॉजिस्टिक पार्कमुळे स्थानिक युवकांना रोजगाराच्या संधी उपलब्ध होतील, तसेच व्यापार आणि उद्योग क्षेत्रालाही चालना मिळेल.

केंद्रीय मंत्री नितीन गडकरी यांनी सर्व मागण्या सकारात्मकपणे ऐकून घेत संबंधित अधिकाऱ्यांना आवश्यक त्या सूचना दिल्या. तसेच योग्य त्या मागण्या मान्य करण्याबाबत सकारात्मक आश्वासन दिल्याचे सांगण्यात आले.

या भेटीवेळी शिवसेना शहर प्रमुख, माजी नगराध्यक्ष कुळगाव - बदलापूर नगरपरिषद वामन म्हात्रे, अंबरनाथ विधानसभेचे आमदार बालाजी किणीकर, शिवसेना उपजिल्हा प्रमुख संजय जाधव, गटनेते श्रीधर पाटील, नगरसेवक अरुण सुरवळ, समाजसेवक पंकज मेहेर, किशोर मेहेर आणि वरुण म्हात्रे उपस्थित होते.

बदलापूर शहराच्या विकासासाठी ही बैठक महत्त्वाची मानली जात असून आगामी काळात या प्रकल्पांना मंजुरी मिळाल्यास शहराच्या विकासाला मोठी चालना मिळणार आहे.