नाशिकमध्ये महिलांच्या सुरक्षेसाठी जनआक्रोश रॅली; छत्रपती शिवाजी महाराजांच्या पुतळ्याला निवेदन

नाशिक ब्यूरो

नाशिक : शहरातील एका बहुराष्ट्रीय कंपनीशी संबंधित प्रकरणाच्या पार्श्वभूमीवर महिलांच्या सुरक्षेच्या मुद्द्यावर नाशिकमध्ये सकल हिंदू समाज आणि भाजप महिला आघाडीच्या वतीने जनआक्रोश रॅलीचे आयोजन करण्यात आले.

ही रॅली संबंधित कंपनीच्या कार्यालयाजवळून सुरू होऊन शहरातील प्रमुख मार्गांवरून काढण्यात आली. कडाक्याच्या उन्हातही मोठ्या संख्येने महिलांनी दुचाकी, ई-रिक्षा आणि अन्य वाहनांच्या माध्यमातून सहभाग घेत विविध घोषणांद्वारे निषेध नोंदविला. या रॅलीत तरुण-तरुणींसह विविध वयोगटातील महिलांचा सहभाग लक्षणीय होता. काही तृतीयपंथीय प्रतिनिधींनीही या आंदोलनात सहभाग नोंदविला.

रॅलीदरम्यान महिलांनी भगव्या रंगाची वस्त्रे परिधान करून हातात निषेध फलक घेतले होते. महिलांविरुद्ध घडणाऱ्या घटनांविरोधात तीव्र संताप व्यक्त करत सुरक्षिततेसाठी ठोस उपाययोजनांची मागणी करण्यात आली.

या रॅलीचे नेतृत्व भाजपच्या नाशिक मध्य मतदारसंघाच्या आमदार देवयानी फरांदे यांनी केले. रॅलीचा समारोप जिल्हाधिकारी कार्यालयाजवळ करण्यात आला. विशेष म्हणजे, पारंपरिक पद्धतीने प्रशासनाला निवेदन देण्याऐवजी छत्रपती शिवाजी महाराजांच्या अश्वारूढ पुतळ्याला निवेदन अर्पण करण्यात आले.

यावेळी उपस्थित महिलांनी छत्रपती शिवाजी महाराज आणि छत्रपती संभाजी महाराज यांच्या आदर्शांचा उल्लेख करत महिलांच्या संरक्षणासाठी सक्षम व्यवस्था उभारण्याची गरज व्यक्त केली.

समारोप प्रसंगी विविध वक्त्यांनी महिलांविरुद्ध घडणाऱ्या घटनांबाबत चिंता व्यक्त करत तरुणींनी अधिक सतर्क राहण्याचे, स्वसंरक्षणाचे प्रशिक्षण घेण्याचे आणि सामाजिक जागरूकता वाढविण्याचे आवाहन केले.

आमदार देवयानी फरांदे यांनी संबंधित प्रकरणाची सखोल चौकशी करून दोषींवर कठोर कारवाई करण्याची मागणी केली. तसेच आवश्यक असल्यास कठोर कायदेशीर उपाययोजना राबविण्याबाबतही त्यांनी भूमिका मांडली.