कोल्हापूरात महात्मा फुले जयंती उत्साहात; सामाजिक न्याय विभागाकडून अभिवादन, विद्यार्थ्यांची रॅली

कोल्हापूर | दि. ११ (जिमाका) :

क्रांतिसूर्य महात्मा ज्योतिराव फुले यांच्या द्विशताब्दी जयंतीनिमित्त कोल्हापूरात विविध कार्यक्रमांचे आयोजन करून त्यांना अभिवादन करण्यात आले.

सामाजिक न्याय विभागातर्फे बिंदू चौक येथे महात्मा ज्योतिराव फुले यांच्या पुतळ्याला पुष्पहार अर्पण करून मान्यवरांच्या उपस्थितीत अभिवादन करण्यात आले. यावेळी स्व. बी. जी. खराडे महाविद्यालयाच्या वतीने पालखीमधून विविध ग्रंथ ठेवत मुलींची भव्य रॅली काढण्यात आली. ही रॅली महात्मा फुले पुतळा ते राजर्षी शाहू महाराज समाधी स्थळापर्यंत पार पडली.

या प्रसंगी समाज कल्याण विभागाचे अधिकारी संभाजी पवार, सचिन पाटील तसेच सामाजिक कार्यकर्ते गणी आजरेकर, आलोक जत्राटकर, विजय देवणे, डी. जी. भास्कर आणि अन्य मान्यवर उपस्थित होते.

दरम्यान, इतर मागास बहुजन कल्याण विभाग, कोल्हापूर यांच्या वतीने कंदलगाव येथील मुलांच्या शासकीय वसतिगृहात जिल्हास्तरीय कार्यक्रम उत्साहात पार पडला. यावेळी महात्मा ज्योतिराव फुले यांच्या प्रतिमेस पुष्पहार अर्पण करून अभिवादन करण्यात आले.

कार्यक्रमाच्या प्रमुख डॉ. मंजुश्री पवार यांनी महात्मा फुले यांच्या सामाजिक व शैक्षणिक कार्याचा आढावा घेत विद्यार्थ्यांना शिक्षणाचे महत्त्व, स्त्री-पुरुष समानता आणि सामाजिक जबाबदारी याबाबत मार्गदर्शन केले.

या कार्यक्रमास सहायक संचालक सुनिता नेर्लीकर, अधिकारी अमित घवले तसेच विभागातील कर्मचारी, सामाजिक कार्यकर्ते आणि विद्यार्थी मोठ्या संख्येने उपस्थित होते. विद्यार्थ्यांनीही यावेळी आपली मनोगते व्यक्त केली.