बोर्लीपंचतनची वाहतूक कोंडी सुटणार? पोलीस-व्यापारी समन्वयातून उपाययोजना सुरू

बोर्लीपंचतन : प्रतिनिधी उदय वि कळस

श्रीवर्धन तालुक्यातील बोर्लीपंचतन शहरातील मुख्य रस्त्यावर दिवसेंदिवस वाढत चाललेल्या वाहतूक कोंडीच्या समस्येवर अखेर तोडगा निघण्याची चिन्हे दिसू लागली आहेत. स्थानिक नागरिक, पर्यटक आणि वाहनचालकांना होणाऱ्या त्रासाच्या पार्श्वभूमीवर पोलीस प्रशासन आणि व्यापाऱ्यांनी एकत्र येत उपाययोजना सुरू केल्या आहेत.

दिघी सागरी पोलीस ठाण्याचे सहाय्यक पोलीस निरीक्षक संतोष आवटी यांच्या पुढाकाराने बोर्लीपंचतनमधील सर्व व्यापाऱ्यांची बैठक घेण्यात आली. या बैठकीत मालवाहतूक ट्रक कोणत्याही वेळेत रस्त्यावर उभे केल्यामुळे होणारी वाहतूक कोंडी हा मुख्य मुद्दा समोर आला.

बोर्लीपंचतन हा दिवेआगर, दिघी आणि श्रीवर्धनकडे जाणारा मुख्य मार्ग असल्याने येथे नेहमीच वाहनांची वर्दळ असते. पर्यटन हंगामात तर पर्यटकांची संख्या मोठ्या प्रमाणात वाढते. त्यातच रस्त्याची अरुंद रुंदी, बेकायदा पार्किंग, आणि बाजारपेठेतील गर्दी यामुळे वाहतूक कोंडी अधिकच वाढते.

याशिवाय, बस स्थानक ते प्रवेशद्वार पुलापर्यंत रुंदीकरण करून सिमेंट काँक्रीट रस्ता तयार करण्यात आला असला तरी त्याचा वापर काही ठिकाणी पार्किंग आणि टपऱ्यांमुळे अडथळा निर्माण करणारा ठरत आहे.

या समस्येबाबत श्रीवर्धन तालुका पत्रकार संघानेही पोलीस प्रशासनाचे लक्ष वेधले असून सकारात्मक चर्चा झाली आहे. त्यामुळे आता पोलीस प्रशासनाने कायमस्वरूपी उपाययोजना करण्यासाठी नियोजन सुरू केले आहे.

🚧 पोलिसांनी सुचवलेले उपाय

• मालवाहतूक वाहनांनी दुपारच्या वेळेतच माल उतरवावा
• एकाच वेळी अनेक ट्रक रस्त्यावर पार्किंग करू नयेत
• वीकेंडच्या दिवशी (पर्यटन गर्दीच्या काळात) मालवाहतूक टाळावी

पोलीस आणि व्यापाऱ्यांमधील समन्वयातून या उपाययोजना प्रभावीपणे राबवल्यास बोर्लीपंचतनमधील वाहतूक कोंडी मोठ्या प्रमाणात कमी होण्याची शक्यता आहे. त्यामुळे नागरिक, पर्यटक आणि वाहनचालकांना मोठा दिलासा मिळणार आहे.