मुंबईच्या दळणवळणाला गतिमानतेचा ‘बूस्टर’; २०२७ मध्ये मेट्रोसारख्या २३८ लोकल ट्रेन मुंबईकरांच्या सेवेत – मुख्यमंत्री देवेंद्र फडणवीस

प्रतिनिधी :  नरेश शिंदे 

मुंबई, दि. १३ ऑगस्ट २०२६ : मुंबई महानगराच्या दळणवळण व्यवस्थेला आणखी गती देणाऱ्या विविध पायाभूत सुविधांचे लोकार्पण आणि महत्त्वपूर्ण प्रकल्पांचा शुभारंभ गुरुवारी करण्यात आला. मुंबईकरांच्या सेवेत २०२७ मध्ये मेट्रोसारख्या २३८ उपनगरीय लोकल ट्रेन दाखल होतील, अशी महत्त्वपूर्ण घोषणा मुख्यमंत्री देवेंद्र फडणवीस यांनी केली.

सह्याद्री अतिथी गृह येथे दूरदृश्य प्रणालीद्वारे मुंबई महानगर प्रदेश विकास प्राधिकरणाच्या विविध पायाभूत सुविधांचे ई-लोकार्पण करण्यात आले. यामध्ये भारत नगर रोड (मुंबई विद्यापीठ परिसर) ते वाकोला जंक्शन या सांताक्रूझ-चेंबूर जोडमार्ग टप्पा २ मधील उन्नत मार्गिकेचे लोकार्पण, चेंबूर मेट्रो स्थानकाचे लोकार्पण, ठाणे-बोरिवली दुहेरी भुयारी मार्गातील ठाणे बाजूकडील ‘टीबीएम अर्जुना’चा शुभारंभ तसेच वांद्रे-कुर्ला संकुलाच्या जी ब्लॉकला पूर्व द्रुतगती मार्गाशी जोडणाऱ्या उड्डाणपुलाला माजी मुख्यमंत्री बॅरिस्टर बाबासाहेब अनंतराव भोसले यांचे नाव देण्याचा कार्यक्रम पार पडला.

कार्यक्रमाला उपमुख्यमंत्री सुनेत्रा अजित पवार, कौशल्य विकास मंत्री मंगल प्रभात लोढा, सांस्कृतिक कार्यमंत्री ॲड. आशिष शेलार, नगर विकास राज्यमंत्री माधुरी मिसाळ, मुख्य सचिव राजेश अग्रवाल तसेच आमदार प्रवीण दरेकर, राजहंस सिंह आणि अबू आजमी यांच्यासह एमएमआरडीएचे वरिष्ठ अधिकारी उपस्थित होते.

२०२७ मध्ये मेट्रोसारख्या २३८ लोकल ट्रेन

मुख्यमंत्री देवेंद्र फडणवीस यांनी सांगितले की, मुंबई महानगरात सध्या एकीकडे स्वच्छ, सुंदर आणि वातानुकूलित मेट्रोचा प्रवास उपलब्ध होत आहे, तर दुसरीकडे लोकल रेल्वेचा प्रवास मोठ्या प्रमाणावर कष्टप्रद आहे. ही तफावत दूर करण्यासाठी आधुनिक लोकल ट्रेनची निर्मिती करण्यात येणार आहे.

२०२७ मध्ये मेट्रोसारख्या २३८ उपनगरीय लोकल ट्रेन मुंबईकरांच्या सेवेत येतील आणि मार्च २०३० पर्यंत संपूर्ण लोकल ट्रेन मेट्रोसारख्या करण्याचे नियोजन असल्याचे मुख्यमंत्री फडणवीस यांनी सांगितले.

या आधुनिक लोकल ट्रेनमध्ये स्वयंचलित दरवाजे, वातानुकूलित व्यवस्था आणि स्वच्छतेसह मेट्रोसदृश सुविधा उपलब्ध असतील.

सांताक्रूझ-चेंबूर जोडमार्गामुळे बीकेसी-पश्चिम द्रुतगती मार्ग थेट जोडला

भारत नगर रोड ते वाकोला जंक्शन या १.४० किलोमीटर लांबीच्या उन्नत मार्गिकेचे लोकार्पण करण्यात आले. सांताक्रूझ-चेंबूर जोडमार्ग टप्पा २ मधील हा अत्यंत महत्त्वाचा अंतिम दुवा आहे.

या मार्गामुळे वांद्रे-कुर्ला संकुल आणि पश्चिम द्रुतगती महामार्गादरम्यान थेट व अखंड संपर्क निर्माण होणार आहे. कलिना, वाकोला आणि कलानगर परिसरातील वाहतूक कोंडी कमी होण्यास मदत होणार असून प्रवासाच्या वेळेत सुमारे ३५ मिनिटांची बचत होण्याची अपेक्षा आहे.

मुख्यमंत्री फडणवीस यांनी या जोडमार्गांच्या उतरणीच्या ठिकाणी होणाऱ्या वाहतूक कोंडीवरही उपाययोजना करण्याच्या सूचना दिल्या. पश्चिम द्रुतगती मार्गावरील वाहतूक कोंडी सोडविण्यासाठी परिस्थितीनुसार अंडरपास किंवा अन्य उपाययोजना करण्याचे निर्देशही त्यांनी दिले.

चेंबूर मेट्रो स्थानकामुळे बहुविध वाहतूक जोडणी

मेट्रो मार्ग २ब (डी.एन. नगर ते मंडाले) च्या टप्पा १अ मधील चेंबूर मेट्रो स्थानकाचे लोकार्पण करण्यात आले. चेंबूर उपनगरीय रेल्वे स्थानक आणि मोनोरेल स्थानकाशी जोडणी असल्याने हे स्थानक भविष्यातील महत्त्वाचे बहुविध वाहतूक केंद्र ठरणार आहे.

चेंबूर मेट्रो स्थानक पूर्व द्रुतगती महामार्ग, सायन-पनवेल महामार्ग, ईस्टर्न फ्रीवे आणि सांताक्रूझ-चेंबूर जोडमार्गाच्या जवळ आहे. स्थानकावरील प्लॅटफॉर्मची लांबी १८५ मीटर असून आठ डब्यांच्या मेट्रो गाड्यांसाठी ते अनुकूल आहे.

स्थानकात लिफ्ट, सरकते जिने, सीसीटीव्ही, दिव्यांगांसाठी सुविधा आणि प्रथमोपचार कक्ष उपलब्ध आहेत. तसेच स्थानकाची रचना ‘ग्रीन बिल्डिंग’ संकल्पनेनुसार करण्यात आली आहे.

मुख्यमंत्र्यांनी सांगितले की, मुंबई महानगरात मेट्रो मार्गिकांचे काम वेगाने सुरू असून यावर्षी ६० ते ७० किलोमीटर मेट्रो मार्ग सेवेत येण्याची अपेक्षा आहे. मुंबईत उपनगरीय लोकलमधून सुमारे ९० लाख प्रवासी प्रवास करतात, तर मेट्रोच्या माध्यमातून जवळपास ७० लाख प्रवाशांची क्षमता विकसित केली जात असल्याचे त्यांनी नमूद केले.

ठाणे-बोरिवली दुहेरी भुयारी मार्गातील ‘टीबीएम अर्जुना’चा शुभारंभ

ठाणे ते बोरिवली या दुहेरी भुयारी मार्गाच्या महत्त्वाकांक्षी प्रकल्पातील ‘टीबीएम अर्जुना’चे ठाणे बाजूकडून काम सुरू करण्यात आले. या प्रकल्पामुळे देशातील सर्वात लांब जमिनीखालील दुहेरी भुयारी मार्गांपैकी एक मार्ग तयार होणार आहे.

ठाणे ते बोरिवली हा सध्याचा सुमारे २३ किलोमीटरचा मार्ग असून दुहेरी भुयारी मार्गामुळे हा प्रवास सुमारे ११ किलोमीटरच्या मार्गावर येणार आहे. त्यामुळे प्रवासाचा वेळ मोठ्या प्रमाणात कमी होऊन ठाणे ते बोरिवली अवघ्या १२ ते १५ मिनिटांत गाठता येईल, असा विश्वास मुख्यमंत्र्यांनी व्यक्त केला.

पहिल्या बोगद्यासाठी ‘नायक’ टीबीएम यापूर्वीच कार्यान्वित झाला आहे, तर दुसऱ्या बोगद्यासाठी ‘अर्जुना’ टीबीएम सुरू करण्यात आला. त्यामुळे दोन्ही बोगद्यांचे काम समांतरपणे पुढे जाणार आहे. बोरिवली बाजूकडील दुहेरी बोगद्यांसाठीही लवकरच दोन टीबीएम कार्यान्वित करण्यात येणार आहेत.

उड्डाणपुलाला बॅरिस्टर बाबासाहेब भोसले यांचे नाव

वांद्रे-कुर्ला संकुलाच्या जी ब्लॉकला पूर्व द्रुतगती मार्गाशी जोडणाऱ्या उड्डाणपुलाला राज्याचे माजी मुख्यमंत्री आणि ज्येष्ठ स्वातंत्र्यसैनिक बॅरिस्टर बाबासाहेब अनंतराव भोसले यांचे नाव देण्यात आले.

बॅरिस्टर भोसले यांच्या कार्यकाळात स्वातंत्र्यसैनिकांसाठी विविध कल्याणकारी योजना राबविण्यात आल्या. तसेच चंद्रपूर जिल्ह्याचे विभाजन करून गडचिरोली जिल्ह्याची निर्मिती, मुलींसाठी दहावीपर्यंतचे शिक्षण मोफत करण्याचा निर्णय आणि संभाजीनगर येथील मुंबई उच्च न्यायालयाच्या खंडपीठाचे उद्घाटन त्यांच्या कार्यकाळात झाल्याचे मुख्यमंत्री फडणवीस यांनी नमूद केले.

मुंबईच्या जडणघडणीत मुंबई महानगर प्रदेश विकास प्राधिकरणाची भूमिका अत्यंत महत्त्वाची असल्याचेही मुख्यमंत्री म्हणाले.

मुंबईच्या वाहतूक व्यवस्थेला नवी दिशा

एकाच कार्यक्रमात मेट्रो, उपनगरीय रेल्वे, उन्नत मार्गिका आणि भुयारी मार्ग अशा विविध प्रकल्पांना चालना मिळाल्याने मुंबईच्या वाहतूक व्यवस्थेला मोठी गती मिळणार आहे. या पायाभूत सुविधांमुळे मुंबई आणि मुंबई महानगर प्रदेशातील प्रवास अधिक जलद, सुलभ आणि जोडलेला होण्यास मदत होणार आहे.