महापालिकेकडून खेळाडूंना अधिक सुविधा देण्यासाठी प्रयत्नशील : महापौर रवि लांडगे

पुणे प्रतिनिधी रोहन सोनाळे 

पिंपरी चिंचवड शहरातील खेळाडूंनी विविध क्रीडा प्रकारांमध्ये सातत्याने उल्लेखनीय कामगिरी करत शहराची क्रीडा परंपरा अधिक मजबूत केली आहे. महापालिकेच्या माध्यमातून खेळाडूंना अधिक चांगल्या सुविधा उपलब्ध करून देण्यासाठी प्रयत्न सुरू असून, आगामी काळात अधिकाधिक युवक-युवतींनी क्रीडा क्षेत्रात पुढे यावे, असे आवाहन महापौर रवि लांडगे यांनी केले.

सावित्रीबाई फुले पुणे विद्यापीठ येथे आयोजित जिल्हास्तरीय एथलेटिक्स स्पर्धेत पिंपरी चिंचवड येथील साई स्पोर्ट्स अकॅडमीच्या खेळाडूंनी उल्लेखनीय यश संपादन केले. विविध क्रीडा प्रकारांमध्ये उत्कृष्ट कामगिरी करत खेळाडूंनी सुवर्णपदके पटकावली. या यशस्वी खेळाडूंचा सन्मान महापौर रवि लांडगे यांच्या हस्ते करण्यात आला.

यावेळी नगरसदस्य सुरेश भोईर, सदाशिव खाडे तसेच प्रशिक्षक चंद्रशेखर कुदळे उपस्थित होते. उपस्थित मान्यवरांनी खेळाडूंचे अभिनंदन करत त्यांच्या पुढील वाटचालीस शुभेच्छा दिल्या.

स्पर्धेत मधुरा खांबे हिने लांब उडी आणि तिहेरी उडी या दोन्ही प्रकारांमध्ये सुवर्णपदक मिळवत शानदार कामगिरी केली. समृद्धी भोईर हिने हेप्टॅथलॉन या बहुप्रकारांच्या स्पर्धेत सुवर्णपदक पटकावत आपली गुणवत्ता सिद्ध केली. तसेच प्राची अंधारे हिने २० हजार मीटर रेस वॉकिंग स्पर्धेत दमदार प्रदर्शन करत सुवर्णपदकाची कमाई केली.

या तिन्ही खेळाडूंच्या उत्कृष्ट कामगिरीमुळे त्यांची राज्यस्तरीय स्पर्धेसाठी निवड करण्यात आली आहे. खेळाडूंनी मिळवलेल्या या यशामुळे पिंपरी चिंचवडच्या क्रीडा क्षेत्रात आनंदाचे वातावरण निर्माण झाले असून, महापालिकेकडून त्यांना पुढील वाटचालीसाठी शुभेच्छा देण्यात आल्या आहेत.