शीव रेल्वे पुलाच्या पुनर्बांधणीला वेग; १५ ऑक्टोबरपर्यंत सर्व कामे पूर्ण करण्याचे नियोजन

प्रतिनिधी  :नरेश शिंदे 

मुंबई, दि. १८ सप्टेंबर २०२६ : शीव (सायन) रेल्वे स्थानकाजवळील अत्यंत महत्त्वाच्या रेल्वे पुलाच्या पुनर्बांधणीच्या कामाला वेग आला असून १५ ऑक्टोबर २०२६ पर्यंत पुलाच्या सर्व बाजूची कामे पूर्ण करण्याचे नियोजन करण्यात आले आहे. बृहन्मुंबई महानगरपालिकेचे अतिरिक्त महानगरपालिका आयुक्त (प्रकल्प) अभिजीत बांगर यांनी प्रकल्पस्थळी प्रत्यक्ष भेट देऊन कामाची पाहणी केली आणि संबंधित अधिकाऱ्यांना आवश्यक निर्देश दिले.

११२ वर्षे जुना पूल; नव्या पुलाची पुनर्बांधणी

मुंबई शहरी वाहतूक प्रकल्प MUTP-2 अंतर्गत मध्य रेल्वेमार्फत छत्रपती शिवाजी महाराज टर्मिनस (CSMT) ते कुर्ला दरम्यान पाचवी आणि सहावी अशा दोन अतिरिक्त रेल्वे मार्गिका टाकण्याचे नियोजन आहे.

या अतिरिक्त मार्गिकांसाठी जागा उपलब्ध व्हावी, तसेच शीव स्थानकाजवळील ११२ वर्षे जुना आणि असुरक्षित ठरविण्यात आलेला रेल्वे पूल बदलण्यासाठी पुलाची पुनर्बांधणी हाती घेण्यात आली आहे.

रेल्वे हद्दीतील मुख्य पुलाच्या पुनर्बांधणीचे काम मध्य रेल्वे प्रशासनामार्फत करण्यात येत आहे. तर महानगरपालिका हद्दीतील पुलाच्या पोहोच मार्गांचे (Approach Roads) नूतनीकरण व मजबुतीकरणाचे काम रेल्वे विभागाच्या समन्वयाने BMCच्या पूल विभागामार्फत केले जात आहे.

या संपूर्ण पूल प्रकल्पाचा खर्च रेल्वे विभागाच्या निधीतून करण्यात येत आहे. निविदेनुसार पुलाच्या पुनर्बांधणीचा कालावधी फेब्रुवारी २०२७ पर्यंत असला, तरी त्यापूर्वीच पूल वाहतुकीसाठी खुला करण्याच्या दृष्टीने कामाला गती देण्यात आली आहे.

५०० टन वजनाच्या पोलादी तुळ्यांचे काम पूर्ण

रेल्वे रुळांवरून जाणाऱ्या दोन पोलादी तुळ्यांच्या (Girder) डेक स्लॅबचे काँक्रिटीकरण मध्य रेल्वेमार्फत करण्यात आले आहे.

पहिल्या ५०० टन वजनाच्या पोलादी तुळईच्या डेक स्लॅबचे काँक्रिटीकरण २१ ऑगस्ट २०२६ रोजी, तर दुसऱ्या पोलादी तुळईच्या डेक स्लॅबचे काँक्रिटीकरण २९ ऑगस्ट २०२६ रोजी करण्यात आले.

सध्या दोन्ही तुळ्यांवरील अपघात प्रतिबंधक सुरक्षा कठड्यांचे (Crash Barrier) काम प्रगतिपथावर आहे. तसेच डेक स्लॅबच्या काँक्रिट वेअरिंग कोटचे कामही सुरू आहे.

पश्चिम आणि पूर्वेकडील पोहोच रस्त्यांची कामे सुरू

पुलाच्या पश्चिमेकडील लालबहादूर शास्त्री मार्ग ते संत रोहिदास मार्ग (धारावी) या दरम्यानच्या पोहोच रस्त्याचे पुनर्बांधकाम BMCमार्फत अंतिम टप्प्यात आहे.

दरम्यान, पुलाच्या पूर्वेकडील जागा मध्य रेल्वे प्रशासनाने २५ ऑगस्ट २०२६ पासून अंशतः BMCकडे पोहोच रस्त्याच्या कामासाठी हस्तांतरित केली आहे. त्यानुसार पूर्वेकडील पोहोच रस्त्याचे कामही महानगरपालिकेमार्फत सुरू करण्यात आले आहे.

इतर सिमेंट काँक्रीटची कामेही वेगाने सुरू असून, मध्य रेल्वे प्रशासनासोबत समन्वय साधून पुलाचे काम प्राधान्याने पूर्ण करण्यासाठी महानगरपालिका प्रयत्नशील आहे.

५४.५ मीटरचा सिंगल स्पॅन पूल

नवीन उड्डाणपूल ५४.५ मीटर लांबीचा सिंगल स्पॅन असून त्याची रुंदी २९ मीटर आहे. विशेष म्हणजे पुलाखाली कोणतेही खांब नसतील, अशा पद्धतीने त्याची रचना करण्यात आली आहे.

या आराखड्यामुळे छत्रपती शिवाजी महाराज टर्मिनस ते कुर्ला दरम्यान प्रस्तावित पाचव्या आणि सहाव्या रेल्वे मार्गिकांच्या विस्तारासाठी आवश्यक जागा उपलब्ध होणार आहे.

ऑक्टोबरमध्ये पूल सुरू होण्याची शक्यता

ऑक्टोबर महिन्यात हा नवीन पूल वाहतुकीसाठी सुरू करण्याचे नियोजन असल्याने सायन, धारावी, कुर्ला आणि लालबहादूर शास्त्री (LBS) मार्गावरील वाहतूक कोंडी कमी होण्यास मदत होण्याची अपेक्षा आहे.

पुलाच्या कामाची पाहणी करताना अतिरिक्त महानगरपालिका आयुक्त (प्रकल्प) अभिजीत बांगर यांनी संबंधित अधिकाऱ्यांकडून कामाच्या प्रगतीचा आढावा घेतला. यावेळी प्रमुख अभियंता (पूल) राजेश मुळे यांच्यासह संबंधित अभियंते आणि अधिकारी उपस्थित होते.