म. वा. देसाई रुग्णालयाची आरोग्य समिती अध्यक्षांकडून पाहणी; मनुष्यबळाच्या कमतरतेचा आढावा

मुंबई ब्यूरो : अनिल सावरे 

हरिष भांदिर्गे यांच्याकडून संपूर्ण रुग्णालयाची पाहणी; ICU, एक्स-रे विभागांसह अपुऱ्या मनुष्यबळाचा घेतला आढावा

मुंबई, दि. ११ : मालाड पूर्व येथील म. वा. देसाई रुग्णालयातील वैद्यकीय सेवा आणि अपुऱ्या मनुष्यबळाबाबत नागरिकांकडून सातत्याने तक्रारी प्राप्त होत असल्याच्या पार्श्वभूमीवर मुंबई महापालिका आरोग्य समितीचे अध्यक्ष हरिष भांदिर्गे यांनी रुग्णालयाला भेट देत संपूर्ण रुग्णालयाची पाहणी केली.

यावेळी भांदिर्गे यांनी रुग्णालयातील ICU, एक्स-रे विभाग तसेच विविध वैद्यकीय विभागांची प्रत्यक्ष पाहणी केली. उपलब्ध वैद्यकीय सुविधा, विभागांचे कामकाज आणि रुग्णांना मिळणाऱ्या उपचार सेवांचा त्यांनी आढावा घेतला. तसेच रुग्णालयातील अपुऱ्या मनुष्यबळामुळे निर्माण होणाऱ्या अडचणींबाबत डॉक्टर आणि संबंधित अधिकाऱ्यांशी सविस्तर चर्चा केली.

रुग्णांच्या समस्यांचीही घेतली माहिती

रुग्णालयात उपचारासाठी येणाऱ्या नागरिकांना कोणत्या अडचणींचा सामना करावा लागतो, याबाबतही यावेळी माहिती घेण्यात आली. रुग्णांना वेळेत आणि योग्य उपचार मिळणे आवश्यक असून, मनुष्यबळाच्या कमतरतेमुळे रुग्णसेवेवर विपरीत परिणाम होऊ नये, यासाठी आवश्यक उपाययोजनांवर चर्चा करण्यात आली.

रुग्णालयातील विविध वैद्यकीय विभागांमध्ये उपलब्ध असलेले मनुष्यबळ, आवश्यक वैद्यकीय सुविधा आणि रुग्णसेवेतील त्रुटी यांचा सविस्तर आढावा घेण्यात आला. आरोग्य यंत्रणेसमोरील अडचणी दूर करण्यासाठी लवकरच आवश्यक कार्यवाही करण्यात येईल, असे यावेळी सांगण्यात आले.

दर्जेदार रुग्णसेवेवर भर

मालाड पूर्व परिसरातील नागरिकांना तत्पर, दर्जेदार आणि प्रभावी वैद्यकीय सेवा उपलब्ध होणे आवश्यक आहे. रुग्णालयातील मनुष्यबळाची कमतरता आणि इतर समस्या दूर करण्यासाठी प्रशासनाकडून आवश्यक ती कार्यवाही करण्यावर भर देण्यात येणार असल्याचे आरोग्य समिती अध्यक्ष हरिष भांदिर्गे यांनी स्पष्ट केले.

या पाहणीदरम्यान मुंबई भाजपाचे महासचिव विनोद शेलार, रुग्णालयाच्या अधिष्ठात्री डॉ. प्रज्ञा, भाजपाचे विविध पदाधिकारी, रुग्णालयातील डॉक्टर तसेच संबंधित अधिकारी उपस्थित होते