बंजारा समाजाच्या सक्षमीकरणासाठी शासन कटिबद्ध; आश्रमशाळांच्या सुधारणांसाठी ४०० कोटींचा निधी – अतुल सावे

प्रतिनिधी : देवानंद शिंदे 

मुंबई, दि. २२ : बंजारा समाजाच्या सामाजिक, शैक्षणिक आणि आर्थिक सक्षमीकरणासाठी शासन कटिबद्ध असून समाजातील विद्यार्थ्यांना दर्जेदार शैक्षणिक सुविधा उपलब्ध करून देण्यासाठी आश्रमशाळा आणि तांडा शाळांच्या सुधारणांसाठी ४०० कोटी रुपयांचा निधी देण्यात आला आहे, अशी माहिती इतर मागास बहुजन कल्याण मंत्री अतुल सावे यांनी दिली.

बंजारा समाजाचा अनुसूचित जमातीमध्ये समावेश करण्यासह समाजाच्या विविध मागण्यांबाबत मंत्रालयात आयोजित बैठकीत मंत्री सावे बोलत होते.

आरक्षणाच्या मागणीचा अभ्यास करण्यासाठी उच्चस्तरीय समिती

बंजारा समाजाच्या अनुसूचित जमातीतील आरक्षणाच्या मागणीचा अभ्यास करण्यासाठी शासनाने उच्चस्तरीय समिती नियुक्त केली आहे. या समितीचा अहवाल डिसेंबर २०२६ पर्यंत अपेक्षित असल्याचे मंत्री अतुल सावे यांनी सांगितले.

समितीच्या अहवालाच्या आधारे पुढील कार्यवाहीबाबत निर्णय घेण्यात येणार असल्याचे त्यांनी स्पष्ट केले.

१३ योजनांप्रमाणे बंजारा समाजासाठी योजनांचा विचार

धनगर समाजासाठी अनुसूचित जमातीच्या धर्तीवर लागू करण्यात आलेल्या १३ योजनांप्रमाणे बंजारा समाजालाही योजना लागू करण्याबाबत शासन विचार करत आहे. यासंदर्भातील वित्त विभागाचा अहवाल प्राप्त झाल्यानंतर मुख्यमंत्री देवेंद्र फडणवीस यांच्यासोबत बैठक घेण्यात येईल. त्यानंतर हा विषय मंत्रिमंडळाच्या बैठकीत मांडण्यात येईल, असे मंत्री सावे यांनी सांगितले.

आश्रमशाळा आणि तांडा शाळांच्या सुधारणांवर भर

बंजारा समाजातील मुला-मुलींसाठी विविध शैक्षणिक उपाययोजना राबविण्यात येणार आहेत. तांडावस्त्यांवरील शाळांची देखभाल आणि दुरुस्ती करण्यात येईल. विद्यार्थ्यांना चांगल्या शैक्षणिक सुविधा मिळाव्यात यासाठी आश्रमशाळांच्या सुधारणांवरही भर देण्यात येत आहे.

याशिवाय वसंतराव नाईक महामंडळासह इतर महामंडळांवरील अध्यक्षांच्या नियुक्त्या लवकरच करण्यात येतील, असेही मंत्री सावे यांनी सांगितले.

जिंतूरमधील आंदोलकांवरील गुन्ह्यांबाबत कार्यवाही

परभणी जिल्ह्यातील जिंतूर येथे बंजारा समाजाच्या अनुसूचित जमातीतील समावेशाच्या मागणीसाठी उपोषण करणाऱ्या आंदोलकांवर दाखल गुन्हे मागे घेण्याबाबत जिल्हा पोलीस अधीक्षकांशी चर्चा करून आवश्यक कार्यवाही केली जाईल, असे मंत्री सावे यांनी सांगितले.

तसेच बंजारा समाजाच्या पदाधिकाऱ्यांनी उपोषण मागे घ्यावे, असे आवाहनही त्यांनी केले.

समाजाच्या विविध मागण्यांवर सकारात्मक विचार

बैठकीत सकल बंजारा समाज संघटनेच्या पदाधिकाऱ्यांनी समाजाच्या विविध मागण्यांचे निवेदन सादर केले. शासन या मागण्यांचा सकारात्मक विचार करून आवश्यक ती कार्यवाही करेल, अशी ग्वाही मंत्री अतुल सावे यांनी यावेळी दिली.

महाराष्ट्राच्या इतर मागास बहुजन कल्याण विभागाच्या संकेतस्थळावर विभागाशी संबंधित महामंडळे, आश्रमशाळा तसेच विद्यार्थ्यांसाठी उपलब्ध शैक्षणिक योजनांची माहिती नागरिकांसाठी उपलब्ध आहे. 

अधिकारी व समाजाचे पदाधिकारी उपस्थित

या बैठकीस इतर मागास बहुजन कल्याण विभागाचे सचिव अप्पासाहेब धुळाज, सकल बंजारा समाज संघटनेचे अध्यक्ष विनोद आडे, अॅड. विनोद राठोड, विकास जाधव, प्राचार्य बबन पवार, संतोष राठोड, राजेश आडे, शुभम जाधव यांच्यासह विभागाचे वरिष्ठ अधिकारी उपस्थित होते.