महा वॉकेथॉन २०२६’मध्ये अभिनेते संजय दत्त यांचा सहभाग; जलसंधारणाचा संदेश पोहोचविण्यासाठी राज्यव्यापी उपक्रम

प्रतिनिधी : नरेश शिंदे 

मुंबई, दि. १८ ऑगस्ट २०२६ : माती आणि जलसंधारणाचे महत्त्व जनसामान्यांपर्यंत पोहोचविण्यासाठी महाराष्ट्र शासनाच्या मृद व जलसंधारण विभागाच्या वतीने २१ ऑगस्ट २०२६ रोजी राज्यातील सर्व जिल्ह्यांमध्ये ‘महा वॉकेथॉन २०२६ – वॉक फॉर वॉटर’ या राज्यव्यापी उपक्रमाचे आयोजन करण्यात आले आहे. या उपक्रमाला अधिक व्यापक स्वरूप देण्यासाठी प्रसिद्ध अभिनेते संजय दत्त यांना मृद व जलसंधारण मंत्री संजय राठोड यांनी निमंत्रित केले असून, त्यांनी हे निमंत्रण स्वीकारले आहे.

जलसंधारणाचा संदेश अधिकाधिक नागरिकांपर्यंत पोहोचविणे आणि या उपक्रमाला लोकचळवळीचे स्वरूप प्राप्त करून देणे हा या वॉकेथॉनचा प्रमुख उद्देश आहे.

लोकप्रतिनिधींपासून विद्यार्थ्यांपर्यंत सर्वांचा सहभाग

‘महा वॉकेथॉन’मध्ये लोकप्रतिनिधी, प्रशासकीय अधिकारी व कर्मचारी, विद्यार्थी, कलाकार, खेळाडू, स्वयंसेवी संस्था, विविध सामाजिक संघटना तसेच सर्वसामान्य नागरिकांना सहभागी करून घेण्यात येणार आहे.

जलसंधारण ही केवळ शासनाची जबाबदारी नसून प्रत्येक नागरिकाची सामूहिक जबाबदारी आहे, हा संदेश या माध्यमातून देण्याचा प्रयत्न करण्यात येणार आहे.

प्रत्येक जिल्ह्यात ३ किलोमीटरपर्यंत वॉकेथॉन

राज्यातील प्रत्येक जिल्ह्यात कमाल ३ किलोमीटर अंतराची वॉकेथॉन आयोजित करण्यात आली आहे. वॉकेथॉन पूर्ण झाल्यानंतर सहभागी नागरिकांकडून मृद व जलसंधारणाची शपथ घेतली जाणार आहे.

उपक्रमात सहभागी होणाऱ्या नागरिकांना ई-प्रमाणपत्र देण्यात येणार असून उत्कृष्ट कामगिरी करणाऱ्या सहभागींचा जिल्हास्तरावर गौरव करण्यात येणार आहे.

विजेत्यांसाठी ७१ हजार रुपयांची पारितोषिके

वॉकेथॉनला प्रोत्साहन देण्यासाठी जिल्हास्तरावर प्रथम दहा विजेत्यांचा गौरवचिन्ह देऊन सन्मान करण्यात येणार आहे.

याशिवाय प्रायोजकांच्या माध्यमातून एकूण ७१ हजार रुपयांची रोख पारितोषिके देण्याचे प्रस्तावित आहे.

प्रथम क्रमांक – २५ हजार रुपये

द्वितीय क्रमांक – १५ हजार रुपये

तृतीय क्रमांक – १० हजार रुपये

सोडतीद्वारे सात सहभागी – प्रत्येकी ३ हजार रुपये

अशा पद्धतीने सहभागी नागरिकांना प्रोत्साहन देण्यात येणार आहे.

‘पाणी अडवा, पाणी जिरवा’चा संदेश

‘Save Soil, Save Water, Secure Tomorrow’ तसेच ‘पाणी अडवा, पाणी जिरवा, जलयुक्त महाराष्ट्र घडवा’ हा संदेश घेऊन या राज्यव्यापी वॉकेथॉनचे आयोजन करण्यात येत आहे.

मातीचे संरक्षण, पाण्याचे संवर्धन, भूजल पातळी वाढविणे आणि उपलब्ध जलस्रोतांचा योग्य वापर याबाबत नागरिकांमध्ये जनजागृती निर्माण करण्यावर या उपक्रमात भर देण्यात येणार आहे.

१५ ते २१ ऑगस्टदरम्यान जलसंधारण सप्ताह

राज्यात १५ ते २१ ऑगस्टदरम्यान जलसंधारण सप्ताह आयोजित करण्यात आला आहे. तसेच १५ ऑगस्ट २०२६ ते २६ जानेवारी २०२७ या कालावधीत जलसंधारण अभियान राबविण्यात येत आहे.

या अभियानाचा महत्त्वाचा भाग म्हणून २१ ऑगस्ट रोजी होणारी ‘महा वॉकेथॉन २०२६’ जलसंधारणाचा संदेश घराघरांत पोहोचविण्यासाठी महत्त्वाची ठरणार आहे.

संजय दत्त यांच्या सहभागामुळे उपक्रमाला व्यापक प्रसिद्धी

अभिनेते संजय दत्त यांच्या सहभागामुळे ‘महा वॉकेथॉन’ला मोठ्या प्रमाणावर प्रसिद्धी मिळण्यास मदत होणार आहे. त्यांच्या सहभागातून विशेषतः युवा पिढीमध्ये माती आणि जलसंधारणाबाबत जागरूकता निर्माण करण्याचा प्रयत्न केला जाणार आहे.

जलसंधारणाच्या प्रश्नाकडे केवळ पर्यावरणीय विषय म्हणून न पाहता भविष्यातील पाणी सुरक्षेशी जोडलेला महत्त्वाचा सामाजिक विषय म्हणून पाहण्याची गरज आहे. नागरिकांचा सक्रिय सहभाग वाढल्यास जलसंधारणाच्या उपाययोजनांना अधिक व्यापक लोकसमर्थन मिळू शकते.

‘महा वॉकेथॉन २०२६’च्या माध्यमातून माती वाचवा, पाणी वाचवा आणि सुरक्षित भविष्य घडवा, हा संदेश राज्याच्या कानाकोपऱ्यात पोहोचविण्याचा शासनाचा प्रयत्न असून जलसंधारण अभियानाला लोकचळवळीचे स्वरूप देण्यासाठी हा उपक्रम महत्त्वपूर्ण ठरणार आहे.