नाशिकच्या खड्ड्यांवर गणपती बाप्पाचाच सवाल; त्रिमूर्ती नगर मित्र मंडळाचा समाजप्रबोधन करणारा देखावा

नाशिक ब्यूरो:

नाशिक : गणेशोत्सव हा केवळ धार्मिक उत्सव न राहता सामाजिक प्रश्नांवर जनजागृती करण्याचे प्रभावी माध्यम ठरला आहे. याच परंपरेला पुढे नेत पंचवटी परिसरातील हिरावाडी रोड येथे त्रिमूर्ती नगर कला, क्रीडा व सांस्कृतिक मित्र मंडळ आणि मदत फाऊंडेशन यांच्या वतीने नाशिक शहरातील विविध नागरी समस्यांवर लक्ष वेधणारा समाजप्रबोधनपर देखावा साकारण्यात आला आहे.

मंडळाचे संस्थापक अध्यक्ष अंबादास खैरे यांच्या मार्गदर्शनाखाली साकारलेल्या या देखाव्यात नाशिक शहरातील रस्त्यांवरील खड्डे, खड्ड्यांमुळे होणारे अपघात आणि त्यातून गेलेले नागरिकांचे बळी याबाबत गंभीर प्रश्न उपस्थित करण्यात आले आहेत. विशेष म्हणजे या संपूर्ण विषयावर गणपती बाप्पाच प्रश्न विचारताना दाखवण्यात आले असून, त्यामुळे हा देखावा नागरिकांचे लक्ष वेधून घेत आहे.

भारतीय स्वातंत्र्यपूर्व काळात ब्रिटिश राजवटीने राजकीय सभा आणि नागरिकांच्या एकत्र येण्यावर निर्बंध घातले होते. त्यावेळी लोकमान्य बाळ गंगाधर टिळक यांनी सार्वजनिक गणेशोत्सवाच्या माध्यमातून समाजाला एकत्र आणण्याचा आणि सामाजिक प्रबोधनाचा मार्ग स्वीकारला. गणेशोत्सवाच्या माध्यमातून त्यांनी समाजातील विविध प्रश्नांवर जनजागृती केली. आजही अनेक गणेश मंडळे सामाजिक संदेश देणारे देखावे साकारून ही परंपरा पुढे नेत आहेत.

याच सामाजिक प्रबोधनाच्या उद्देशाने त्रिमूर्ती नगर मित्र मंडळाने नाशिकच्या स्थानिक प्रश्नांना आपल्या देखाव्याचा विषय बनवला आहे. नाशिक शहरातील खड्डे आणि त्यामुळे होणारे अपघात, रस्त्यांच्या दुरवस्थेमुळे नागरिकांना भेडसावणाऱ्या समस्या तसेच खड्ड्यांमुळे झालेल्या मृत्यूंचा मुद्दा देखाव्यातून मांडण्यात आला आहे.

यासोबतच नाशिक शहरातील वृक्षतोड, त्यामुळे वाढणारे प्रदूषण आणि रस्त्यांवरील वाहतूक कोंडी या विषयांकडेही देखाव्यातून लक्ष वेधण्यात आले आहे. शहराचा विकास होत असताना मूलभूत नागरी सुविधांशी संबंधित प्रश्नांकडे गांभीर्याने पाहण्याची गरज या माध्यमातून अधोरेखित करण्यात आली आहे.

विशेष म्हणजे आगामी कुंभमेळ्याच्या पार्श्वभूमीवर नाशिक शहरातील रस्ते आणि पायाभूत सुविधांची कामे वेळेत पूर्ण होतील का? हा नागरिकांच्या मनातील प्रश्नही देखाव्यातून उपस्थित करण्यात आला आहे. कुंभमेळ्यापूर्वी शहरातील रस्ते, खड्डे आणि वाहतूक व्यवस्थेतील समस्या दूर होतील का, असा सवाल गणपती बाप्पाच्या माध्यमातून करण्यात आला आहे.

नाशिकच्या रस्त्यांवरील खड्ड्यांच्या समस्येने त्रस्त झालेल्या नागरिकांच्या भावनांनाही देखाव्यातून वाचा फोडण्यात आली आहे. “नाशिकमधील खड्डे असेच राहणार असतील, तर पुढच्या वर्षी यावे की नाही?” असा मनाला भिडणारा सवाल गणपती बाप्पाच्या माध्यमातून उपस्थित करण्यात आला आहे.

गणेशोत्सवाच्या माध्यमातून मनोरंजनासोबतच सामाजिक प्रश्नांवर नागरिकांचे लक्ष वेधण्याचा मंडळाचा हा प्रयत्न असून, नाशिक शहरातील नागरिकांनी या समाजप्रबोधनपर देखाव्याला भेट देऊन सामाजिक संदेश समजून घ्यावा, असे आवाहन मंडळाच्या वतीने करण्यात आले आहे.