सप्तश्रृंगीगड-नांदुरी रस्ता बंद ठेवण्याच्या आदेशात सुधारणा; शनिवार-रविवारी वाहतूक सुरू राहणार

नाशिक ब्यूरो:

नाशिक, दि. १० : सप्तश्रृंगीगड ते नांदुरी रस्त्यावरील काँक्रिटीकरणाचे काम सुरू असल्याने दि. १० ते २६ सप्टेंबर २०२६ या कालावधीत रस्ता वाहतुकीसाठी बंद ठेवण्याबाबत यापूर्वी आदेश निर्गमित करण्यात आला होता. या आदेशात आता सुधारणा करण्यात आली आहे.

सुधारित आदेशानुसार नांदुरी ते सप्तश्रृंगीगड रस्ता १० ते २६ सप्टेंबरदरम्यान शनिवार आणि रविवार वगळता इतर दिवशी वाहतुकीसाठी बंद राहणार आहे. शनिवार व रविवार दि. १२, १३, १९, २० आणि २६ सप्टेंबर २०२६ रोजी रस्ता वाहतुकीसाठी सुरू ठेवण्यात येणार आहे.

पायी मार्ग आणि सप्तश्रृंगी देवी मंदिर नियमित सुरू

दरम्यान, नांदुरी ते सप्तश्रृंगीगड पायी मार्ग भाविकांसाठी नियमित सुरू राहणार आहे. तसेच सप्तश्रृंगी देवी मंदिरही नेहमीप्रमाणे खुले राहणार असल्याचे आदेशात स्पष्ट करण्यात आले आहे.

यामुळे देवीच्या दर्शनासाठी येणाऱ्या भाविकांना पायी मार्गाचा वापर करून मंदिरात दर्शन घेता येणार आहे.

अत्यावश्यक सेवा, रुग्णवाहिका आणि स्कूल बसला सूट

रस्ता बंदीच्या कालावधीत अत्यावश्यक सेवा, रुग्णवाहिका (ॲम्ब्युलन्स) आणि स्कूल बस यांना या बंदीतून सूट देण्यात आली आहे.

रस्ता बंद आणि वाहतूक व्यवस्थेबाबत सर्व संबंधित यंत्रणांनी आवश्यक ती दक्षता घ्यावी. वाहतूक नियंत्रण करताना कोणतीही जीवित किंवा वित्तहानी होणार नाही, याची नोंद घेऊन आवश्यक कार्यवाही करावी, असे निर्देश सुधारित आदेशात देण्यात आले आहेत.

सहाय्यक जिल्हाधिकाऱ्यांकडून सुधारित आदेश

हा सुधारित आदेश सहाय्यक जिल्हाधिकारी तथा उपविभागीय अधिकारी, कळवण डॉ. कश्मिरा संखे यांनी दि. ९ सप्टेंबर २०२६ रोजी निर्गमित केला आहे. आदेश तात्काळ प्रभावाने लागू करण्यात आला आहे.

भाविकांनी प्रवासाचे नियोजन करताना रस्ता बंद असलेल्या दिवसांची नोंद घ्यावी आणि प्रशासनाच्या वाहतूक सूचनांचे पालन करावे, असे आवाहन करण्यात आले आहे.