पादचारी प्रथम अभियानाची टप्पेनिहाय अंमलबजावणी करा; पदपथालगत स्थानिक प्रजातींची कमी उंचीची झाडे लावा – डॉ. अविनाश ढाकणे

प्रतिनिधी : नरेश शिंदे 

मुंबई : शहरातील पादचाऱ्यांना सुरक्षित, अडथळामुक्त आणि सुटसुटीत पदपथ उपलब्ध करून देण्यासाठी ‘पादचारी प्रथम अभियानाची’ टप्पेनिहाय अंमलबजावणी करण्यात यावी, असे अतिरिक्त महानगरपालिका आयुक्त (पूर्व उपनगरे) डॉ. अविनाश ढाकणे यांनी सांगितले. पदपथांच्या बाजूला मोठी झाडे लावण्याऐवजी स्थानिक प्रजातींची कमी उंचीची झाडे लावण्यावर भर द्यावा, अशी सूचनाही त्यांनी केली.

पादचारी प्रथम अभियानाच्या प्रभावी अंमलबजावणीसंदर्भात आयोजित चर्चासत्रात विविध महत्त्वाच्या मुद्द्यांवर चर्चा करण्यात आली. शहरातील पदपथ अतिक्रमणमुक्त करण्यासोबतच त्यांची योग्य देखभाल, नागरिकांचा सहभाग आणि विविध यंत्रणांमधील समन्वय यावर यावेळी भर देण्यात आला.

टप्पेनिहाय उपाययोजनांची गरज

अभियानाची अंमलबजावणी करताना एकाच वेळी सर्व ठिकाणी कारवाई करण्याऐवजी टप्पेनिहाय उपाययोजना आखून त्यांची प्रभावी अंमलबजावणी करावी. पदपथांची सद्यस्थिती, अतिक्रमणाचे स्वरूप, पादचाऱ्यांची वर्दळ आणि स्थानिक गरजा लक्षात घेऊन नियोजन करण्याची गरज असल्याचे डॉ. ढाकणे यांनी स्पष्ट केले.

पदपथांच्या बाजूला वृक्षारोपण करताना पादचाऱ्यांना अडथळा निर्माण होणार नाही, याची दक्षता घेणे आवश्यक आहे. त्यामुळे मोठ्या आकाराची झाडे लावण्याऐवजी स्थानिक प्रजातींची कमी उंचीची झाडे लावावीत, असे त्यांनी सांगितले.

विविध प्राधिकरणे आणि पोलिसांचे सहकार्य आवश्यक

पादचारी प्रथम अभियान यशस्वी करण्यासाठी महानगरपालिका अधिकारी, विविध प्राधिकरणे आणि पोलिसांनी परस्पर समन्वयाने काम करणे आवश्यक असल्याचे तज्ज्ञांनी सांगितले.

सहायक आयुक्त आणि उपआयुक्तांनी दर महिन्याला अभियानाचा आढावा घेण्यासाठी बैठक घ्यावी, अशी सूचनाही करण्यात आली. एकदा हटविण्यात आलेले अतिक्रमण पुन्हा होणार नाही, यासाठी सातत्याने देखरेख ठेवण्याची गरज व्यक्त करण्यात आली.

प्रत्येक अभियंत्याने आपल्या कार्यक्षेत्रातील पदपथांची प्रत्यक्ष पायी चालून पाहणी करावी. पादचाऱ्यांना येणाऱ्या अडचणी, अडथळे आणि स्थानिक समस्या समजून घेऊन त्यावर आवश्यक उपाययोजना कराव्यात. अडचणीच्या अथवा कायदेशीर स्वरूपाच्या विषयांवर आवश्यकतेनुसार कायदेशीर सल्ला घ्यावा, असेही मार्गदर्शन करण्यात आले.

मोकळ्या पदपथांची माहिती नागरिकांपर्यंत पोहोचविण्याचे आवाहन

पादचारी प्रथम अभियानांतर्गत जे पदपथ अतिक्रमणमुक्त करण्यात आले आहेत, त्यांची माहिती नागरिकांपर्यंत पोहोचविण्याची गरजही चर्चासत्रात व्यक्त करण्यात आली.

“मोकळ्या आणि सुटसुटीत पदपथांचा नागरिकांनी अधिकाधिक वापर करावा,” यासाठी जनजागृती करून नागरिकांना प्रोत्साहित करावे, असे आवाहन करण्यात आले. पदपथांचा वापर हा नागरिकांच्या सुरक्षित आणि सुलभ प्रवासासाठी होणे आवश्यक असून, त्यावर पुन्हा अतिक्रमण होणार नाही यासाठी नागरिकांनीही प्रशासनाला सहकार्य करावे, असे सांगण्यात आले.

१७११ ठिकाणी कारवाई; २४६ किलोमीटर पदपथ अडथळामुक्त

पादचारी प्रथम अभियानाच्या पहिल्या टप्प्यात २०० पदपथांवरील अतिक्रमणे हटविण्याचे नियोजन करण्यात आले आहे. त्यापैकी १३६ पदपथांचे काम हाती घेण्यात आले आहे.

महानगरपालिका क्षेत्रात आतापर्यंत सुमारे २४६ किलोमीटर अंतराचे पदपथ अडथळामुक्त करण्यात आले असून, १७११ ठिकाणी कारवाई करण्यात आली आहे. महानगरपालिकेच्या सर्व २६ विभागांमध्ये हे अभियान राबविण्यात येत आहे.

पादचाऱ्यांना सुरक्षित आणि अडथळामुक्त मार्ग उपलब्ध करून देण्यासाठी अतिक्रमण हटविण्यासोबतच पदपथांची रचना, वृक्षारोपण, नियमित देखरेख, कायदेशीर कार्यवाही आणि नागरिकांचा सहभाग या सर्व बाबींचा एकत्रित विचार करणे आवश्यक असल्याचे या चर्चासत्रातून अधोरेखित झाले.