सार्वजनिक-खाजगी भागीदारीतून उभारलेले कर्करोग रुग्णालय आरोग्य क्षेत्रासाठी मैलाचा दगड : मुख्यमंत्री देवेंद्र फडणवीस

पुणे, दि. १७ :

पुणे महानगरपालिका आणि आपुलकी हेल्थकेअर यांच्या संयुक्त उपक्रमातून उभारण्यात आलेल्या अत्याधुनिक कर्करोग केंद्राचे लोकार्पण मुख्यमंत्री देवेंद्र फडणवीस यांच्या हस्ते करण्यात आले. सार्वजनिक-खाजगी भागीदारीतून उभारण्यात आलेले हे रुग्णालय आरोग्य क्षेत्रासाठी प्रेरणादायी आणि महत्त्वपूर्ण पाऊल ठरणार असल्याचे मुख्यमंत्री फडणवीस यांनी सांगितले.

या कार्यक्रमाला उपमुख्यमंत्री सुनेत्रा पवार, उच्च व तंत्रशिक्षण मंत्री चंद्रकांत दादा पाटील, महापौर मंजुषा नागपुरे, खासदार मेधा कुलकर्णी, आमदार भीमराव तापकीर, आमदार राहुल कुल, उपमहापौर परशुराम वाडेकर तसेच महानगरपालिका आयुक्त नवलकिशोर राम यांच्यासह अनेक मान्यवर उपस्थित होते.

मुख्यमंत्री फडणवीस म्हणाले की, राज्यात कर्करोगाचे प्रमाण झपाट्याने वाढत असून वेळेत निदान आणि उपचार मिळाल्यास हा आजार पूर्णपणे बरा होऊ शकतो. मात्र उपचारात विलंब झाल्यास रुग्णांना दीर्घकाळ उपचार घ्यावे लागतात आणि त्यासाठी मोठा आर्थिक खर्च करावा लागतो. ही बाब लक्षात घेऊन केंद्र आणि राज्य शासनाने विविध आरोग्य योजनांमध्ये कर्करोग उपचारांचा समावेश केला असल्याचे त्यांनी नमूद केले.

महाराष्ट्रात मोठ्या प्रमाणावर ‘कर्करोग ग्रीड’ विकसित करण्यात येत असून त्याद्वारे राज्यभरातील रुग्णांना अधिक सक्षम आणि सुलभ उपचार सेवा उपलब्ध करून देण्याचा प्रयत्न सुरू असल्याचेही त्यांनी सांगितले. राज्यातील आरोग्य सेवा अधिक प्रभावी आणि समन्वयित करण्यासाठी हे ग्रीड महत्त्वपूर्ण ठरणार असल्याचा विश्वास त्यांनी व्यक्त केला.

पुणे महानगरपालिका आणि आपुलकी फाउंडेशनच्या माध्यमातून सामाजिक बांधिलकी जपत उभारण्यात आलेल्या या उपक्रमाचे मुख्यमंत्र्यांनी विशेष कौतुक केले.

कार्यक्रमास महानगरपालिकेचे पदाधिकारी, आपुलकी फाउंडेशनचे प्रतिनिधी, वैद्यकीय अधिकारी तसेच नागरिक मोठ्या संख्येने उपस्थित होते.

तत्पूर्वी मुख्यमंत्री देवेंद्र फडणवीस यांनी रुग्णालयाची पाहणी करून विविध उपचार विभाग, अत्याधुनिक वैद्यकीय उपकरणे आणि रुग्णांसाठी उपलब्ध करून देण्यात आलेल्या सुविधांची माहिती घेतली.