अवैध सावकारीत पिळवणूक होत असल्यास तक्रार करा; जिल्हाधिकारी डॉ. विजय राठोड यांचे आवाहन

प्रतिनिधी : उमेश जाधव 

कोल्हापूर, दि. 28 (जिमाका) : अवैध सावकारीच्या पाशात अडकलेल्या नागरिकांना दिलासा देण्यासाठी प्रशासनाने कठोर पावले उचलण्याचे स्पष्ट केले आहे. सावकारांकडून आर्थिक पिळवणूक होत असल्यास किंवा अवैध सावकारीच्या माध्यमातून स्थावर मालमत्ता, शेती अथवा जमीन बळकावण्यात आली असल्यास संबंधितांनी तातडीने तक्रार करावी, असे आवाहन जिल्हा उपनिबंधक, सहकारी संस्था कार्यालयामार्फत करण्यात आले आहे.

सावकारी कायद्याची कडक अंमलबजावणी करून अनधिकृत सावकारी व्यवसाय करणाऱ्यांवर तातडीने कारवाई करण्यात यावी, असे निर्देश समितीचे अध्यक्ष तथा जिल्हाधिकारी डॉ. विजय राठोड यांनी दिले आहेत. सावकारांच्या पाशात अडकलेल्या किंवा सावकारांकडून पिळवणूक होत असलेल्या व्यक्तींना न्याय मिळवून देण्यासाठी आवश्यक ती मदत करण्यात येईल, असेही त्यांनी आश्वासित केले आहे.

अवैध सावकारीविरोधात जिल्हास्तरीय समिती

कर्जदार शेतकरी आणि नागरिकांची सावकारांकडून होणारी आर्थिक पिळवणूक प्रभावीपणे रोखण्यासाठी सामाजिक तसेच कायदेशीर उपाययोजना करण्याची तरतूद करण्यात आली आहे. महाराष्ट्रातील सावकारी व्यवसायाचे नियमन व नियंत्रण करण्यासाठी महाराष्ट्र सावकारी (नियमन) अधिनियम 2014 अस्तित्वात आहे.

अनधिकृतपणे सावकारी व्यवसाय करणाऱ्या व्यक्तींवर कारवाई करणे आणि सावकारी व्यवसायावर योग्य नियंत्रण ठेवणे, हा या कायद्याच्या अंमलबजावणीचा प्रमुख उद्देश आहे. त्यासाठी जिल्हास्तरावर त्रिसदस्यीय समिती गठीत करण्यात आली आहे.

या समितीचे जिल्हाधिकारी अध्यक्ष, जिल्हा पोलीस प्रमुख सदस्य, तर जिल्हा उपनिबंधक, सहकारी संस्था सदस्य सचिव आहेत. या समितीमार्फत जिल्ह्यात अनधिकृत सावकारी व्यवसाय करणाऱ्या व्यक्तींवर कारवाई करण्यासाठी तसेच सावकारी व्यवहारांवर नियंत्रण ठेवण्यासाठी कार्यवाही केली जाते.

जमीन किंवा मालमत्ता बळकावल्यास तक्रार करा

अवैध सावकारीमुळे आर्थिक पिळवणूक झाली असेल किंवा सावकाराने स्थावर मालमत्ता, शेती अथवा जमीन बळकावली असल्यास संबंधित नागरिकांनी तातडीने प्रशासनाशी संपर्क साधावा.

यासाठी नागरिकांनी जिल्हा उपनिबंधक, सहकारी संस्था, सहकार भवन, पहिला मजला, हॉटेल पर्लजवळ, न्यू शाहूपुरी, कोल्हापूर येथे तक्रार किंवा अर्ज सादर करावा.

तसेच कार्यालयाच्या ddrkolhapur@gmail.com या ई-मेलवर तक्रार पाठविता येईल. अधिक माहितीसाठी 0231-2656258 या दूरध्वनी क्रमांकावर संपर्क साधण्याचे आवाहन करण्यात आले आहे.

अवैध सावकारीमुळे त्रस्त असलेल्या नागरिकांनी भीती न बाळगता प्रशासनाकडे तक्रार करून उपलब्ध कायदेशीर मदतीचा लाभ घ्यावा, असे आवाहन जिल्हा उपनिबंधक, सहकारी संस्था कार्यालयामार्फत करण्यात आले आहे.