नाशिकमध्ये बीएपीएस स्वामिनारायण मंदिरात आंबा महोत्सव; एक टनाहून अधिक आंब्यांची भव्य सजावट

नाशिक ब्यूरो:

नाशिक : बीएपीएस स्वामिनारायण मंदिरात आंबा महोत्सवानिमित्त यंदा एक अनोखा आणि आकर्षक उपक्रम राबविण्यात आला. मंदिर परिसरात सुमारे एक टनाहून अधिक आंब्यांचा वापर करून भव्य सजावट करण्यात आली असून या देखण्या सजावटीने भाविकांचे मन जिंकले आहे.

या विशेष आंबा महोत्सवात भारतातील विविध राज्यांमधील १६ प्रकारच्या आंब्यांचा समावेश करण्यात आला. लंगडा, दशेरी, चौसा, केसर, लाडवा, राजापुरी, तोता, गोल्डन बदाम, लालबाग, दाडम, बदाम, आम्रपाली, निलम, कच्छी केसर, पायरी आणि हापूस या लोकप्रिय आंबा जातींचा सजावटीसाठी वापर करण्यात आला.

विविध रंग, आकार आणि सुगंध असलेल्या आंब्यांमुळे संपूर्ण मंदिर परिसराला एक आगळेवेगळे सौंदर्य प्राप्त झाले. आंब्यांच्या नैसर्गिक आकर्षणामुळे मंदिरात येणाऱ्या भाविकांना एक वेगळाच आध्यात्मिक आणि सांस्कृतिक अनुभव मिळत आहे.

मंदिर प्रशासनाने या महोत्सवाच्या माध्यमातून भारतीय कृषी वैविध्य, फळसंस्कृती आणि निसर्गसंपदेचे दर्शन घडविण्याचा प्रयत्न केला आहे. या उपक्रमाला भाविक आणि नागरिकांकडून उत्स्फूर्त प्रतिसाद मिळत असून मोठ्या संख्येने लोक मंदिराला भेट देत आहेत.

आंब्यांच्या सुगंधाने आणि रंगीबेरंगी सजावटीने दरवळलेल्या या महोत्सवाने नाशिककरांचे विशेष लक्ष वेधून घेतले असून मंदिर प्रशासनाच्या या कल्पक उपक्रमाचे सर्वत्र कौतुक होत आहे.