अयोध्येतील कथित देणगी गैरव्यवहाराची निष्पक्ष चौकशी व्हावी; गुलाबो गॅंगचे प्रभू श्रीरामांना साकडे

नाशिक ब्यूरो 

पुणे | प्रतिनिधी : अयोध्येतील श्रीराम मंदिरातील कथित देणगी, दागिने आणि इतर मौल्यवान वस्तूंच्या गैरव्यवहाराच्या आरोपांची निष्पक्ष व पारदर्शक चौकशी व्हावी, तसेच दोषींवर कठोर कारवाई करण्यात यावी, या मागणीसाठी पुण्यातील भवानी पेठ येथील दत्त मंदिरात गुलाबो गॅंगच्या वतीने प्रभू श्रीरामांच्या चरणी प्रार्थना करण्यात आली.

यावेळी श्रीराम दरबारात विधिवत आरती करून अयोध्येतील श्रीराम मंदिराशी संबंधित कथित आर्थिक व मौल्यवान वस्तूंच्या गैरव्यवहाराच्या आरोपांबाबत सत्य समोर यावे आणि संबंधित प्रकरणाची निष्पक्ष चौकशी व्हावी, अशी मागणी करण्यात आली.

गुलाबो गॅंगच्या पदाधिकाऱ्यांनी प्रसिद्धीपत्रकात म्हटले आहे की, श्रीराम मंदिरात दररोज मोठ्या संख्येने भाविक दर्शनासाठी येऊन रोख रक्कम, सोने, चांदी, दागिने आणि इतर मौल्यवान वस्तू अर्पण करतात. तसेच मंदिर उभारणीदरम्यान अर्पण करण्यात आलेल्या सोन्या-चांदीच्या विटांसंदर्भातही कथित गैरव्यवहाराच्या आरोपांची सखोल चौकशी होऊन सत्य जनतेसमोर यावे, अशी त्यांची मागणी आहे.

या प्रार्थना व आरती कार्यक्रमाला संजय बालगुडे, शोभा पणीकर, सोनिया ओवाळ, निकिता ताई, अशोक चव्हाण, बाळू चव्हाण यांच्यासह गुलाबो गॅंगचे पदाधिकारी व कार्यकर्ते उपस्थित होते.

टीप : प्रसिद्धीपत्रकात नमूद करण्यात आलेले गैरव्यवहाराचे आरोप हे संबंधित संस्थेचे दावे असून, त्याबाबत कोणताही अधिकृत निष्कर्ष किंवा न्यायालयीन निर्णय झाल्याचा उल्लेख उपलब्ध माहितीत नाही.