जीवनदान’च्या माध्यमातून अवयवदान जनजागृतीला नवी दिशा; राजोल संजय पाटील यांच्या पुढाकाराला आमिर खान, डॉ. निरंजन हिरानंदानी यांची साथ

मुंबई ब्यूरो: अनिल सावरे 

मुंबई, दि. ५ (प्रतिनिधी) : समाजात अवयवदानाबाबत व्यापक जनजागृती निर्माण करून अधिकाधिक नागरिकांनी या महान कार्यात सहभागी व्हावे, या उद्देशाने वांद्रे येथे आयोजित करण्यात आलेल्या अवयवदान जनजागृती कार्यक्रमाला नागरिकांचा उत्स्फूर्त प्रतिसाद लाभला. या कार्यक्रमाला चित्रपट अभिनेते आमिर खान, उद्योगपती डॉ. निरंजन हिरानंदानी, आर. डी. अँड एस. एच. नॅशनल कॉलेजच्या प्राचार्या डॉ. नेहा जगतियानी, सहर भामला यांच्यासह ‘जीवनदान’ संस्थेच्या संस्थापिका तथा नगरसेविका राजोल संजय पाटील यांची प्रमुख उपस्थिती लाभली.

स्व. दिना बामा पाटील प्रतिष्ठान, जीवनदान संस्था, भामला फाऊंडेशन आणि आर. डी. नॅशनल कॉलेज यांच्या संयुक्त विद्यमाने या कार्यक्रमाचे आयोजन करण्यात आले होते. या उपक्रमाच्या माध्यमातून अवयवदानाचे सामाजिक महत्त्व, त्याची गरज आणि समाजामध्ये त्याबाबत जनजागृती वाढविण्याचा प्रभावी संदेश देण्यात आला.

अवयवदान ही केवळ वैद्यकीय गरज नसून, ती मानवतेची सर्वोच्च सेवा असल्याचे मत यावेळी उपस्थित मान्यवरांनी व्यक्त केले. आजही समाजात अवयवदानाबाबत अनेक गैरसमज असून, पुरेशी माहिती नसल्यामुळे अनेक नागरिक या उपक्रमापासून दूर राहतात. त्यामुळे समाजातील गैरसमज दूर करून नागरिकांमध्ये सकारात्मक विचार निर्माण करण्यासाठी अशा व्यापक जनजागृती कार्यक्रमांची आवश्यकता असल्याचे मान्यवरांनी नमूद केले.

‘जीवनदान’ संस्थेच्या माध्यमातून राजोल संजय पाटील यांनी अवयवदान आणि नेत्रदानाच्या क्षेत्रात उल्लेखनीय कार्य उभारले आहे. संस्थेच्या माध्यमातून आतापर्यंत सुमारे ३ हजारांहून अधिक नेत्रदान घडवून आणण्यात आले असून, या कार्यामुळे अनेक दृष्टिहीन व्यक्तींना नवदृष्टी मिळण्यास मदत झाली आहे.

समाजसेवेच्या या सातत्यपूर्ण कार्यामुळे ‘जीवनदान’ संस्था अवयवदान व नेत्रदान जनजागृतीच्या क्षेत्रात विश्वासार्ह नाव म्हणून ओळख निर्माण करत आहे. नागरिकांमध्ये अवयवदानाविषयी जागरूकता निर्माण करणे, गैरसमज दूर करणे आणि अधिकाधिक नागरिकांना या जीवनदायी चळवळीत सहभागी करून घेणे, यासाठी संस्थेच्या माध्यमातून विविध उपक्रम राबविण्यात येत आहेत.

याचबरोबर स्व. दिना बामा पाटील प्रतिष्ठान सामाजिक, शैक्षणिक आणि जनहिताच्या विविध उपक्रमांद्वारे सातत्याने समाजकार्यात योगदान देत आहे. ईशान्य मुंबईचे खासदार संजय दिना पाटील यांच्या वडिलांच्या स्मरणार्थ स्थापन करण्यात आलेल्या या प्रतिष्ठानच्या माध्यमातून अनेक ग्रंथालये चालविण्यात येत आहेत.

विद्यार्थ्यांना शैक्षणिक साहित्याचे वाटप, गरजू विद्यार्थ्यांना शैक्षणिक मदत तसेच विविध सामाजिक आणि जनकल्याणकारी उपक्रम प्रतिष्ठानच्या माध्यमातून सातत्याने राबविण्यात येत आहेत. समाजाच्या सर्वांगीण विकासासाठी प्रतिष्ठानचे कार्य मोलाचे असल्याची भावना यावेळी उपस्थित मान्यवरांनी व्यक्त केली.

कार्यक्रमात उपस्थित मान्यवरांनी नागरिकांना अवयवदानाचा संकल्प करण्याचे आवाहन केले. अवयवदानाच्या या चळवळीत प्रत्येक नागरिकाने सहभागी होणे आवश्यक असून, अवयवदानामुळे अनेक गरजू रुग्णांना नवीन जीवन मिळू शकते, असे यावेळी सांगण्यात आले.

यावेळी राजोल संजय पाटील म्हणाल्या, “एक अवयवदाता किमान आठ जणांचे प्राण वाचवू शकतो. त्यामुळे अवयवदान हा जीवनदानाचा सर्वात मोठा संदेश आहे. प्रत्येक नागरिकाने या चळवळीत सहभागी होऊन समाजासाठी योगदान द्यावे.”

या उपक्रमामुळे अवयवदानाबाबत समाजात सकारात्मक विचार निर्माण होण्यास निश्चितच मदत होईल, असा विश्वास उपस्थितांनी व्यक्त केला. कार्यक्रमाला नागरिकांनी मोठ्या संख्येने उपस्थित राहून उत्स्फूर्त प्रतिसाद दिला. या जनजागृती अभियानामुळे अधिकाधिक नागरिक अवयवदानाचा संकल्प करतील आणि गरजू रुग्णांसाठी जीवनाची नवी आशा निर्माण होईल, अशी अपेक्षाही यावेळी व्यक्त करण्यात आली.