लोकशाहीर अण्णाभाऊ साठे यांच्या भव्य पूर्णाकृती पुतळ्याचे १ ऑगस्टला लोकार्पण; आ. देवयानी फरांदे यांच्या पुढाकारातून साकारले स्मारक

नाशिक ब्यूरो 

नाशिक : लोकशाहीर अण्णाभाऊ साठे यांच्या १०६ व्या जयंतीनिमित्त येत्या १ ऑगस्ट रोजी नाशिक शहरात त्यांच्या भव्य पूर्णाकृती पुतळ्याचे आणि स्मारकाचे लोकार्पण मोठ्या उत्साहात करण्यात येणार आहे. आमदार प्रा. देवयानी फरांदे यांच्या सातत्यपूर्ण पाठपुराव्यातून साकारलेल्या या स्मारकामुळे नाशिकच्या सांस्कृतिक आणि ऐतिहासिक वैभवात मोलाची भर पडणार असल्याचा विश्वास व्यक्त केला जात आहे.

लोकार्पण सोहळ्याच्या नियोजनासाठी विशेष उत्सव समितीची स्थापना करण्यात आली असून, समितीच्या स्वागताध्यक्षपदी आमदार प्रा. देवयानी फरांदे, तर कार्याध्यक्षपदी माजी महापौर विनायक पांडे यांची नियुक्ती करण्यात आली आहे.

हा सोहळा लोकसहभागातून आणि मोठ्या दिमाखात पार पाडण्यासाठी समितीत विविध सामाजिक, सांस्कृतिक आणि स्थानिक प्रतिनिधींचा समावेश करण्यात आला आहे. नाशिक शहरातील नाशिकरोड, पंचवटी, सातपूर आणि सिडको विभागातील पदाधिकारी व कार्यकर्ते समितीत सहभागी असून कार्यक्रमाच्या नियोजनाला वेग आला आहे.

आयोजकांच्या मते, आमदार देवयानी फरांदे यांच्या पुढाकारातून उभारण्यात आलेले हे स्मारक लोकशाहीर अण्णाभाऊ साठे यांच्या साहित्य, सामाजिक कार्य आणि परिवर्तनवादी विचारांचा वारसा जपणारे प्रेरणास्थान ठरेल. तसेच भावी पिढीला त्यांच्या कार्याची ओळख करून देण्यासह नाशिकच्या सांस्कृतिक वारशाला नवी ओळख मिळेल.

आ. देवयानी फरांदे यांचे मत

"लोकशाहीर अण्णाभाऊ साठे यांनी साहित्याबरोबरच सामाजिक परिवर्तनाची चळवळ उभी केली. त्यांच्या कार्याचा सन्मान व्हावा आणि भावी पिढीला त्यांच्या विचारांचा परिचय व्हावा, या उद्देशाने नाशिकमध्ये भव्य पुतळा साकारण्यात येत आहे. १ ऑगस्ट रोजी त्यांच्या १०६ व्या जयंतीनिमित्त या स्मारकाचे लोकार्पण होणार असून, हा नाशिककरांसाठी अभिमानाचा क्षण असेल. या स्मारकामुळे शहराच्या सांस्कृतिक वैभवात निश्चितच मोलाची भर पडेल आणि त्यांच्या विचारांना नवी प्रेरणा मिळेल," असे आमदार प्रा. देवयानी फरांदे यांनी सांगितले.