छत्रपती शिवाजी महाराज महसूल समाधान शिबिर' लोकाभिमुख प्रशासनाचा आदर्श; मुंबईत २७ शासकीय सेवा एकाच छताखाली – मंत्री ॲड. आशिष शेलार

मुंबई | प्रतिनिधी : संदीप गिरकर 

लोकाभिमुख सरकार आणि जनताकेंद्रित प्रशासनाची संकल्पना प्रत्यक्षात आणण्यासाठी महाराष्ट्र शासनाने सुरू केलेले 'छत्रपती शिवाजी महाराज महसूल समाधान शिबिर अभियान' हे लोकहिताचे प्रभावी पाऊल असल्याचे प्रतिपादन सांस्कृतिक कार्य, माहिती व तंत्रज्ञान मंत्री ॲड. आशिष शेलार यांनी केले.

मुख्यमंत्री देवेंद्र फडणवीस यांच्या वाढदिवसानिमित्त तसेच दिवंगत माजी उपमुख्यमंत्री अजित पवार यांच्या जयंतीचे औचित्य साधून मुंबई शहर जिल्हाधिकारी कार्यालयामार्फत २२ जुलै ते २ ऑगस्ट २०२६ या कालावधीत प्रत्येक विधानसभा मतदारसंघात या विशेष अभियानाचे आयोजन करण्यात आले आहे. माहीम विधानसभा मतदारसंघातील अभियानाचा शुभारंभ प्रभादेवी येथील पु. ल. देशपांडे महाराष्ट्र कला अकादमी येथे झाला.

यावेळी मंत्री ॲड. आशिष शेलार म्हणाले की, छत्रपती शिवाजी महाराजांनी रयतेच्या हिताला सर्वोच्च प्राधान्य देणारा लोकाभिमुख राज्यकारभार उभा केला. त्याच आदर्शावर चालत महाराष्ट्र शासन महसूल विभाग अधिक पारदर्शक, गतिमान आणि नागरिकाभिमुख करण्यासाठी कटिबद्ध आहे. शासनाच्या विविध योजनांचा लाभ शेवटच्या घटकापर्यंत पोहोचविण्यासाठी हे अभियान महत्त्वपूर्ण ठरणार असल्याचे त्यांनी सांगितले.

या कार्यक्रमात मुंबई शहर जिल्हाधिकारी आंचल गोयल यांच्या हस्ते १२३ लाभार्थ्यांना विविध शासकीय योजनांची प्रमाणपत्रे आणि लाभांचे वितरण करण्यात आले.

एकाच छताखाली २७ शासकीय सेवा

या अभियानांतर्गत महसूल विभागासह विविध शासकीय विभागांच्या माध्यमातून महसुली दाखले, आधार सेवा, दिव्यांग सेवा, संजय गांधी निराधार योजना, रेशन कार्ड सेवा, बृहन्मुंबई महानगरपालिकेच्या विविध सेवा अशा एकूण २७ शासकीय सेवा नागरिकांसाठी एकाच ठिकाणी उपलब्ध करून देण्यात आल्या आहेत. त्यामुळे नागरिकांची वेळ, श्रम आणि खर्चाची बचत होऊन प्रशासन अधिक सुलभ झाले आहे.

नागरिकांना लाभ घेण्याचे आवाहन

मुंबई शहरातील नागरिकांनी आपल्या विधानसभा मतदारसंघात आयोजित करण्यात येणाऱ्या 'छत्रपती शिवाजी महाराज महसूल समाधान शिबिर' अभियानात सहभागी होऊन शासनाच्या विविध योजनांचा लाभ घ्यावा, असे आवाहन यावेळी करण्यात आले.

मान्यवरांची उपस्थिती

कार्यक्रमाचे प्रास्ताविक अपर जिल्हाधिकारी बप्पासाहेब थोरात यांनी केले. माहीमचे आमदार महेश सावंत यांनी या उपक्रमामुळे नागरिकांना विविध शासकीय सेवा एकाच ठिकाणी उपलब्ध होत असून ही लोकहिताची प्रभावी संकल्पना असल्याचे सांगितले.

कार्यक्रमाचे सूत्रसंचालन राधिका महाकाळ यांनी केले, तर उपजिल्हाधिकारी प्रशांत पानवेकर यांनी आभार मानले.

लोकाभिमुख प्रशासनाचा नवा आदर्श

राज्य शासनाचे हे अभियान नागरिकांना शासनाच्या सेवा त्यांच्या दारापर्यंत पोहोचविण्याच्या उद्देशाने राबविण्यात येत असून, पारदर्शक, गतिमान आणि उत्तरदायी प्रशासन उभारण्याच्या दिशेने हा महत्त्वपूर्ण उपक्रम मानला जात आहे.