द्वारका चौक, त्र्यंबक रस्त्याचा एक मार्ग ३१ ऑगस्टपर्यंत वाहतुकीसाठी खुला करण्याचे निर्देश

नाशिक ब्यूरो:

नाशिक, दि. १० : शहरात सुरू असलेल्या विविध पायाभूत सुविधांच्या कामांमुळे वाहतुकीवर होणारा परिणाम कमी करण्यासाठी प्रशासनाने महत्त्वाचे निर्णय घेतले आहेत. द्वारका चौकातून नाशिक-धुळे मार्गावरील वाहतूक ३१ ऑगस्टपर्यंत सुरू करण्याचे, तसेच त्र्यंबक रस्त्याचा एक मार्गही त्याच मुदतीत वाहतुकीसाठी खुला करण्याचे निर्देश संबंधित यंत्रणांना देण्यात आले आहेत.

नाशिक पोलीस आयुक्त संदीप कर्णिक, नाशिक-त्र्यंबकेश्वर कुंभमेळा प्राधिकरणाचे आयुक्त शेखर सिंह आणि महापालिका आयुक्त मनीषा खत्री यांनी सोमवारी द्वारका चौक, मुंबई नाका आणि त्र्यंबक रस्त्याची पाहणी करून सुरू असलेल्या कामांचा आढावा घेतला. यावेळी कामे वेळेत पूर्ण करून नागरिकांना होणारा वाहतूक कोंडीचा त्रास कमी करण्याच्या दृष्टीने संबंधित अधिकाऱ्यांना स्पष्ट कालमर्यादा देण्यात आली.

द्वारका चौकातून नाशिक-धुळे मार्ग ३१ ऑगस्टपर्यंत खुला करण्याचे निर्देश

द्वारका चौकातील सुरू असलेल्या कामाची पाहणी करताना एमएसआयडीसीने नाशिक-धुळे दिशेने जाणारी वाहतूक ३१ ऑगस्टपर्यंत सुरू करण्याची कार्यवाही पूर्ण करावी, असे निर्देश कुंभमेळा प्राधिकरणाचे आयुक्त शेखर सिंह यांनी दिले.

द्वारका चौकातील कामामुळे भविष्यात शहराच्या वाहतूक व्यवस्थेला मोठा फायदा होणार असला तरी काम सुरू असताना नागरिकांना होणारा तात्पुरता त्रास कमी करण्यासाठी योग्य नियोजन करणे आवश्यक असल्याचे यावेळी स्पष्ट करण्यात आले.

कामाच्या ठिकाणी वाहतूक सुरळीत ठेवण्यासाठी वाहतूक पोलिसांच्या वाहतूक वॉर्डनची संख्या वाढविण्यात येणार आहे. कंत्राटदार, संबंधित विभाग आणि पोलिस यांच्यात समन्वय ठेवून या वॉर्डनचा प्रभावी वापर करण्याच्या सूचनाही देण्यात आल्या.

मुंबई नाका ते खडकाळी सिग्नल मार्ग नवरात्रोत्सवापूर्वी खुला करणार

मुंबई नाका परिसराचीही पाहणी करण्यात आली. मुंबई नाका ते गडकरी सिग्नल आणि पुढे खडकाळी सिग्नलपर्यंतच्या रस्त्याच्या कामाचा आढावा घेण्यात आला. या मार्गाचा एक भाग नवरात्रोत्सवापूर्वी वाहतुकीसाठी खुला करण्याचे निर्देश संबंधित यंत्रणांना देण्यात आले.

या मार्गावरील कामे तातडीने हाती घेऊन नागरिकांना पर्यायी मार्गांवरील वाहतूक कोंडीचा सामना करावा लागू नये, यासाठी नियोजन करण्याच्या सूचना देण्यात आल्या.

त्र्यंबक रस्त्याचा एक मार्ग ३१ ऑगस्टपर्यंत खुला

त्र्यंबक रस्त्यावरील मुंबई नाका ते एबीबी सर्कलपर्यंत सुरू असलेल्या कामाचाही यावेळी सविस्तर आढावा घेण्यात आला. रस्त्यावरील पॅचवर्कची कामे तातडीने पूर्ण करून ३१ ऑगस्टपर्यंत रस्त्याचा एक मार्ग वाहतुकीसाठी खुला करावा, असे निर्देश देण्यात आले.

पर्यायी बाजूच्या रस्त्यावर होणारी वाहतूक वाहतूक वॉर्डनच्या मदतीने नियंत्रित करण्याचे नियोजन करण्यात आले आहे. तसेच रस्त्यावरील खड्डे तातडीने बुजविण्याच्या सूचनाही संबंधित विभागांना देण्यात आल्या.

नागरिकांचा तात्पुरता त्रास कमी करण्यावर भर

“शहराच्या दीर्घकालीन वाहतूक व्यवस्थेसाठी ही पायाभूत सुविधांची कामे आवश्यक आहेत. मात्र, कामांमुळे नागरिकांना होणारा तात्पुरता त्रास कमी करणेही तितकेच महत्त्वाचे आहे. संबंधित यंत्रणांना स्पष्ट कालमर्यादा देण्यात आली असून, टप्प्याटप्प्याने वाहतूक सुरळीत करण्यावर भर देण्यात येत आहे,” असे शेखर सिंह यांनी सांगितले.

महापालिका आयुक्त मनीषा खत्री यांनीही पायाभूत सुविधांची कामे आणि वाहतूक व्यवस्थापन यांचा समन्वय साधण्याची गरज व्यक्त केली. संबंधित यंत्रणांनी निश्चित केलेल्या कालमर्यादेत कामे पूर्ण करून रस्त्यांचे मार्ग वाहतुकीसाठी खुले करावेत. तसेच खड्ड्यांसारख्या तातडीच्या समस्यांवर प्राधान्याने कार्यवाही करण्यात येईल, असे त्यांनी सांगितले.

अधिकारी उपस्थित

पाहणीवेळी महाराष्ट्र राज्य पायाभूत सुविधा विकास महामंडळाचे अधीक्षक अभियंता ज्ञानेश्वर बारवकर, कुंभमेळा प्राधिकरणाचे उपआयुक्त योगेंद्र चौधरी, पोलिस उपायुक्त (परिमंडळ १) मोनिका राऊत, सहायक पोलिस आयुक्त माधव रेड्डी तसेच एमएसआयडीसी, महापालिका, एसटी महामंडळ आणि संबंधित विभागांचे अधिकारी उपस्थित होते.