ग्रेटर बळीजा कम्युनिटीची स्थापना; देशातील शेतकरी समाजांना एकत्र आणण्याचा संकल्प

प्रतिनिधी

महान सम्राट बळीजा यांच्या स्मृतीप्रित्यर्थ दक्षिण भारतातील १०० विचारवंत, अभ्यासक आणि समाजनेत्यांनी एकत्र येत ‘ग्रेटर बळीजा कम्युनिटी’ या राष्ट्रीय व्यासपीठाची स्थापना केली आहे. देशातील सर्व प्रमुख शेतकरी, पशुपालक आणि कृषीप्रधान समाजांना एकाच छताखाली आणून सामाजिक एकात्मता आणि सर्वांगीण विकास साधण्याचा या उपक्रमाचा मुख्य उद्देश आहे.

गेल्या दशकभरापासून विविध राज्यांमध्ये प्रवास करून समाज एकत्रीकरणासाठी कार्य करणाऱ्या शंभर अभ्यासक आणि विचारवंतांच्या समितीने या व्यासपीठाची उभारणी केली आहे. या समितीमध्ये ज्येष्ठ विचारवंत के. एन. कुमार (आयएएस), अभियंता चक्रपाणी मेंडू (अतिरिक्त महाव्यवस्थापक, आयआरकॉन – भारतीय रेल्वे), डॉ. हरिनारायण, डॉ. अंडाल अम्मीसेट्टी, रामसुधाकर बच्चू, प्रा. श्रीधर इन्कोल्लू, प्रा. कुडेरू राजगोपाल, माजी कुलगुरू हरिनारायण तिरुमलाचेट्टी, डॉ. राजेंद्र प्रसाद वसागिरी, कमलेश पाटील, डॉ. अम्मानी जक्का, सौ. करिश्मा यदामरेड्डी, डॉ. पी.एल.एन. पटेल, प्रसन्ना गुड्डेटी (अमेरिका), आर. पी. प्रताप, डॉ. शेखर सुब्बैया, डॉ. शोभा प्रकाश, डॉ. सुधा पद्मश्री पेड्डीसेट्टी, डॉ. विजयकुमार चेन्नामचेट्टी आणि डॉ. विजयलक्ष्मी यांच्यासह अनेक मान्यवरांचा समावेश आहे.

बैठकीदरम्यान ‘ग्रेटर बळीजा कम्युनिटी’चा ‘बळीजा कोड’ चर्चेसाठी सादर करण्यात आला. समाजाच्या प्रगतीसाठी आणि एकात्मतेसाठी दहा बांधिलकी तत्त्वे (Commitment Principles) देखील जाहीर करण्यात आली.

या उपक्रमाच्या उद्दिष्टपूर्तीसाठी योगदान देणाऱ्या मान्यवरांचा यावेळी गौरव करण्यात आला. मराठा समन्वय परिषदेचे राष्ट्रीय अध्यक्ष कमलेश पाटील यांनी अभियंता चक्रपाणी मेंडू यांचा ‘स्वराज्य जनक परिवार प्रतिमा’ देऊन सन्मान केला.

या कार्यक्रमास दिल्ली विद्यापीठाचे प्राध्यापक जे. ओबैय्या तसेच विविध राज्यांतील समाजसेवक, विचारवंत आणि संघटन समितीचे सदस्य उपस्थित होते.

ग्रेटर बळीजा कम्युनिटीच्या माध्यमातून शेतकरी समाजांमध्ये एकता, शिक्षण, नेतृत्व विकास, सामाजिक सक्षमीकरण आणि परस्पर सहकार्य वाढविण्यासाठी देशव्यापी उपक्रम राबविण्यात येणार असल्याचे आयोजकांनी सांगितले.