कुंभमेळा २०२७: कुशावर्त तीर्थ येथे ध्वजस्तंभाचा शिलान्यास; साधू-महंतांच्या उपस्थितीत धार्मिक विधी संपन्न

नाशिक ब्यूरो 

नाशिक : आगामी कुंभमेळ्याच्या पार्श्वभूमीवर कुशावर्त तीर्थ येथे ध्वजस्तंभ उभारणीसाठी शिलान्यास सोहळा अत्यंत भक्तिमय वातावरणात पार पडला. या कार्यक्रमास अयोध्या राम जन्मभूमीचे कोषाध्यक्ष गोविंद गिरीजी महाराज, कुंभमेळा मंत्री गिरीश महाजन, अखिल भारतीय आखाडा परिषदेचे अध्यक्ष रवींद्र पुरीजी महाराज तसेच महामंत्री हरी गिरीजी महाराज यांची उपस्थिती होती.

पौराणिक मान्यतेनुसार गौतम ऋषींनी गोदावरी नदी पृथ्वीवर आणली आणि ती याच कुशावर्त तीर्थावर प्रगट झाली. त्यामुळे या ठिकाणाला कुंभमेळ्यात विशेष महत्त्व आहे. दर बारा वर्षांनी उभारण्यात येणाऱ्या ध्वजस्तंभाच्या शिलान्यासाला कुंभ पर्वातील पहिला महत्त्वाचा धार्मिक विधी मानले जाते.

यावेळी ३१ फूट उंचीचा ध्वजस्तंभ उभारण्यात येणार असून त्यावर अमृतमंथनाशी संबंधित विविध शिल्पे आणि बोधचिन्हे अंकित केली जाणार आहेत. वेदिक मंत्रघोषात विधिवत पूजन करून हा शिलान्यास सोहळा पार पडला.

आगामी कुंभमेळ्यात सुमारे १० कोटी भाविक सहभागी होण्याची शक्यता असून कुशावर्त परिसर मर्यादित असल्याने पर्यायी स्नान व्यवस्था उभारण्याचा निर्णय प्रशासनाने घेतला आहे. गोदावरी नदीच्या किनाऱ्यावर तसेच त्र्यंबकेश्वर ते नाशिक रामकुंड दरम्यान विविध ठिकाणी नवीन कुंड उभारण्याचा प्रस्ताव आखाडा परिषदेकडून मांडण्यात आला.

मंत्री गिरीश महाजन यांनी सांगितले की, कुंभमेळा हा साधू आणि भाविकांचा असून शासनाची भूमिका केवळ सुविधा उपलब्ध करून देण्याची आहे. भाविकांना सुरक्षित आणि सुलभ अनुभव देण्यासाठी प्रशासन कटिबद्ध असल्याचे त्यांनी स्पष्ट केले.

या कार्यक्रमास विभागीय आयुक्त प्रवीण गेडाम, जिल्हाधिकारी आयुष प्रसाद, कुंभमेळा आयुक्त शेखर सिंह तसेच स्थानिक लोकप्रतिनिधी, पुरोहित आणि हजारो भाविक उपस्थित होते.