लोकशाहीर अण्णाभाऊ साठे यांच्या जयंतीनिमित्त राजधानीत अभिवादन

प्रतिनिधी : नरेश शिंदे 

नवी दिल्ली, दि. १ : लोकशाहीर अण्णाभाऊ साठे यांच्या जयंतीनिमित्त राजधानी नवी दिल्लीतील महाराष्ट्र सदनात त्यांच्या प्रतिमेस पुष्पांजली अर्पण करून आदरांजली वाहण्यात आली.

यावेळी सहायक निवासी आयुक्त नितीन शेंडे आणि महाराष्ट्र परिचय केंद्राचे संचालक हेमराज बागुल यांनी लोकशाहीर अण्णाभाऊ साठे यांच्या प्रतिमेस पुष्पहार अर्पण करून अभिवादन केले.

या कार्यक्रमास सहायक निवासी आयुक्त स्मिता शेलार, जनसंपर्क अधिकारी मनीषा पिंगळे, महाराष्ट्र सदनाचे व्यवस्थापक प्रमोद कोलपते तसेच महाराष्ट्र सदन आणि महाराष्ट्र परिचय केंद्रातील अधिकारी व कर्मचारी उपस्थित होते.

याप्रसंगी महाराष्ट्र सदनाचे व्यवस्थापक प्रमोद कोलपते यांनी लोकशाहीर अण्णाभाऊ साठे यांच्या साहित्यिक योगदानाचा, शाहिरीचा आणि सामाजिक कार्याचा परिचय उपस्थितांना करून दिला. अण्णाभाऊ साठे यांनी आपल्या लेखनातून व शाहिरीतून समाजातील वंचित, शोषित आणि कष्टकरी घटकांचे प्रश्न प्रभावीपणे मांडत सामाजिक परिवर्तनाची प्रेरणा दिल्याचे यावेळी नमूद करण्यात आले.

लोकशाहीर अण्णाभाऊ साठे यांच्या विचारांचा वारसा जपण्याचा आणि त्यांच्या साहित्य व सामाजिक कार्यातून प्रेरणा घेण्याचा संकल्प यावेळी उपस्थितांनी व्यक्त केला.