परभणी–मुदखेड रेल्वे मार्गाच्या आधुनिकीकरणासाठी ₹163 कोटींचा प्रकल्प मंजूर; 'वंदे भारत'सह मालवाहतुकीला मिळणार वेग

मराठवाडा ब्यूरो| लक्ष्मण चौरे 

नवी दिल्ली, दि. 28 : भारतीय रेल्वेने दक्षिण-मध्य रेल्वेच्या नांदेड विभागातील परभणी–मुदखेड दुहेरी रेल्वे मार्गाच्या आधुनिकीकरणासाठी ₹163 कोटींच्या महत्त्वाकांक्षी प्रकल्पाला मंजुरी दिली आहे. या प्रकल्पामुळे या मार्गावरील प्रवासी आणि मालवाहतूक रेल्वेची क्षमता वाढण्याबरोबरच 'वंदे भारत एक्स्प्रेस'सारख्या वेगवान रेल्वेगाड्यांचे अधिक कार्यक्षम संचालन शक्य होणार आहे.

या प्रकल्पांतर्गत सुमारे 164 ट्रॅक किलोमीटर लांबीच्या रेल्वे मार्गावरील विद्यमान 1x25 केव्ही इलेक्ट्रिक ट्रॅक्शन प्रणाली बदलून अत्याधुनिक आणि अधिक क्षमतेची 2x25 केव्ही ट्रॅक्शन प्रणाली बसविण्यात येणार आहे. तसेच वाढीव वीजभार हाताळण्यासाठी आवश्यक असलेली उपकेंद्रे, वीज पुरवठा यंत्रणा आणि संबंधित पायाभूत सुविधांचेही आधुनिकीकरण करण्यात येणार आहे.

या बदलामुळे रेल्वेगाड्यांना अधिक स्थिर, सुरक्षित आणि अखंड वीजपुरवठा मिळणार असून, रेल्वे वाहतुकीतील अडथळे कमी होण्यास मदत होईल. परिणामी प्रवासी रेल्वेसेवा अधिक वेगवान आणि वेळेवर होण्यास हातभार लागणार आहे.

परभणी–मुदखेड रेल्वे मार्ग हा भारतीय रेल्वेच्या 'हायली युटिलाइज्ड नेटवर्क (HUN Route-9)' मधील अत्यंत महत्त्वाचा मार्ग मानला जातो. हा रेल्वेमार्ग अजमेर, इंदूर, खंडवा, अकोला, पूर्णा, मुदखेड, सिकंदराबाद, मेहबूबनगर आणि धोन या प्रमुख शहरांना तसेच औद्योगिक भागांना जोडतो. त्यामुळे या मार्गाच्या क्षमतावाढीचा थेट फायदा प्रवासी, उद्योग आणि व्यापार क्षेत्राला होणार आहे.

या प्रकल्पामुळे उच्च वेगाच्या रेल्वेगाड्यांचे सुरक्षित आणि कार्यक्षम संचालन शक्य होईल. त्याचबरोबर मालवाहतूक रेल्वेची वहनक्षमता वाढणार असल्याने भारतीय रेल्वेने 2029-30 पर्यंत 3,000 दशलक्ष टन मालवाहतुकीचे उद्दिष्ट पूर्ण करण्यासही मोठी मदत मिळणार आहे.

वाढत्या रेल्वे वाहतुकीच्या पार्श्वभूमीवर देशातील सर्वाधिक वर्दळीच्या रेल्वे मार्गांचे आधुनिकीकरण करून आधुनिक आणि सक्षम रेल्वे पायाभूत सुविधा उभारण्याच्या दिशेने हा प्रकल्प महत्त्वाचा टप्पा मानला जात आहे. या प्रकल्पामुळे मराठवाडा आणि दक्षिण भारताला जोडणाऱ्या रेल्वे नेटवर्कची क्षमता अधिक मजबूत होणार असून, भविष्यातील वेगवान रेल्वे सेवांसाठी हा मार्ग अधिक सक्षम बनणार आहे.