गोदावरी तीरावरील पुरुषोत्तमपुरी देवस्थानात अधिक मासानिमित्त भाविकांची गर्दी

मराठवाडा ब्यरो लक्ष्मण चौरे

माजलगाव : बीड जिल्ह्यातील माजलगाव तालुक्यात गोदावरी नदीच्या पवित्र तीरावर वसलेले पुरुषोत्तमपुरी देवस्थान अधिक मासानिमित्त भाविकांच्या गर्दीने फुलून गेले आहे. भगवान विष्णूंना समर्पित असलेल्या या प्राचीन देवस्थानाला मोठे धार्मिक आणि आध्यात्मिक महत्त्व असल्याने राज्यभरातून भाविक दर्शनासाठी येथे येत आहेत.

अधिक मासाच्या पार्श्वभूमीवर देवस्थानात विविध धार्मिक कार्यक्रमांचे आयोजन करण्यात आले आहे. दररोज पूजा-अर्चा, हरिनाम सप्ताह, भजन-कीर्तन तसेच महाप्रसादाचे आयोजन होत असून संपूर्ण परिसर भक्तिमय वातावरणाने भारावून गेला आहे.

गोदावरी नदीच्या शांत आणि पवित्र वातावरणामुळे भाविकांना विशेष आध्यात्मिक समाधान मिळत असल्याची भावना व्यक्त होत आहे. सकाळपासूनच मंदिर परिसरात दर्शनासाठी भाविकांच्या लांबच लांब रांगा लागलेल्या दिसून येत आहेत. “पुरुषोत्तम भगवान” यांच्या जयघोषाने परिसर दुमदुमून गेला आहे.

देवस्थान समितीकडून भाविकांसाठी पिण्याच्या पाण्याची, स्वच्छतेची तसेच सुरक्षा व्यवस्थेची विशेष काळजी घेण्यात आली आहे. अधिक मासात पुरुषोत्तमपुरी येथे स्नान आणि दर्शन केल्यास पुण्य लाभते तसेच जीवनातील संकटे दूर होतात, अशी भाविकांची श्रद्धा असल्याने येथे दिवसेंदिवस गर्दीत वाढ होत असल्याचे दिसून येत आहे.