आंबेओहळ प्रकल्पग्रस्तांचे पुनर्वसन सप्टेंबरअखेर १०० टक्के पूर्ण होणार; मंत्री हसन मुश्रीफ यांचे निर्देश

कोल्हापूर प्रतिनिधी. | उमेश जाधव 

कोल्हापूर, दि. २० : आंबेओहळ मध्यम प्रकल्पातील प्रकल्पग्रस्तांचे पुनर्वसन सप्टेंबर २०२६ अखेर १०० टक्के पूर्ण करण्यात येईल, अशी ग्वाही वैद्यकीय शिक्षण मंत्री हसन मुश्रीफ यांनी दिली. पुनर्वसन प्रक्रियेला विलंब होत असल्याबद्दल नाराजी व्यक्त करत त्यांनी संबंधित विभागांना ऑगस्टअखेर सर्व प्रशासकीय प्रक्रिया पूर्ण करून सप्टेंबरअखेर प्रत्यक्ष पुनर्वसन पूर्ण करण्याचे स्पष्ट निर्देश दिले.

कोल्हापूर जिल्हाधिकारी कार्यालयात आयोजित आढावा बैठकीत मंत्री मुश्रीफ यांनी मतदारसंघातील विविध विकासकामांचा सविस्तर आढावा घेतला. बैठकीला जिल्हाधिकारी डॉ. विजय राठोड, मुख्य कार्यकारी अधिकारी डॉ. जॅसमिन, समरजितसिंह घाटगे, पाटबंधारे विभागाचे अधीक्षक अभियंता चंद्रशेखर पाटोळे, संबंधित अधिकारी, महसूल विभागाचे अधिकारी, राष्ट्रीय महामार्ग प्राधिकरणाचे अधिकारी, कंत्राटदार आणि ग्रामस्थ उपस्थित होते.

ऑगस्टअखेर सर्व निर्णय, सप्टेंबरअखेर पुनर्वसन पूर्ण

आंबेओहळ प्रकल्पाच्या पुनर्वसनासंदर्भात आतापर्यंत ४६ हून अधिक बैठका झाल्याची माहिती समोर येताच मंत्री मुश्रीफ यांनी नाराजी व्यक्त केली. त्यांनी जिल्हाधिकाऱ्यांना ऑगस्टअखेर सर्व प्रलंबित विषयांवर अंतिम निर्णय घेऊन संबंधित विभागांना लेखी आदेश देण्याच्या सूचना केल्या.

यामध्ये बेकनाळ आणि बेळकुंदी गावांतील भूसंपादन, उच्च न्यायालयातील प्रलंबित २५ प्रकरणे, संशयास्पद फेरफार, भूसंपादनाचे निवाडे, आर्थिक पॅकेज स्वीकारलेल्या प्रकल्पग्रस्तांना भूखंड वाटप, कर्पेवाडी येथील प्रकरणे तसेच गडहिंग्लज न्यायालयातील दावे यांचा समावेश आहे.

निकृष्ट दर्जाच्या महामार्ग कामांवर कठोर कारवाई

कागल परिसरातील राष्ट्रीय महामार्ग आणि HAM (Hybrid Annuity Model) योजनेअंतर्गत सुरू असलेल्या रस्ते व सिमेंट काँक्रीटीकरणाच्या कामांचा आढावा घेताना मंत्री मुश्रीफ यांनी निकृष्ट दर्जाच्या कामांबाबत तीव्र नाराजी व्यक्त केली.

मुख्य कंत्राटदारांकडून उपकंत्राटदारांमार्फत करण्यात येणाऱ्या निकृष्ट दर्जाच्या कामांमुळे नागरिकांच्या तक्रारी वाढत असल्याचे सांगत त्यांनी अशा कंत्राटदारांना तातडीने काळ्या यादीत (Blacklist) टाकण्याचे निर्देश संबंधित अधिकाऱ्यांना दिले.

ग्रामस्थांच्या तक्रारींवर संयुक्त बैठक

राष्ट्रीय महामार्गावरील वाहतूक कोंडी, पावसाच्या पाण्याचा निचरा, सांडपाणी व्यवस्थापन, पुलांची उंची आणि पाणीपुरवठा यासंदर्भातील तक्रारींचा आढावा घेत मंत्री मुश्रीफ यांनी येत्या गुरुवारी कागल नगरपालिका सभागृहात राष्ट्रीय महामार्ग प्राधिकरण, संबंधित कंत्राटदार आणि स्थानिक नागरिकांची संयुक्त बैठक घेण्याचे निर्देश दिले.

इतर विकासकामांचाही आढावा

यावेळी मंत्री मुश्रीफ यांनी कसबा सांगव व धामणे येथील जलजीवन मिशनची कामे, बेलेवाडी मासा येथील पाझर तलाव आणि म्हाडा गृह प्रकल्प यांचाही आढावा घेत संबंधित कामे गतीने आणि दर्जेदार पद्धतीने पूर्ण करण्याच्या सूचना दिल्या.

आंबेओहळ प्रकल्पग्रस्तांच्या पुनर्वसनाला निश्चित कालमर्यादा देत आणि निकृष्ट दर्जाच्या सार्वजनिक कामांवर कठोर कारवाईचे संकेत देत मंत्री हसन मुश्रीफ यांनी विकासकामांमध्ये गुणवत्ता आणि वेळेचे महत्त्व अधोरेखित केले.