अंशिकाच्या उपचारासाठी पत्रकार महासंघाची मदतीची सुरुवात; प्रदेशाध्यक्ष गोविंद वाकडे यांचे अधिकाधिक मदतीचे आवाहन

प्रतिनिधी: रोहन सोनाळे 

पिंपरी, दि. १६ (प्रतिनिधी) : भटक्या कुत्र्यांच्या हल्ल्यात गंभीर जखमी झालेल्या अवघ्या पाच वर्षीय अंशिका मिश्रा हिच्या उपचारासाठी संयुक्त महाराष्ट्र मराठी पत्रकार महासंघाने सामाजिक संवेदनशीलता जपत मदतीचा हात पुढे केला आहे. महासंघाचे प्रदेशाध्यक्ष गोविंद वाकडे यांनी अंशिकाच्या कुटुंबीयांना ६ हजार रुपयांची आर्थिक मदत देत तिच्या उपचारासाठी मदतीची सुरुवात केली.

अंशिकाला उपचारासाठी अधिकाधिक आर्थिक मदत मिळावी, यासाठी समाजातील दानशूर व्यक्ती, सामाजिक संस्था आणि संवेदनशील नागरिकांनी पुढे यावे, असे आवाहन गोविंद वाकडे यांनी केले आहे.

सात ते आठ भटक्या कुत्र्यांचा हल्ला; चिमुकली गंभीर जखमी

चिखली परिसरातील म्हेत्रेवाडी येथे राहणाऱ्या अंशिका मिश्रा हिच्यावर मागील आठवड्यात सात ते आठ भटक्या कुत्र्यांनी अचानक हल्ला केला. या हल्ल्यात अंशिका गंभीर जखमी झाली असून तिच्या शरीरावर जवळपास ९० टाके पडले आहेत.

अवघ्या पाच वर्षांच्या चिमुकलीवर झालेल्या या गंभीर हल्ल्यामुळे तिच्या कुटुंबावर मोठे संकट कोसळले आहे. अंशिकाच्या उपचारासाठी मोठा खर्च होत असून, मुलीला वाचविण्यासाठी आणि तिचे उपचार सुरू ठेवण्यासाठी तिच्या पालकांची मोठी धावपळ सुरू आहे.

कुटुंबाची आर्थिक परिस्थिती हलाखीची

अंशिकाचे कुटुंब अत्यंत हलाखीच्या परिस्थितीत आहे. तिचे वडील हे कुटुंबातील एकमेव कमावते असून ते मजुरी करून कुटुंबाचा उदरनिर्वाह करतात. मुलीच्या गंभीर दुखापतीनंतर उपचाराचा मोठा आर्थिक भार कुटुंबावर पडला आहे.

या परिस्थितीची माहिती मिळाल्यानंतर पत्रकार महासंघाचे प्रदेशाध्यक्ष गोविंद वाकडे यांनी अंशिका आणि तिच्या कुटुंबीयांची भेट घेतली. केवळ घटनेचे वृत्तांकन करून न थांबता पत्रकार संघटनेने सामाजिक बांधिलकी जपत प्रत्यक्ष मदतीसाठी पुढे यावे, या भावनेतून त्यांनी अंशिकाच्या उपचारासाठी ६ हजार रुपयांची मदत कुटुंबीयांकडे सुपूर्द केली.

“ही मदत केवळ सुरुवात; अंशिकासाठी अधिकाधिक मदत करा”

गोविंद वाकडे म्हणाले, “अंशिकासाठी केलेली ही मदत केवळ सुरुवात आहे. अवघ्या पाच वर्षांच्या या चिमुकलीला पुन्हा निरोगी आयुष्य मिळावे, यासाठी तिचे उपचार पूर्ण होणे गरजेचे आहे. तिच्या कुटुंबाची आर्थिक परिस्थिती अत्यंत हलाखीची आहे.”

“त्यामुळे समाजातील दानशूर व्यक्ती, सामाजिक संस्था आणि संवेदनशील नागरिकांनी पुढे येऊन अंशिकाच्या उपचारासाठी शक्य ती अधिकाधिक मदत करावी,” असे आवाहनही त्यांनी केले.

पत्रकारितेसोबत सामाजिक बांधिलकीचा आदर्श

पत्रकार संघटनेने केवळ घटनेचे वृत्तांकन न करता पीडित कुटुंबाच्या वेदनेत सहभागी होत प्रत्यक्ष मदतीची सुरुवात केल्याने पत्रकारितेतील सामाजिक संवेदनशीलतेचा वेगळा आदर्श या निमित्ताने समोर आला आहे.

अंशिकाच्या उपचारासाठी समाजातील विविध घटकांनी पुढाकार घेतल्यास तिच्या कुटुंबाला मोठा आधार मिळू शकतो. त्यामुळे मानवतेच्या भावनेतून नागरिकांनी शक्य ती मदत करावी, असे आवाहन करण्यात आले.

यावेळी संघटनेच्या प्रदेश समन्वयक अश्विनी सातव-डोके, कायदेशीर सल्लागार ॲड. गणेश गायकवाड, प्रकाशिका मोहिनी कारंडे, सदस्य मनोज बोरगे आणि सोमनाथ काळे उपस्थित होते.