चित्रपट निर्मात्यांची मध्य रेल्वेला पसंती; आपटा स्टेशन ठरले बॉलिवूडचे आवडते शूटिंग लोकेशन

नाशिक ब्यूरो 

चित्रपट निर्मात्यांची मध्य रेल्वेला पसंती; आपटा स्टेशन ठरले बॉलिवूडचे आवडते शूटिंग लोकेशन

अजरामर बॉलीवूड चित्रपटांपासून ते आधुनिक वेब सिरीज आणि जाहिरातींपर्यंत मध्य रेल्वेची विविध स्थानके आणि परिसर चित्रपट निर्मात्यांसाठी प्रमुख आकर्षण ठरत आहेत. ऐतिहासिक वास्तू, निसर्गरम्य घाट, ग्रामीण भागातील लोकेशन्स आणि कार्यरत रेल्वे यार्ड्समुळे मध्य रेल्वे चित्रपटसृष्टीला वास्तववाद आणि भव्यतेचा अनोखा संगम उपलब्ध करून देत आहे.

युनेस्कोच्या जागतिक वारसा स्थळाचा दर्जा लाभलेल्या छत्रपती शिवाजी महाराज टर्मिनस येथे ‘स्लमडॉग मिलियनेअर’, ‘रब ने बना दी जोडी’, ‘चेन्नई एक्सप्रेस’, ‘द लंच बॉक्स’ यांसारख्या अनेक गाजलेल्या चित्रपटांचे चित्रीकरण झाले आहे. तसेच अनेक जाहिराती आणि वेब सिरीजचे शूटिंगही येथे पार पडले आहे.

वाडी बंदर यार्डमध्ये ‘कमिनेय’, ‘जब वी मेट’ आणि ‘सॅक्रेड गेम्स’सारख्या लोकप्रिय निर्मितींचे सेट उभारण्यात आले होते. तर चौक स्टेशनवर सलमान खानच्या ‘दबंग’ चित्रपटाचे चित्रीकरण झाले. दादर, शीव, पनवेल, सानपाडा आणि कॉटन ग्रीनसारख्या उपनगरी स्थानकांवरही विविध चित्रपटांचे चित्रीकरण झाले आहे.

पुणे आणि लोणावळा स्थानकांवर ‘रोबोट’, ‘रावण’ आणि ‘जब वी मेट’ यांसारख्या सुपरहिट चित्रपटांचे शूटिंग झाले. अलीकडील ‘लापता लेडीज’ या चित्रपटाचे चित्रीकरण पुणे विभागातील बेलापूर, येवला आणि कान्हेगाव स्थानकांवर करण्यात आले होते. सातारा जिल्ह्यातील वाठार स्टेशनवर ‘गुंडे’ चित्रपटासाठी जुन्या रेल्वे वातावरणाची निर्मिती करण्यात आली होती.

नेरळ, माथेरान, लोणावळा आणि खंडाळा यांसारखी निसर्गरम्य ठिकाणेही चित्रपट निर्मात्यांच्या पसंतीस उतरली आहेत. नागपूर विभागातील चंद्रपूर स्टेशन आणि कोळसा खाण परिसरांचाही विविध चित्रपट आणि मालिकांसाठी वापर करण्यात आला आहे.

तीन वर्षांत २.२९ कोटींचा महसूल

मध्य रेल्वेने गेल्या तीन वर्षांत जवळपास ३० चित्रपट आणि मालिकांच्या चित्रीकरणातून तब्बल २.२९ कोटी रुपयांचा महसूल मिळवला आहे. आर्थिक वर्ष २०२३-२४ मध्ये ९४.४५ लाख, २०२४-२५ मध्ये ४०.१३ लाख आणि २०२५-२६ मध्ये ९४.६२ लाख रुपयांचा महसूल नोंदवण्यात आला आहे.

आपटा स्टेशन बनले बॉलिवूडचे आवडते लोकेशन

पनवेल-रोहा मार्गावरील रायगड जिल्ह्यातील आपटा रेल्वे स्टेशन हे छत्रपती शिवाजी महाराज टर्मिनसनंतर बॉलिवूडचे सर्वाधिक पसंतीचे रेल्वे शूटिंग लोकेशन म्हणून समोर आले आहे.

सह्याद्री पर्वतरांगांमध्ये वसलेले, हिरवाई आणि धबधब्यांनी नटलेले आपटा स्टेशन ग्रामीण वातावरण आणि जुन्या रेल्वे स्टेशनची अनुभूती देते. त्यामुळे १९७० ते १९९० च्या दशकातील कथानकांसाठी हे ठिकाण आदर्श मानले जाते.

‘दिलवाले दुल्हनिया ले जाएंगे’, ‘रंग दे बसंती’, ‘पीके’, ‘बंटी और बबली’, ‘खाकी’ आणि ‘बागी’ यांसारख्या चित्रपटांचे चित्रीकरण येथे झाले आहे. गेल्या तीन वर्षांत मध्य रेल्वेला चित्रपट चित्रीकरणातून मिळालेल्या महसुलातील ८५.५५ लाख रुपये महसूल केवळ आपटा स्टेशनमधून मिळाला आहे.

अभिनेते अनुपम खेर यांनी नुकत्याच ‘फ्लिकर’ चित्रपटाच्या शूटिंगदरम्यान ‘दिलवाले दुल्हनिया ले जाएंगे’च्या आठवणींना उजाळा दिला. त्यांनी सोशल मीडियावर आपटा स्टेशनशी असलेल्या भावनिक नात्याचा उल्लेख केला.

चित्रपट निर्मात्यांसाठी एक-खिडकी प्रणाली

चित्रपट चित्रीकरणासाठी मध्य रेल्वेकडे स्वतंत्र जनसंपर्क कक्ष आणि परवानगीसाठी एक-खिडकी प्रणाली उपलब्ध आहे. सुरक्षा नियमांचे पालन, निर्धारित शुल्क आणि रेल्वे ब्लॉकच्या उपलब्धतेनुसार चित्रीकरणासाठी परवानगी दिली जाते.

मध्य रेल्वेने निर्मिती संस्थांना छत्रपती शिवाजी महाराज टर्मिनस, आपटा, पनवेल, चौक, नेरळ, माथेरान, लोणावळा, खंडाळा, वाठार आणि सातारा यांसारख्या स्थानकांवर चित्रीकरणासाठी आमंत्रित केले आहे.