मुख्यमंत्री देवेंद्र फडणवीस यांच्या हस्ते कोल्हापुरात ‘छत्रपती ताराराणी पोलीस गृहसंकुला’चे उद्घाटन

प्रतिनिधी : उमेश जाधव 

कोल्हापूर, दि. ९ ऑगस्ट २०२६ (जिमाका) : महाराष्ट्र राज्य पोलीस गृहनिर्माण कल्याण महामंडळामार्फत कोल्हापूर पोलीस अधीक्षकांच्या अधिनस्त अधिकारी आणि कर्मचाऱ्यांसाठी उभारण्यात आलेल्या ‘छत्रपती ताराराणी पोलीस गृहसंकुल’ निवासी इमारतींचे उद्घाटन मुख्यमंत्री देवेंद्र फडणवीस यांच्या हस्ते करण्यात आले.

कोल्हापूर पोलीस मुख्यालय परिसरात उभारण्यात आलेल्या या गृहसंकुलामुळे पोलीस अधिकारी आणि कर्मचाऱ्यांसाठी निवासाची सुविधा उपलब्ध झाली आहे. पोलिसांच्या कार्यक्षमतेसोबतच त्यांच्या कुटुंबीयांच्या निवासाच्या गरजा लक्षात घेऊन उभारण्यात आलेला हा प्रकल्प महत्त्वपूर्ण मानला जात आहे.

या उद्घाटन सोहळ्यास उपमुख्यमंत्री सुनेत्रा अजित पवार, विधानसभा अध्यक्ष ॲड. राहुल नार्वेकर, जिल्ह्याचे पालकमंत्री तथा राज्याचे आरोग्यमंत्री प्रकाश आबिटकर, वैद्यकीय शिक्षण मंत्री हसन मुश्रीफ, उच्च व तंत्र शिक्षण मंत्री चंद्रकांत (दादा) पाटील, सहपालकमंत्री तथा राज्यमंत्री माधुरी मिसाळ यांच्यासह अनेक मान्यवर उपस्थित होते.

तसेच खासदार श्रीमंत छत्रपती शाहू महाराज, खासदार धनंजय महाडिक, राज्य नियोजन मंडळाचे कार्यकारी अध्यक्ष तथा आमदार राजेश क्षीरसागर, आमदार अमल महाडिक, आमदार चंद्रदीप नरके, महापौर रूपाराणी निकम, कोल्हापूर परिक्षेत्राचे विशेष पोलीस महानिरीक्षक रंजन कुमार शर्मा, जिल्हाधिकारी डॉ. विजय राठोड आणि जिल्हा पोलीस अधीक्षक निलोत्पल यांचीही उपस्थिती होती.

२०४ निवासस्थानांचा समावेश

पोलीस मुख्यालय परिसरात उभारण्यात आलेल्या या गृहसंकुल प्रकल्पात १८ मजली दोन इमारतींचा समावेश आहे. प्रत्येक इमारतीमध्ये १०२ सदनिका असून, दोन्ही इमारती मिळून एकूण २०४ निवासस्थानांची निर्मिती करण्यात आली आहे.

या प्रकल्पासाठी ७१ कोटी २८ लाख रुपये खर्च करण्यात आला असून, प्रकल्पाचे एकूण बांधकाम क्षेत्र २४ हजार १०१ चौरस मीटर आहे.

सौर विद्युत प्रणालीसह आधुनिक सुविधा

पोलीस गृहसंकुलामध्ये आधुनिक सुविधांवर भर देण्यात आला आहे. इमारतीच्या छतावर सौर विद्युत प्रणाली उभारण्यात आली आहे. त्यासोबतच सांडपाणी प्रक्रिया प्रकल्प आणि अग्निशामक प्रणाली यांसारख्या आवश्यक सुविधांचाही समावेश करण्यात आला आहे.

पर्यावरणपूरक आणि आधुनिक तंत्रज्ञानाचा वापर करून उभारण्यात आलेल्या या गृहसंकुलामुळे पोलीस अधिकारी व कर्मचाऱ्यांना सुरक्षित आणि दर्जेदार निवासाची सुविधा मिळणार आहे.

पोलीस कुटुंबांसाठी मोठा दिलासा

कायदा व सुव्यवस्था राखण्यासाठी तसेच नागरिकांच्या सुरक्षेसाठी पोलीस अधिकारी आणि कर्मचारी अहोरात्र कार्यरत असतात. त्यांच्या निवासाच्या गरजा पूर्ण करण्यासाठी उभारण्यात आलेले हे गृहसंकुल पोलिसांसाठी महत्त्वपूर्ण सुविधा ठरणार आहे.

‘छत्रपती ताराराणी पोलीस गृहसंकुल’ाच्या उद्घाटनामुळे कोल्हापूर पोलीस दलातील अधिकारी आणि कर्मचाऱ्यांना आधुनिक निवासाची सुविधा उपलब्ध झाली असून, पोलीस कल्याणाच्या दृष्टीने हा प्रकल्प महत्त्वपूर्ण टप्पा ठरला आहे.