सीएसएमटीहून धावणाऱ्या प्रत्येक रेल्वेगाडीत ‘छत्रपती शिवाजी महाराज की जय’च्या उद्घोषणेची मागणी

प्रतिनिधी: नरेश शिंदे 

मुंबई, दि. १२ ऑगस्ट २०२६ : छत्रपती शिवाजी महाराज टर्मिनस (सीएसएमटी) येथून येणाऱ्या-जाणाऱ्या प्रत्येक रेल्वेगाडीत ‘छत्रपती शिवाजी महाराज की जय’ आणि ‘जय भवानी, जय शिवाजी’ अशा उद्घोषणा करण्यात याव्यात, अशी मागणी महाराष्ट्र विधानसभेचे अध्यक्ष ॲड. राहुल नार्वेकर यांनी केंद्रीय रेल्वेमंत्री अश्विनी वैष्णव यांच्याकडे केली आहे.

दिल्ली दौऱ्यावर असताना नार्वेकर यांनी केंद्रीय रेल्वेमंत्री अश्विनी वैष्णव यांची भेट घेऊन यासंदर्भातील पत्र त्यांना दिले.

छत्रपती शिवाजी महाराजांच्या विचारांचा संदेश देशभर पोहोचविण्याचा उद्देश

मुंबईतील छत्रपती शिवाजी महाराज टर्मिनस हे केवळ देशातील महत्त्वाचे ऐतिहासिक रेल्वे स्थानक नसून छत्रपती शिवाजी महाराजांचे शौर्य, स्वराज्य आणि राष्ट्रभक्तीच्या विचारांचे प्रतीक असल्याचे राहुल नार्वेकर यांनी पत्रात नमूद केले आहे.

या स्थानकाला छत्रपती शिवाजी महाराजांचे नाव देण्यात आले असून, देशभरातून दररोज हजारो प्रवासी या स्थानकावरून प्रवास करतात. त्यामुळे रेल्वे प्रवासाच्या माध्यमातून छत्रपती शिवाजी महाराजांच्या विचारांचा, पराक्रमाचा आणि कार्याचा संदेश देशभर पोहोचविण्याच्या दृष्टीने रेल्वेगाड्यांमध्ये होणाऱ्या उद्घोषणांना महत्त्व असल्याचे त्यांनी म्हटले आहे.

नव्या पिढीला शिवरायांच्या विचारांची ओळख व्हावी

छत्रपती शिवाजी महाराजांनी स्वराज्याची स्थापना करताना समाजातील सर्व घटकांना सोबत घेतले. त्यांचे प्रशासन, शौर्य, लोककल्याणकारी धोरणे आणि राष्ट्रहिताची भूमिका आजही संपूर्ण देशासाठी प्रेरणादायी आहे.

नव्या पिढीला छत्रपती शिवाजी महाराजांच्या कार्याची आणि विचारांची ओळख करून देण्यासाठी अशा उपक्रमांना महत्त्व असल्याचेही नार्वेकर यांनी पत्रात नमूद केले आहे.

देशाच्या कानाकोपऱ्यात पोहोचणार शिवरायांच्या कार्याचा संदेश

सीएसएमटी हे मुंबईच्या ऐतिहासिक आणि सांस्कृतिक वैभवाचे महत्त्वाचे केंद्र आहे. या स्थानकावरून देशाच्या विविध भागांत जाणाऱ्या रेल्वेगाड्यांमधून दररोज मोठ्या संख्येने प्रवासी प्रवास करतात.

त्यामुळे रेल्वेगाड्यांमध्ये ‘छत्रपती शिवाजी महाराज की जय’ आणि ‘जय भवानी, जय शिवाजी’ अशा उद्घोषणा केल्यास छत्रपती शिवाजी महाराजांच्या कार्याचा आणि विचारांचा संदेश महाराष्ट्रासह देशाच्या कानाकोपऱ्यात पोहोचण्यास मदत होईल, असा विश्वास नार्वेकर यांनी व्यक्त केला.

रेल्वे प्रशासनाला आवश्यक सूचना देण्याची विनंती

केंद्रीय रेल्वेमंत्री अश्विनी वैष्णव यांनी या मागणीचा सकारात्मक विचार करून संबंधित रेल्वे प्रशासनाला आवश्यक सूचना द्याव्यात आणि सीएसएमटी येथून येणाऱ्या तसेच निघणाऱ्या प्रत्येक रेल्वेगाडीत या उद्घोषणा करण्याबाबत निर्णय घ्यावा, अशी विनंती विधानसभा अध्यक्ष ॲड. राहुल नार्वेकर यांनी केली आहे.

या मागणीमुळे सीएसएमटी रेल्वे स्थानकाच्या ऐतिहासिक आणि सांस्कृतिक महत्त्वासोबतच छत्रपती शिवाजी महाराजांच्या शौर्य, स्वराज्य आणि लोककल्याणकारी विचारांचा संदेश देशभरातील रेल्वे प्रवाशांपर्यंत पोहोचविण्याचा प्रयत्न होणार आहे.