डॉ. डी. एल. कराड यांना ‘भीष्माचार्य’ पुरस्कार प्रदान; कामगार चळवळीतील योगदानाचा गौरव

नाशिक ब्युरो / मुंबई : सीटूचे राष्ट्रीय उपाध्यक्ष व राज्य अध्यक्ष तसेच कामगार कर्मचारी संघटना संयुक्त कृती समितीचे मुख्य समन्वयक डॉ. डी. एल. कराड यांना ‘भीष्माचार्य’ पुरस्काराने सन्मानित करण्यात आले. मुंबईतील रंग शारदा नाट्य मंदिरात झालेल्या दिमाखदार सोहळ्यात हा पुरस्कार प्रदान करण्यात आला.

भारतीय कामगार कर्मचारी महासंघाच्या वतीने कामगार दिन आणि महाराष्ट्र दिनानिमित्त आयोजित भव्य कामगार मेळाव्यात मान्यवरांच्या हस्ते डॉ. कराड यांना पुरस्कार व मानपत्र देऊन गौरविण्यात आले.

मान्यवरांची उपस्थिती

या कार्यक्रमाला उद्घाटक म्हणून प्रदेश काँग्रेस अध्यक्ष हर्षवर्धन सपकाळ, भारतीय कामगार कर्मचारी महासंघाचे सरचिटणीस आमदार भाई जगताप, भारतीय कामगार सेनेचे अध्यक्ष व खासदार अरविंद सावंत, महासंघाचे अध्यक्ष दिलीप भाई जगताप यांच्यासह अनेक मान्यवर उपस्थित होते.

चार दशकांच्या संघर्षाचा गौरव

डॉ. कराड यांना प्रदान करण्यात आलेल्या मानपत्रात त्यांच्या कामगार चळवळीतील कार्याचा गौरव करण्यात आला. त्यात नमूद करण्यात आले की, त्यांनी कामगारांच्या न्याय हक्कांसाठी भीष्मप्रतिज्ञा करून आयुष्यभर संघर्ष केला.

राष्ट्रीय उपाध्यक्ष व महाराष्ट्र राज्य अध्यक्ष (CITU) म्हणून त्यांनी चार दशकांहून अधिक काळ कामगार चळवळीचे निष्ठावान, धैर्यशील आणि तत्त्वनिष्ठ नेतृत्व केले आहे.

अन्यायाविरुद्ध लढणारे नेतृत्व

मानपत्रात पुढे म्हटले आहे की, डॉ. कराड यांनी कामगारविरोधी धोरणे, अन्याय आणि शोषणाविरुद्ध सातत्याने लढा दिला. मालक, शासन आणि न्यायव्यवस्था अशा सर्व पातळ्यांवर त्यांनी कामगारांच्या बाजूने खंबीर भूमिका घेतली.

कारावास, खटले आणि दडपशाहीला न जुमानता त्यांनी कामगारांच्या हक्कांसाठी अखेरपर्यंत संघर्ष सुरू ठेवला, याच त्यांच्या कार्याचा सन्मान म्हणून ‘भीष्माचार्य’ पुरस्कार देण्यात आल्याचे नमूद करण्यात आले.

वक्त्यांचे आवाहन

यावेळी हर्षवर्धन सपकाळ, अरविंद सावंत, भाई जगताप आणि दिलीप जगताप यांनी कामगार दिन व महाराष्ट्र दिनाचे महत्त्व सांगितले. कामगारविरोधी धोरणांना विरोध करण्यासाठी सर्व संघटनांनी मतभेद विसरून एकत्र येण्याचे आवाहन त्यांनी केले.

केंद्र सरकारवर टीका

सत्काराला उत्तर देताना डॉ. डी. एल. कराड यांनी कामगारांचे संरक्षण करणारे 29 कामगार कायदे रद्द केल्याबद्दल केंद्र सरकारवर टीका केली. जुने कामगार कायदे पुन्हा लागू करण्याची मागणी त्यांनी केली.

तसेच कंत्राटीकरण आणि खासगीकरणामुळे कामगारांचे शोषण वाढले असल्याचे सांगत कंत्राटी कामगारांना कायम करण्याची मागणीही त्यांनी केली.

पुरस्कार सहकाऱ्यांना समर्पित

डॉ. कराड यांनी हा पुरस्कार चळवळीतील मार्गदर्शक कॉम्रेड नरेंद्र मालुसरे, अॅड. द. तु. जायभावे आणि संघर्षातील सहकाऱ्यांना समर्पित केला. पुरस्कार दिल्याबद्दल आयोजकांचे त्यांनी आभार मानले.