फुले, गांधी, नेहरू विचारमंचच्या व्याख्यानाचा समारोप; हर्षवर्धन सपकाळ यांचे कृतीशील होण्याचे आवाहन

पुणे प्रतिनिधी रोहन सोनाळे 

"महात्मा गांधी आणि राष्ट्रवाद" व्याख्यानमालेचा समारोप; राष्ट्रवाद, लोकशाही आणि सामाजिक सहभागावर भाष्य

पिंपरी, पुणे (दि. २४ मे २०२६) : फुले, गांधी, नेहरू विचारमंच यांच्या वतीने आयोजित "महात्मा गांधी आणि राष्ट्रवाद" या विषयावरील व्याख्यानमालेच्या समारोप सत्रात महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी राष्ट्रवाद, सामाजिक सहभाग, लोकशाही मूल्ये आणि नागरिकांच्या भूमिकेवर भाष्य करत कार्यकर्ते आणि नागरिकांनी अधिक कृतीशील होण्याचे आवाहन केले.

रविवारी (दि. २४ मे) पिंपरी येथे आयोजित कार्यक्रमात सेवाग्राम आश्रमाचे सचिव तथा ज्येष्ठ गांधीवादी विचारवंत विजय तांबे, आयोजक दाहर मुजावर, अक्षय शहरकर, केनिथ रेमी तसेच विविध क्षेत्रातील मान्यवर उपस्थित होते.

समारोपपर भाषणात हर्षवर्धन सपकाळ यांनी देशातील सामाजिक आणि राजकीय परिस्थितीवर भाष्य केले. राष्ट्रवादाच्या संकल्पनेवर बोलताना त्यांनी "राष्ट्र" ही व्यापक आणि सर्वसमावेशक भावना असल्याचे नमूद केले.

ते म्हणाले की, सध्या समाजात संकुचित विचारसरणी वाढताना दिसत आहे. विविध सामाजिक आणि लोकशाही मूल्यांच्या संरक्षणासाठी नागरिकांनी अधिक सक्रिय भूमिका घेतली पाहिजे. समाजातील तरुण संघटनांनी अधिक प्रभावीपणे लोकशाही मूल्ये आणि संविधानिक विचार पुढे नेण्याची गरज असल्याचे त्यांनी सांगितले.

यावेळी त्यांनी सामाजिक चळवळी, सत्याग्रह आणि लोकसहभागाच्या माध्यमातून परिवर्तन घडवून आणण्यावर भर दिला. फुले, गांधी, नेहरू आणि डॉ. बाबासाहेब आंबेडकर यांनी मांडलेल्या विचारांच्या आधारे समाजात समानता, बंधुता आणि लोकशाही मूल्ये अधिक दृढ करण्यासाठी नागरिकांनी एकत्रितपणे काम करावे, असे आवाहन त्यांनी केले.

सामाजिक प्रश्नांवर बोलताना सपकाळ यांनी कार्यकर्त्यांनी केवळ निरीक्षक न राहता प्रत्यक्ष कामात सहभागी होण्याची आवश्यकता व्यक्त केली. बदल घडवण्यासाठी कृतीशील भूमिका महत्त्वाची असल्याचे त्यांनी अधोरेखित केले.

कार्यक्रमाच्या प्रारंभी अक्षय शहरकर आणि केनिथ रेमी यांनी उपस्थितांचे स्वागत केले. कार्यक्रमाचे सूत्रसंचालन दाहर मुजावर यांनी केले.

कार्यक्रमाला विष्णू नेवाळे, अशोक मोरे, अमरसिंह नाणेकर, मिलिंद फडतरे, किरण खाजेकर, मयूर जैस्वाल, गौरव चौधरी, अनिरुद्ध कांबळे, नरेंद्र बनसोडे, चैतन्य रणदिवे यांच्यासह विविध क्षेत्रातील मान्यवर उपस्थित होते.