जिजामाता रुग्णालयातील आरोग्य सेवांचा उपमहापौर शर्मिला बाबर यांचा सखोल आढावा

पुणे प्रतिनिधी रोहन सोनाळे 

पिंपरी, दि. २२ एप्रिल २०२६ : पिंपरी चिंचवड महानगरपालिकेच्या पिंपरी येथील जिजामाता रुग्णालयाला उपमहापौर शर्मिला बाबर यांनी भेट देत रुग्णालयातील विविध आरोग्य सेवांचा सखोल आढावा घेतला. यावेळी त्यांनी रुग्णालयातील स्वच्छता, औषधसाठा, डॉक्टर व परिचारिका यांची उपलब्धता तसेच उपचार प्रक्रियेची कार्यक्षमता याची प्रत्यक्ष पाहणी केली.

उपमहापौर बाबर यांनी रुग्णांची विचारपूस करून त्यांच्या प्रकृतीविषयी माहिती घेतली. रुग्णांना कोणत्याही प्रकारची गैरसोय होऊ नये, यासाठी आवश्यक सुविधा तत्काळ उपलब्ध करून देण्याच्या सूचना त्यांनी संबंधित वैद्यकीय अधिकारी आणि कर्मचाऱ्यांना दिल्या. तसेच आरोग्य सेवा अधिक सक्षम, गतिमान आणि नागरिकाभिमुख करण्यावर त्यांनी भर दिला.

यावेळी बोलताना त्यांनी सांगितले की, “पिंपरी चिंचवड महापालिकेच्या माध्यमातून नागरिकांना दर्जेदार व परवडणाऱ्या आरोग्य सेवा उपलब्ध करून देणे ही प्रशासनाची प्राथमिक जबाबदारी आहे. प्रत्येक रुग्णाला वेळेवर व योग्य उपचार मिळाले पाहिजेत. त्यासाठी स्वच्छता, औषधांची उपलब्धता आणि वैद्यकीय कर्मचाऱ्यांची तत्परता याकडे विशेष लक्ष देणे आवश्यक आहे.”

नागरिकांचा विश्वास टिकवून ठेवण्यासाठी आरोग्य सेवांमध्ये सातत्याने सुधारणा करणे गरजेचे असून, सर्व संबंधित विभागांनी समन्वयाने काम करावे, असेही त्यांनी स्पष्ट केले.