राजकीय गद्दारीविरोधात माकपचा राज्यव्यापी एल्गार; पक्षांतर करणाऱ्या खासदारांविरोधात तीव्र निदर्शने करण्याचा निर्णय

नाशिक ब्यूरो/मुंबई : महाविकास आघाडीच्या पाठिंब्यावर निवडून आलेल्या सहा खासदारांनी शिंदे सेनेत प्रवेश केल्याच्या पार्श्वभूमीवर मार्क्सवादी कम्युनिस्ट पक्षाने (माकप) राज्यभर तीव्र निदर्शने करण्याचा निर्णय घेतला आहे. या पक्षांतराला लोकशाही, धर्मनिरपेक्षता आणि संविधान रक्षणाच्या मूल्यांशी झालेला विश्वासघात असल्याचे म्हणत माकपने राज्यव्यापी जनजागृती मोहीम राबविण्याची घोषणा केली आहे.

माकपच्या निवेदनानुसार, लोकसभा निवडणुकीत महाविकास आघाडीच्या उमेदवारांना विजयी करण्यासाठी पक्षाचे कार्यकर्ते आणि जनसंघटनांनी राज्यभर मोठ्या प्रमाणावर काम केले होते. भारतीय जनता पक्ष आणि त्यांच्या मित्रपक्षांविरोधात प्रचार करून या उमेदवारांना निवडून आणण्यात डाव्या पक्षांनी महत्त्वाची भूमिका बजावली होती. मात्र निवडून आल्यानंतर या खासदारांनी शिंदे सेनेत प्रवेश करून जनतेचा आणि कार्यकर्त्यांचा विश्वासघात केल्याचा आरोप पक्षाने केला आहे.

माकपने यापूर्वी झालेल्या आमदारांच्या पक्षांतराचाही उल्लेख करत, अशा घटनांमुळे लोकशाही प्रक्रियेवरील जनतेचा विश्वास कमी होत असल्याची चिंता व्यक्त केली आहे. निवडणुकीत विचारसरणीपेक्षा आर्थिक बळ आणि निवडून येण्याची क्षमता यांना प्राधान्य दिल्यामुळे अशा प्रकारच्या संधीसाधू राजकारणाला खतपाणी मिळत असल्याचा आरोप पक्षाने केला.

पक्षाच्या मते, विकास निधीचा वापर राजकीय दबाव निर्माण करण्यासाठी केला जात असून त्यातून पक्षांतराला चालना मिळत आहे. विरोधी पक्षातील आमदार-खासदारांना विकासकामांसाठी निधी नाकारला जातो, तर सत्ताधारी पक्षाला पाठिंबा देणाऱ्यांना प्राधान्य दिले जाते. यामुळे लोकशाही मूल्यांना धक्का बसत असल्याचे निवेदनात म्हटले आहे.

या पार्श्वभूमीवर मार्क्सवादी कम्युनिस्ट पक्षाने राज्यभर निदर्शने, जनजागृती मोहीम आणि गद्दारांविरोधात प्रतीकात्मक आंदोलन करण्याचा निर्णय घेतला आहे. पक्षाच्या सर्व शाखा, जनसंघटना आणि वर्गीय संघटनांनी या मोहिमेत सक्रिय सहभाग घ्यावा, तसेच मोठ्या प्रमाणात जनतेला सहभागी करून घ्यावे, असे आवाहन करण्यात आले आहे.

निवडणूक आयोग आणि शासकीय यंत्रणांच्या गैरवापराला आळा घालण्यासाठी व्यापक निवडणूक सुधारणा लागू करण्याची मागणीही माकपने केली आहे. लोकशाही, संविधान आणि जनहिताच्या रक्षणासाठी हा संघर्ष सुरू राहील, असा निर्धार पक्षाने व्यक्त केला आहे.