MTNL केबल चोरी करणाऱ्या टोळीचा पर्दाफाश; समतानगर पोलिसांकडून १३ आरोपी अटक

मुंबई ब्यूरो : अनिल सावरे 

मुंबई, दि. १४ ऑगस्ट २०२६ : कांदिवली पूर्वेतील अशोक नगर क्रॉस रोड क्रमांक ४ परिसरात MTNL कंपनीच्या भूमिगत केबल चोरीप्रकरणी समतानगर पोलिसांनी मोठी कारवाई करत १३ आरोपींना अटक केली आहे. या कारवाईत पोलिसांनी गुन्ह्यात वापरण्यात आलेला २० लाख रुपये किमतीचा JCB तसेच ८० हजार रुपये किमतीचे दोन मोबाईल फोन, असा एकूण २० लाख ८० हजार रुपयांचा मुद्देमाल जप्त केला आहे.

अशोक नगर क्रॉस रोड क्रमांक ४, कांदिवली पूर्व येथे भूमिगत असलेल्या MTNL कंपनीच्या सुमारे ९ लाख ५०० रुपये किमतीच्या, १५३ मीटर लांबीच्या २००० पेअरच्या चार केबलची चोरी झाल्याची तक्रार MTNLचे व्यवस्थापक वीरेंद्र ललताप्रसाद यादव यांनी समतानगर पोलीस ठाण्यात दिली होती.

या तक्रारीवरून समतानगर पोलीस ठाण्यात गुन्हा क्रमांक ८०६/२०२६ नोंद करण्यात आला. या प्रकरणात BNS कलम 303(2), 324(5), 3(5), दूरसंचार अधिनियम 2023 मधील कलम 42 तसेच सार्वजनिक मालमत्ता नुकसान प्रतिबंधक अधिनियम 1984 मधील कलम 3 अन्वये गुन्हा दाखल करण्यात आला होता.

तपासात १३ आरोपी निष्पन्न

गुन्ह्याच्या तपासादरम्यान पोलिसांनी आरोपींची माहिती मिळवून १३ जणांना अटक केली. अटक करण्यात आलेल्या आरोपींमध्ये स्वप्निल अनिल शेलार, सुरेश शिवाजी शिंदे, प्रथमेश दत्तात्रेय मालवणकर, सागर नैशिल कांबळे, साहिल शकिल साह, अब्दुल सिद्दीक अहमद शेख, रिझवान मेहताब मलिक, मोहम्मद अफजल हसन खान, सूरज उर्फ साहिल दिलावर कालेकर, मनोजकुमार शहाबुद्दीन गुप्ता, मुबारक अली नवाजानअली शहा, आझम अब्दुल गफार खान आणि अब्दुल वहाब सादिक मिया अन्सारी यांचा समावेश आहे.

पोलिसांनी अटक केलेल्या आरोपींकडून गुन्ह्यात वापरण्यात आलेला JCB आणि दोन मोबाईल फोन जप्त केले आहेत. जप्त करण्यात आलेल्या मुद्देमालाची एकूण किंमत २० लाख ८० हजार रुपये असल्याचे पोलिसांनी नमूद केले आहे.

अन्य आरोपींचा शोध सुरू

या प्रकरणात आणखी काही आरोपी सहभागी असल्याची शक्यता असून, गुन्ह्यातील अन्य आरोपींचा शोध सुरू असल्याची माहिती पोलिसांनी दिली आहे. केबल चोरीमागील संपूर्ण टोळी आणि चोरीच्या मालाच्या व्यवहाराबाबत पुढील तपास करण्यात येत आहे.

वरिष्ठ अधिकाऱ्यांच्या मार्गदर्शनाखाली कारवाई

ही कारवाई उत्तर प्रादेशिक विभागाचे अपर पोलीस आयुक्त श्री. शशिकुमार मीना, उत्तर परिमंडळ-३चे पोलीस उपायुक्त श्री. गजानन शिवलिंग राजमाने आणि समतानगर विभागाचे सहाय्यक पोलीस आयुक्त श्री. कैलास बर्वे यांच्या मार्गदर्शनाखाली करण्यात आली.

वरिष्ठ पोलीस निरीक्षक जयवंत शिंदे, पोलीस निरीक्षक (गुन्हे) अजितसिंग राजपूत, सहाय्यक पोलीस निरीक्षक योगेश राऊत तसेच पोलीस कर्मचारी रोजेश तोंडवळकर, जयेश केणी, अतुल ननावरे, दौलत साळुंके आणि निलेश भिकले यांनी या कारवाईत सहभाग घेतला.

समतानगर पोलिसांच्या या कारवाईमुळे मुंबईतील दूरसंचार यंत्रणेशी संबंधित केबल चोरी करणाऱ्या टोळीवर मोठी कारवाई झाल्याचे चित्र आहे. पुढील तपासात आणखी आरोपी किंवा चोरीच्या मालाबाबत माहिती समोर येण्याची शक्यता आहे.