अनुसूचित जातींच्या उपवर्गीकरणास विरोध; पीपल्स रिपब्लिकन पार्टीचे नाशिकमध्ये निवेदन

नाशिक ब्यूरो:

नाशिक : अनुसूचित जातींच्या उपवर्गीकरणाच्या प्रक्रियेमुळे विविध जातींमध्ये भेदभाव आणि सामाजिक तेढ निर्माण होण्याची शक्यता असल्याचा आरोप करत पीपल्स रिपब्लिकन पार्टीच्या वतीने या प्रक्रियेला तीव्र विरोध करण्यात आला आहे. अनुसूचित जाती (एससी) प्रवर्ग एकत्रित आणि कायमस्वरूपी ठेवण्यात यावा, तसेच उपवर्गीकरणासंदर्भातील कोणतीही प्रक्रिया अथवा कारवाई तात्काळ थांबविण्यात यावी, अशी मागणी पक्षाच्या वतीने करण्यात आली.

या मागणीसाठी संपूर्ण महाराष्ट्रात एकाचवेळी निदर्शने आणि आंदोलने करण्यात आली. या आंदोलनाचा एक भाग म्हणून प्रदेशाध्यक्ष तथा माजी विरोधी पक्षनेते गणेशभाई उन्हवणे यांच्या नेतृत्वाखाली नाशिक येथे महसूल आयुक्त गेडाम यांना निवेदन सादर करण्यात आले.

पीपल्स रिपब्लिकन पार्टीने निवेदनात म्हटले आहे की, अनुसूचित जाती प्रवर्गातील कोणत्याही एका जातीला उपवर्गीकरणाच्या नावाखाली स्वतंत्रपणे वेगळे करणे योग्य नाही. अशा प्रकारच्या निर्णयामुळे अनुसूचित जाती प्रवर्गातील सामाजिक एकता आणि बंधुभावावर परिणाम होण्याची शक्यता आहे.

संविधानाने समानता, सामाजिक न्याय आणि बंधुता ही मूलभूत मूल्ये दिली आहेत. या मूल्यांचा सन्मान राखत अनुसूचित जाती प्रवर्गातील सर्व जातींना एकत्रित ठेवण्यात यावे. अनुसूचित जातींची एकजूट आणि एकसंधता कायम राखणे आवश्यक असल्याची भूमिका पक्षाने मांडली आहे.

उपवर्गीकरणाच्या प्रक्रियेमुळे जाती-जातींमध्ये भेदभाव निर्माण होण्याबरोबरच सामाजिक सलोख्याला धक्का पोहोचू शकतो, अशी चिंता निवेदनातून व्यक्त करण्यात आली. त्यामुळे अनुसूचित जातींच्या उपवर्गीकरणाबाबतचा निर्णय तात्काळ रद्द किंवा स्थगित करण्यात यावा, अशी मागणी करण्यात आली.

या निर्णयाची अंमलबजावणी करण्याचा प्रयत्न झाल्यास पीपल्स रिपब्लिकन पार्टीच्या वतीने भविष्यात संपूर्ण महाराष्ट्रात लोकशाही मार्गाने तीव्र स्वरूपाचे आंदोलन करण्यात येईल, असा इशाराही पक्षाच्या वतीने देण्यात आला. आंदोलनामुळे निर्माण होणाऱ्या परिस्थितीला आणि त्यातून उद्भवणाऱ्या परिणामांना शासन व प्रशासन जबाबदार राहील, असे निवेदनात नमूद करण्यात आले आहे.

अनुसूचित जाती प्रवर्गाची एकजूट कायम ठेवण्यासाठी आणि उपवर्गीकरणाची प्रक्रिया थांबविण्यासाठी शासनाने तातडीने सकारात्मक निर्णय घ्यावा, अशी मागणी यावेळी करण्यात आली.

नाशिक येथे महसूल आयुक्तांना निवेदन देताना पक्षाचे जिल्हाध्यक्ष ॲड. शशिकांत उन्हवणे, अनिल गांगुर्डे, मुरली घोरपडे, देविदास डोखे, नितीन पगारे, रवी खरात, इम्रान शेख, सिद्धार्थ भालेराव, शकील शेख, जावेद शेख, पप्पू जाधव, भारत विणकर, आप्पा पगारे, प्रदीप वीर, प्रवीण पगारे, प्रवीण जाधव, मीना पगारे, मुक्ता खर्जुल, पंचफुला गायकवाड, अलका निकम यांच्यासह पक्षाचे महिला व पुरुष पदाधिकारी तसेच कार्यकर्ते मोठ्या संख्येने उपस्थित होते.