मुंबई प्रेस क्लब निवडणुकीत ‘सेव्ह द प्रेस क्लब अलायन्स’चा दणदणीत विजय; सुरेंद्र पी. गांगण अध्यक्षपदी विजयी

मनीषा गुरव :- चीफ एडिटर

मुंबई, दि. २५ : मुंबई प्रेस क्लबच्या प्रतिष्ठेच्या निवडणुकीत ‘सेव्ह द प्रेस क्लब अलायन्स’ (SPCA) ने एकहाती विजय मिळवत सर्व सहा पदाधिकारी पदांसह व्यवस्थापन समितीच्या सर्व दहा जागांवर दणदणीत यश संपादन केले. या निकालामुळे प्रेस क्लबमध्ये परिवर्तनाच्या बाजूने सदस्यांनी स्पष्ट कौल दिल्याचे मानले जात आहे.

अध्यक्षपदाच्या निवडणुकीत हिंदुस्तान टाइम्सचे सुरेंद्र पी. गांगण यांनी ५८२ मते मिळवत प्रतिस्पर्धी राजीव खांडेकर (२६० मते) यांचा मोठ्या फरकाने पराभव केला. या निवडणुकीत एकूण ८६२ मते पडली असून त्यापैकी २० मते अवैध ठरली.

अध्यक्ष (Chairperson) पदासाठी झालेल्या निवडणुकीत एस. बालकृष्णन यांनी ५१० मते मिळवत मयूरेश गणपती (३२२ मते) यांचा पराभव केला. या निवडणुकीत ३० मते अवैध ठरली.

उपाध्यक्षपदी धोंडीबा (पांडुरंग) म्हस्के यांनी ५३७ मते मिळवत आशीष एस. राजे (२९१ मते) यांचा पराभव केला. या पदासाठी ३४ मते अवैध ठरली.

सचिवपदी अनिल कुमार सिंह यांनी ५१३ मते मिळवत सौरभ शर्मा (३१५ मते) यांचा पराभव केला. संयुक्त सचिवपदी सुधाकर एस. कश्यप यांनी ५१७ विरुद्ध ३२४ मतांनी रुचा कानोलकर यांचा पराभव केला. या निवडणुकीत २१ मते अवैध ठरली.

कोषाध्यक्षपदी ओमप्रकाश तिवारी यांनी ४८७ मते मिळवत शशांक परेड (३३५ मते) यांचा पराभव केला. या निवडणुकीत ४० मते अवैध ठरली.

व्यवस्थापन समितीवर निवडून आलेल्या सदस्यांमध्ये वैभव परब (५३०), स्वप्निल ए. शिंदे (५०२), पूनम डी. अपराज (४९४), मनीषा एम. रेगे (४९१), अनीता डी. शुक्ला (४७४), शाहिद ए. अन्सारी (४४९), आदित्य आर. दुबे (४२७), मधु ए. नैनन (३९६), के. जे. बेनीचन (३८७) आणि उमेश डी. गोस्वामी (३८०) यांचा समावेश आहे.

विजयानंतर नवनिर्वाचित अध्यक्ष सुरेंद्र पी. गांगण यांनी सदस्यांचे आभार मानत सांगितले की, "हा विजय केवळ आमचा नाही, तर बदलासाठी मतदान करणाऱ्या प्रत्येक सदस्याचा आहे. मुंबई प्रेस क्लबची प्रतिष्ठा, पारदर्शकता आणि लोकशाही मूल्ये पुन्हा प्रस्थापित करण्याचा सदस्यांनी दिलेला हा कौल आहे. आमच्यावर विश्वास दाखविल्याबद्दल सर्व मतदारांचे मनःपूर्वक आभार. निवडणुकीदरम्यान दिलेली प्रत्येक हमी पूर्ण करण्यासाठी आम्ही कटिबद्ध आहोत."

मुंबई प्रेस क्लबच्या या निवडणुकीत ‘सेव्ह द प्रेस क्लब अलायन्स’ने सर्व पदांवर मिळविलेला विजय हा संघटनेच्या नेतृत्वावरील सदस्यांचा वाढता विश्वास आणि पारदर्शक कारभाराच्या अपेक्षेचा स्पष्ट संदेश मानला जात आहे.