कौटुंबिक जमिनीच्या विकास व्यवहारात फसवणूक व धमकावल्याचा आरोप; कुणाल चोरडिया यांच्याविरोधात गुन्हा दाखल करण्याची विनोद धुमाळ यांची मागणी

पुणे प्रतिनिधी : रोहन सोनाळे 

पिंपरी (प्रतिनिधी), दि. ३ ऑगस्ट २०२६ : भोसरी येथील कौटुंबिक मिळकतीच्या विकास व्यवहारात आर्थिक फसवणूक, विश्वासघात तसेच जीवे मारण्याच्या धमक्या दिल्याचा गंभीर आरोप करत विनोद अनंता धुमाळ यांनी विशाल चोरडिया कन्स्ट्रक्शन प्रा. लि.चे संचालक कुणाल दिलीप चोरडिया यांच्याविरोधात तातडीने फौजदारी गुन्हा दाखल करून कठोर कारवाई करण्याची मागणी केली आहे.

धुमाळ यांनी रविवारी (दि. ३) पिंपरी येथील नमस्कार हॉटेलमध्ये पत्रकार परिषद घेऊन या प्रकरणाची सविस्तर माहिती दिली. या संदर्भात दापोडी पोलीस ठाण्यात लेखी तक्रार देण्यात आली असूनही अद्याप अपेक्षित कारवाई झालेली नसल्याचा आरोप त्यांनी केला.

धुमाळ यांनी दिलेल्या माहितीनुसार, वडील दिलीप मोतीलाल चोरडिया, त्यांचे पुत्र कुणाल दिलीप चोरडिया आणि मध्यस्थ प्रफुल्ल इनामदार यांच्यासोबत कौटुंबिक मिळकतीच्या विकासासंदर्भात चर्चा करण्यात आली होती. त्यानंतर २२ डिसेंबर २००६ रोजी कुलमुखत्यारपत्र दस्त क्रमांक १०३९७/२००६ आणि विकसन करारनामा दस्त क्रमांक १०३९६/२००६ अन्वये हवेली क्रमांक १७ येथील दुय्यम निबंधक कार्यालयात संबंधित व्यवहाराची नोंद करण्यात आल्याचे धुमाळ यांनी सांगितले.

या करारानुसार, मिळकतीच्या विकासाच्या बदल्यात व्यावसायिक बांधकामाच्या तळमजल्यावर एक दुकान तसेच ६५० चौरस फुटांचा सुपर बिल्ट-अप फ्लॅट चार वर्षांच्या कालावधीत देण्याचे मान्य करण्यात आले होते, असा दावा धुमाळ यांनी केला. या आश्वासनावर विश्वास ठेवून कुटुंबाने संबंधित मिळकत विकासासाठी देण्यास संमती दिल्याचेही त्यांनी नमूद केले.

मात्र, व्यवहाराला जवळपास २० वर्षे उलटूनही प्रत्यक्ष विकासकाम सुरू झाले नसून, करारानुसार देण्यात आलेल्या आश्वासनांची पूर्तता करण्यात आलेली नाही, असा आरोप धुमाळ यांनी केला. यासंदर्भात संबंधितांकडे वारंवार पाठपुरावा करूनही केवळ आश्वासने देण्यात आली, असेही त्यांनी सांगितले.

अखेर करारानुसार मोबदला देण्यात यावा किंवा मिळकत परत करण्यात यावी, अशी मागणी केल्यानंतर कुणाल चोरडिया आणि प्रफुल्ल इनामदार यांनी धमकावण्यास सुरुवात केल्याचा आरोप धुमाळ यांनी केला. आपल्याला खोट्या गुन्ह्यात अडकविण्याची तसेच गंभीर परिणाम भोगावे लागतील, अशा स्वरूपाच्या धमक्या देण्यात आल्याचा दावा त्यांनी पत्रकार परिषदेत केला.

धुमाळ यांच्या म्हणण्यानुसार, संबंधित भेटीदरम्यान कुणाल चोरडिया यांनी शिवीगाळ करून शर्टाची कॉलर पकडली आणि आपल्याला तसेच कुटुंबीयांना गंभीर इजा पोहोचविण्याची धमकी दिली. या कथित प्रकाराबाबत दापोडी पोलीस ठाण्यात लेखी तक्रार देण्यात आली असून, तक्रारीसोबत व्यवहाराशी संबंधित कागदपत्रे, तक्रारींच्या प्रती आणि अन्य आवश्यक माहिती पोलिसांकडे सादर करण्यात आली आहे.

“सामान्य नागरिकाला न्याय मिळविण्यासाठी वारंवार पोलीस ठाण्याचे उंबरठे झिजवावे लागत असतील, तर ही अत्यंत गंभीर बाब आहे. प्रशासनाने या प्रकरणाची निष्पक्ष चौकशी करून दोषींविरोधात तातडीने गुन्हा दाखल करावा,” अशी मागणी धुमाळ यांनी केली.

“माझी कोणाशीही वैयक्तिक वैरभावना नाही. मात्र, माझ्या कुटुंबाची फसवणूक झाली असून मला आणि माझ्या कुटुंबाला न्याय मिळावा, एवढीच आमची अपेक्षा आहे,” असेही धुमाळ यांनी स्पष्ट केले.

या प्रकरणात न्याय मिळाला नाही, तर वरिष्ठ पोलीस अधिकारी, जिल्हाधिकारी आणि राज्य शासनाकडे दाद मागण्यात येईल. तसेच लोकशाही मार्गाने आंदोलन करण्यात येईल, असा इशाराही त्यांनी दिला.

दरम्यान, या प्रकरणातील आरोपांबाबत कुणाल चोरडिया किंवा संबंधित पक्षाची प्रतिक्रिया उपलब्ध झालेली नाही. त्यांची प्रतिक्रिया मिळाल्यानंतर ती बातमीत समाविष्ट करण्यात येईल. प्रकरणातील आरोपांची चौकशी आणि पुढील कायदेशीर कारवाई संबंधित यंत्रणांकडून होणे अपेक्षित आहे.

संपर्क:

विनोद धुमाळ – ९१३०० ६४९४९

पीसी सिटी प्रो – ८२०८४३२०४१