अंधेरी पोलिसांची मोठी कारवाई; ड्रेनेज लाईनमध्ये सापडलेल्या महिलेच्या खूनप्रकरणी २४ तासांत दोन आरोपी अटकेत

मुंबई, ब्यूरो अनिल सावरे

दि. २७ एप्रिल २०२६ :

अंधेरी पोलीस ठाण्याच्या पथकाने ड्रेनेज लाईनमध्ये कुजलेल्या अवस्थेत सापडलेल्या अनोळखी महिलेच्या मृतदेहाची अवघ्या २४ तासांत ओळख पटवत खूनप्रकरण उघडकीस आणले असून या प्रकरणी दोन आरोपींना अटक करण्यात आली आहे.

ड्रेनेज साफसफाईदरम्यान मृतदेह आढळला

दि. २४ एप्रिल रोजी दुपारी साडेतीन वाजण्याच्या सुमारास बृहन्मुंबई महानगरपालिकेचे कर्मचारी ड्रेनेज साफसफाई करत असताना ओमनगर, मरोळ पाईपलाईन, अंधेरी पूर्व येथील बंद मॅनहोल उघडण्यात आले. त्यावेळी सुमारे पाच ते सहा फूट खोल ड्रेनेज लाईनमध्ये कुजलेल्या अवस्थेत एका महिलेचा मृतदेह आढळून आला.

घटनेची माहिती मिळताच अंधेरी पोलीस घटनास्थळी दाखल झाले व अपमृत्यूची नोंद करण्यात आली.

नऊ पथकांची तपास मोहीम

मृत महिलेची ओळख पटवण्यासाठी वरिष्ठांच्या सूचनेनुसार एकूण नऊ पोलीस पथके तयार करण्यात आली. हरवलेल्या व्यक्तींची नोंद, दागिने आणि इतर पुरावे तपासल्यानंतर मृत महिलेची ओळख ब्लान्स जेम्स सिक्वेरा (वय ८०) अशी पटली.

या महिलेबाबत १० जानेवारी २०२६ रोजी सहार पोलीस ठाण्यात हरवल्याची तक्रार दाखल असल्याचे तपासात समोर आले.

भावासोबत वादाची माहिती

तपासादरम्यान मृत महिलेचे तिचा भाऊ जोसेफ थॉमस कोयलो आणि त्याची पत्नी मारिया जोसेफ कोयलो यांच्यासोबत वारंवार भांडण होत असल्याचे समोर आले. तसेच महिलेच्या बेपत्ता होण्याच्या आदल्या दिवशी जोरदार वाद झाल्याची माहिती पोलिसांना मिळाली.

भावानेच केला खून

यानंतर पोलिसांनी जोसेफ कोयलो, त्याची पत्नी मारिया आणि मुलगा यांना चौकशीसाठी ताब्यात घेतले. चौकशीत जोसेफ कोयलो याने १० जानेवारीच्या मध्यरात्री बहिणीचा खून करून मृतदेह मॅनहोल उघडून ड्रेनेज लाईनमध्ये टाकल्याची कबुली दिली.

यानंतर आरोपींनी सहार पोलीस ठाण्यात महिला हरवल्याची खोटी तक्रार दिल्याचेही निष्पन्न झाले.

दोन आरोपी अटकेत

या प्रकरणी अंधेरी पोलीस ठाण्यात संबंधित कलमान्वये गुन्हा दाखल करण्यात आला असून खालील आरोपींना अटक करण्यात आली आहे:

जोसेफ थॉमस कोयलो (वय ६५)

मारिया जोसेफ कोयलो (वय ६३)

दोघेही अंधेरी पूर्व, मरोळ पाईपलाईन परिसरातील रहिवासी आहेत.

पोलिसांचे कौतुक

तीन महिन्यांपासून हरवलेल्या महिलेच्या खूनप्रकरणाचा उलगडा करून अत्यंत कुजलेल्या अवस्थेतील मृतदेहाची ओळख पटवणे ही अंधेरी पोलिसांची उल्लेखनीय कामगिरी मानली जात आहे.

ही कारवाई वरिष्ठ अधिकाऱ्यांच्या मार्गदर्शनाखाली अंधेरी पोलीस ठाण्याच्या अधिकारी व कर्मचाऱ्यांनी पार पाडली.