कोल्हापूरवासीयांना आणखी चार प्रगत वैद्यकीय सुविधा लवकरच; हसन मुश्रीफ

प्रतिनिधी: उमेश जाधव 

कोल्हापूर, दि. २१ (जिमाका) : कोल्हापूरच्या छत्रपती प्रमिलाराजे सर्वोपचार रुग्णालयात (सीपीआर) रुग्णांना लवकरच आयव्हीएफ, बोन मॅरो ट्रान्सप्लांट, कॅथ लॅब आणि ट्रामा आयसीयू या चार महत्त्वाच्या प्रगत वैद्यकीय सुविधा उपलब्ध करून देण्यात येणार आहेत. या सुविधा अत्यंत माफक दरात उपलब्ध करून देण्याचा शासनाचा प्रयत्न असून, कोल्हापूरसह परिसरातील रुग्णांना त्याचा मोठा फायदा होणार असल्याचे वैद्यकीय शिक्षण मंत्री हसन मुश्रीफ यांनी सांगितले.

राजर्षी छत्रपती शाहू महाराज वैद्यकीय नगरीतील राजर्षी छत्रपती शाहू महाराज शासकीय वैद्यकीय महाविद्यालय व रुग्णालयाच्या सभागृहात आयोजित आढावा बैठकीत मंत्री मुश्रीफ यांनी शेंडा पार्क येथे सुरू असलेल्या विविध विकासकामे आणि प्रकल्पांच्या प्रगतीचा सविस्तर आढावा घेतला. यावेळी त्यांनी सीपीआरच्या नूतनीकरणासह वैद्यकीय शिक्षण व आरोग्य सुविधांच्या विस्ताराबाबत संबंधित अधिकाऱ्यांना महत्त्वपूर्ण सूचना दिल्या.

सीपीआरच्या नूतनीकरणाला सर्वोच्च प्राधान्य

मंत्री हसन मुश्रीफ म्हणाले की, वैद्यकीय शिक्षण मंत्री म्हणून सीपीआर रुग्णालयाच्या नूतनीकरणाला सर्वोच्च प्राधान्य देण्यात आले. सार्वजनिक बांधकाम विभागाने अत्यंत कमी कालावधीत आणि दर्जेदार पद्धतीने सीपीआरचे नूतनीकरण पूर्ण केले आहे. या कामाचे मुख्यमंत्री महोदयांनीही कौतुक केले असल्याचे त्यांनी सांगितले.

सीपीआरमध्ये रुग्णांना अधिक चांगल्या आणि आधुनिक उपचार सुविधा मिळाव्यात, यासाठी पुढील टप्प्यात आणखी प्रगत वैद्यकीय सेवा सुरू करण्यात येणार आहेत. आयव्हीएफ, बोन मॅरो ट्रान्सप्लांट, कॅथ लॅब आणि ट्रामा आयसीयू या चार सुविधांमुळे गंभीर आणि गुंतागुंतीच्या आजारांसाठी रुग्णांना इतर मोठ्या शहरांकडे जाण्याची गरज मोठ्या प्रमाणात कमी होण्याची अपेक्षा आहे.

शेंडा पार्कमधील प्रकल्पांचे ३१ मार्च २०२७ पर्यंत लोकार्पण

शेंडा पार्क येथे सध्या सुरू असलेल्या काही इमारतींचे काम ३१ मार्च २०२७ अखेर पूर्ण करून त्यांचे लोकार्पण करण्याचे नियोजन असल्याचे मंत्री मुश्रीफ यांनी सांगितले. या लोकार्पणासाठी देशाचे पंतप्रधान यांना निमंत्रित करण्याचा विचार सुरू असल्याचेही त्यांनी स्पष्ट केले.

शेंडा पार्क परिसरात शासनाने सर्किट बेंचसाठी दिलेल्या जमिनीच्या लगत शिल्लक असलेल्या सुमारे पाच हेक्टर जमिनीबाबत मुख्यमंत्री यांच्याकडे मागणी करण्यात येणार असल्याचे त्यांनी सांगितले.

सध्या सुरू असलेली सर्व बांधकामे संबंधित कंत्राटदारांनी विहित मुदतीत आणि दर्जेदार पद्धतीने पूर्ण करावीत, असे निर्देशही त्यांनी दिले.

होमिओपॅथी, आयुर्वेद, योग आणि निसर्गोपचार प्रकल्पांना गती

मौजे सांगाव येथील शासकीय होमिओपॅथी महाविद्यालय व रुग्णालय, पिंपळगाव खुर्द येथील शासकीय आयुर्वेदिक महाविद्यालय व रुग्णालय, उत्तूर येथील शासकीय योगा व निसर्गोपचार महाविद्यालय व रुग्णालय तसेच कागल येथील ग्रामीण आरोग्य पथक परिसरातील अत्यावश्यक सुविधा जलदगतीने उभारण्यात याव्यात, असे निर्देश मंत्री मुश्रीफ यांनी दिले.

ज्या ठिकाणी विविध प्रकल्प सुरू आहेत, तेथे पाणी, वीज, रस्ते आणि सांडपाणी प्रक्रिया प्रकल्प (एसटीपी) यांसारख्या मूलभूत सुविधांकडे विशेष लक्ष द्यावे. आवश्यक प्रस्ताव तातडीने सादर करावेत आणि उत्तूर येथील सुरू असलेल्या कामांना आणखी गती द्यावी, अशा सूचनाही त्यांनी संबंधित अधिकाऱ्यांना केल्या.

सीपीआरमध्ये सध्या अत्याधुनिक उपचार सुविधा

सीपीआर रुग्णालयात कोल्हापूरसह रत्नागिरी, सिंधुदुर्ग, गोवा सीमाभाग, सातारा आणि सांगली आदी जिल्ह्यांतून रुग्ण उपचारासाठी संदर्भित केले जातात. त्यामुळे रुग्णालयाच्या वैद्यकीय सुविधांचा विस्तार होणे महत्त्वाचे आहे.

राजर्षी छत्रपती शाहू महाराज शासकीय वैद्यकीय महाविद्यालय आणि छत्रपती प्रमिलाराजे सर्वोपचार रुग्णालयात अद्ययावत बोन मॅरो ट्रान्सप्लांट युनिट सुरू करण्यात आले आहे. तसेच वंध्यत्व निवारणासाठी अत्याधुनिक आयव्हीएफ उपचारप्रणाली उपलब्ध करण्यात आली आहे.

रुग्णालयात अत्याधुनिक एमआरआय आणि थ्री टेस्ला १२८ स्लाइस सीटी स्कॅन यांसारख्या सुविधा उपलब्ध आहेत. दररोज सुमारे १,५०० ते १,८०० रुग्ण बाह्यरुग्ण विभागात उपचारासाठी येत असल्याची माहिती देण्यात आली.

६६५ रुग्णखाटा आणि १६ ऑपरेशन थिएटर्स

सीपीआर रुग्णालयात सध्या एकूण ६६५ रुग्णखाटा मंजूर आहेत. रुग्णालयात एकूण १६ ऑपरेशन थिएटर्स असून मुख्य शस्त्रक्रियागृह, ट्रॉमा शस्त्रक्रियागृह आणि कान-नाक-घसा शस्त्रक्रियागृह मॉड्युलर स्वरूपाचे आहेत.

याशिवाय दोन मॉड्युलर नवजात बालक अतिदक्षता कक्ष, दोन एमआयसीयू, एसआयसीयू, आयआरसीयू, मॉड्युलर फिजिओथेरपी विभाग, अद्ययावत मॉड्युलर बर्न्स युनिट आणि सुसज्ज हृदयरोग विभाग कार्यरत आहेत.

वैद्यकीय शिक्षणालाही मोठी चालना

राजर्षी छत्रपती शाहू महाराज शासकीय वैद्यकीय महाविद्यालयात दरवर्षी १५० विद्यार्थ्यांना एमबीबीएस अभ्यासक्रमासाठी प्रवेश दिला जातो. विविध विषयांतील पदव्युत्तर अभ्यासक्रमांच्या ८३ जागा उपलब्ध असून आणखी ४० जागा प्रस्तावित आहेत.

बीपीएमटी अभ्यासक्रमात दरवर्षी ६८ विद्यार्थी शिक्षण घेत आहेत, तर बी.एस्सी. नर्सिंग अभ्यासक्रमासाठी दरवर्षी १०० विद्यार्थ्यांना प्रवेश दिला जातो.

वैद्यकीय शिक्षणाच्या क्षेत्रातही संस्थेने लक्षणीय प्रगती केली असून कोल्हापूर आणि परिसरातील विद्यार्थ्यांना पदव्युत्तर वैद्यकीय शिक्षणाच्या चांगल्या संधी उपलब्ध होत असल्याची माहिती महाविद्यालयाचे अधिष्ठाता डॉ. सदानंद भिसे यांनी दिली.

अधिकाऱ्यांची उपस्थिती

बैठकीस राजर्षी छत्रपती शाहू महाराज शासकीय वैद्यकीय महाविद्यालयाचे अधिष्ठाता डॉ. सदानंद भिसे, सार्वजनिक बांधकाम विभागाचे अधीक्षक अभियंता तुषार बुरुड, कार्यकारी अभियंता क्रांतीकुमार मिरजकर, डॉ. गिरीश कांबळे, शासकीय आयुर्वेदिक व होमिओपॅथी महाविद्यालयाचे अधिष्ठाता डॉ. अभिजीत अहिरे, उत्तूर येथील शासकीय योगा व निसर्गोपचार महाविद्यालय व रुग्णालयाच्या अधिष्ठाता डॉ. भाग्यश्री खोत, सार्वजनिक बांधकाम विभागाचे कार्यकारी अभियंता भाऊसाहेब हजारे यांच्यासह विविध विभागांचे अधिकारी, अभियंते आणि संबंधित कंत्राटदार उपस्थित होते.

सीपीआरमधील नूतनीकरण आणि शेंडा पार्कमधील विविध प्रकल्प पूर्ण झाल्यानंतर कोल्हापूर विभागातील आरोग्यसेवेला आणखी मोठी चालना मिळण्याची अपेक्षा आहे.