₹२५ लाखांच्या खंडणीसाठी बिल्डरला जीवे मारण्याची धमकी; मुंबई गुन्हे शाखेकडून कुख्यात गुंडांसह १२ जण अटकेत

मुंबई ब्यूरो अनिल सावरे:

मुंबई, दि. 28 : मुंबईतील एका बांधकाम व्यावसायिकाला शस्त्राचा धाक दाखवून जीवे मारण्याची धमकी देत ₹२५ लाखांची खंडणी मागणाऱ्या टोळीचा मुंबई गुन्हे शाखेने पर्दाफाश केला आहे. या कारवाईत कुख्यात गुंड झुल्फिकार बेहलीम, त्याचा भाऊ मोहसीन बेहलीम यांच्यासह एकूण १२ सराईत गुन्हेगारांना अटक करण्यात आली आहे.

पोलिसांनी दिलेल्या माहितीनुसार, गेल्या काही दिवसांपासून संबंधित बांधकाम व्यावसायिकाकडे गुन्हेगारी हस्तकांमार्फत ₹२५ लाखांची खंडणी मागण्यात येत होती. मागणी पूर्ण न केल्यास शस्त्राने जीवे ठार मारण्याची धमकी देखील देण्यात आली होती.

या प्रकरणाची माहिती मिळताच मुंबई गुन्हे शाखा, कक्ष-१ यांनी गोपनीय माहितीच्या आधारे सापळा रचला. २७ जुलै २०२६ रोजी बांद्रा परिसरात कारवाई करताना झुल्फिकार बेहलीम, मोहसीन बेहलीम आणि त्यांच्या टोळीतील इतर १० साथीदारांना खंडणीची रक्कम स्वीकारताना रंगेहात पकडण्यात आले.

या प्रकरणी बांद्रा पोलीस ठाण्यात गुन्हा दाखल करण्यात आला असून, गुन्ह्याचे गांभीर्य लक्षात घेऊन तपास मुंबई गुन्हे शाखा कक्ष-१ कडे वर्ग करण्यात आला आहे. अटक करण्यात आलेल्या सर्व आरोपींना न्यायालयात हजर करण्यात आले असून ३१ जुलै २०२६ पर्यंत पोलीस कोठडी सुनावण्यात आली आहे.

प्राथमिक तपासात अटक करण्यात आलेले सर्व आरोपी सराईत गुन्हेगार असल्याचे निष्पन्न झाले आहे. मुख्य आरोपी झुल्फिकार बेहलीम याच्यावर यापूर्वी मोक्का (MCOCA) अंतर्गत कारवाई झाली होती आणि तो सध्या जामिनावर बाहेर असल्याची माहिती पोलिसांनी दिली आहे.

तसेच, या टोळीने मुंबई आणि उपनगरातील अनेक बांधकाम व्यावसायिकांना धमकावून खंडणी उकळल्याचा संशय असून त्या अनुषंगानेही तपास सुरू आहे. या टोळीशी संबंधित आणखी काही गुन्ह्यांचा शोध घेतला जात आहे.

याप्रकरणी मुंबई पोलिसांनी नागरिकांना आवाहन केले आहे की, या टोळीने किंवा संबंधित व्यक्तींनी यापूर्वी कोणाकडून खंडणीची मागणी केली असेल किंवा खंडणी वसूल केली असेल, तर त्यांनी तातडीने मुंबई गुन्हे शाखा किंवा जवळच्या पोलीस ठाण्याशी संपर्क साधावा.

ही कारवाई मुंबई पोलीस आयुक्त देवेन भारती, पोलीस सहआयुक्त (गुन्हे) अनिल कुंभारे, अपर पोलीस आयुक्त कृष्णकांत उपाध्याय, पोलीस उपायुक्त नवनाथ ढवळे आणि सहायक पोलीस आयुक्त विनायक वटकेण यांच्या मार्गदर्शनाखाली गुन्हे शाखा कक्ष-१ च्या पथकाने यशस्वीरीत्या पार पाडली.