नाशिकच्या आदिवासी भागात पुन्हा भूकंपाचे सौम्य धक्के; पेठ, सुरगाणा आणि दिंडोरी तालुक्यांत हादरे

नाशिक ब्यूरो:

नाशिक : नाशिक जिल्ह्याच्या आदिवासी भागात आज पुन्हा एकदा भूकंपाचे सौम्य धक्के जाणवल्याने नागरिकांमध्ये काही काळ भीतीचे वातावरण निर्माण झाले. पेठ, सुरगाणा आणि दिंडोरी तालुक्यांतील विविध गावांमध्ये दुपारी साडेबारा वाजण्याच्या सुमारास भूकंपाचे सौम्य हादरे जाणवले. मात्र, या घटनेत अद्याप कोणतीही जीवित अथवा वित्तहानी झाल्याची माहिती समोर आलेली नाही.

पेठ तालुक्यातील गोंदे, भायगाव, जांभूळमाळ आणि हरणगाव या परिसरात आज दुपारी सुमारे 12.40 वाजता भूकंपाचे सौम्य धक्के जाणवले. अचानक जमीन हादरल्याचा अनुभव नागरिकांना आल्याने काही काळ घबराट निर्माण झाली. मात्र, धक्के सौम्य स्वरूपाचे असल्याने कोणतीही हानी झालेली नसल्याची प्राथमिक माहिती आहे.

दरम्यान, सुरगाणा तालुक्यातील बोरगाव परिसरातही दुपारी 12.40 वाजण्याच्या सुमारास भूकंपाचे सौम्य धक्के जाणवले. परिसरातील नागरिकांनी हादरे जाणवल्याचे सांगितले असून या घटनेत कोणतीही जीवित किंवा वित्तहानी झालेली नाही.

दिंडोरी तालुक्यातील ननाशी आणि बाडगीचापाडा परिसरातही दुपारी सुमारे 12.45 वाजता भूकंपाचे धक्के जाणवल्याची माहिती आहे. या भागातही नागरिकांना काही काळ हादरे जाणवले. मात्र, प्राथमिक माहितीनुसार कोणतीही जीवित किंवा मालमत्तेची हानी झालेली नाही.

नाशिक जिल्ह्याच्या आदिवासी पट्ट्यात यापूर्वीही भूकंपाचे सौम्य धक्के जाणवत असल्याने नागरिकांमध्ये या घटनेमुळे पुन्हा चिंतेचे वातावरण निर्माण झाले आहे. प्रशासनाकडून परिस्थितीवर लक्ष ठेवण्यात येत असून नागरिकांनी घाबरून न जाता अधिकृत यंत्रणांकडून मिळणाऱ्या माहितीकडे लक्ष द्यावे, असे आवाहन करण्यात येत आहे.

भूकंपाच्या धक्क्यांची तीव्रता, केंद्रबिंदू आणि अन्य तांत्रिक तपशील अधिकृत भूकंप निरीक्षण यंत्रणेकडून प्राप्त झाल्यानंतर या घटनेबाबत अधिक स्पष्ट माहिती उपलब्ध होणार आहे. सध्या पेठ, सुरगाणा आणि दिंडोरी तालुक्यांमध्ये परिस्थिती नियंत्रणात असून कोणतीही जीवित अथवा वित्तहानी झालेली नसल्याची प्राथमिक माहिती आहे.