नासिक वाचवा अभियानाचा रस्त्यांवरील खड्ड्यांविरोधात तीव्र एल्गार; प्रशासन, ठेकेदार आणि सत्ताधाऱ्यांविरोधात संताप

नाशिक ब्यूरो :

नाशिक : शहरातील रस्त्यांची झालेली दुरवस्था, ठिकठिकाणी पडलेले जीवघेणे खड्डे आणि त्यातून वारंवार घडणाऱ्या अपघातांविरोधात नासिक वाचवा अभियानातर्फे भद्रकाली चौकातील बादशाही गुजरात लॉजसमोर तीव्र आंदोलन करण्यात आले. सार्वजनिक हिताच्या दृष्टीने नाशिक महानगरपालिका प्रशासन आणि राज्य सरकारचे लक्ष वेधण्यासाठी हे आंदोलन करण्यात आले.

आंदोलनाच्या प्रारंभी शहरातील रस्त्यांवरील खड्ड्यांमुळे झालेल्या अपघातांत मृत्यूमुखी पडलेल्या निष्पाप नागरिकांना दोन मिनिटे मौन पाळून भावपूर्ण श्रद्धांजली अर्पण करण्यात आली. त्यानंतर

आंदोलनकर्त्यांनी विविध निषेधाचे फलक हातात घेऊन प्रशासन, संबंधित ठेकेदार आणि सत्ताधाऱ्यांविरोधात जोरदार घोषणाबाजी केली.

“सिंहस्थ कुंभमेळ्याच्या नावाखाली नाशिकची वाट लावून ठेकेदारांची घरे भरण्याचा घाट घालणाऱ्या प्रशासनाचा जाहीर निषेध,” अशा आशयाचे फलक यावेळी झळकावण्यात आले. शहरातील रस्त्यांच्या कामांवर मोठ्या प्रमाणात निधी खर्च होत असतानाही रस्त्यांची स्थिती अत्यंत खराब असल्याबद्दल आंदोलनकर्त्यांनी तीव्र संताप व्यक्त केला.

आंदोलनकर्त्यांनी आरोप केला की, कोट्यवधी रुपयांचा निधी मंजूर होऊनही निकृष्ट दर्जाची कामे करणाऱ्या ठेकेदारांवर कोणतीही प्रभावी कारवाई होत नाही. प्रशासनाच्या दुर्लक्षामुळे आणि सत्ताधाऱ्यांच्या कथित मूक समर्थनामुळे ठेकेदारांकडून मनमानी सुरू असून, त्याचा थेट फटका सर्वसामान्य नाशिककरांना बसत आहे.

रस्ते तयार झाल्यानंतर काही महिन्यांतच उखडत असताना संबंधित कामांच्या गुणवत्तेची तपासणी करणाऱ्या यंत्रणा नेमक्या कुठे आहेत, असा सवाल आंदोलनकर्त्यांनी उपस्थित केला. रस्त्यांच्या कामांची गुणवत्ता तपासण्याची जबाबदारी असलेल्या यंत्रणांनी वेळीच लक्ष दिले असते, तर नागरिकांना आज अशा गंभीर परिस्थितीला सामोरे जावे लागले नसते, असेही यावेळी नमूद करण्यात आले.

पावसाळा सुरू होण्यापूर्वी रस्त्यांची आवश्यक दुरुस्ती करणे ही प्रशासनाची जबाबदारी असताना, ही जबाबदारी पार पाडण्यात प्रशासन पूर्णतः अपयशी ठरल्याचा आरोप आंदोलनकर्त्यांनी केला. शहरातील अनेक प्रमुख आणि अंतर्गत रस्त्यांवर मोठ्या प्रमाणात खड्डे पडल्याने वाहनचालक, पादचारी, ज्येष्ठ नागरिक, महिला आणि विद्यार्थ्यांना जीव मुठीत धरून प्रवास करावा लागत आहे.

खड्ड्यांमुळे होणाऱ्या अपघातांत निष्पाप नागरिकांचे बळी जात असतानाही प्रशासन आणि लोकप्रतिनिधी केवळ आश्वासने देण्यात व्यस्त असल्याची टीकाही आंदोलनकर्त्यांनी केली. नागरिकांच्या जीविताशी संबंधित या गंभीर प्रश्नाकडे प्रशासनाने तातडीने लक्ष देऊन ठोस उपाययोजना कराव्यात, अशी मागणी करण्यात आली.

आंदोलनकर्त्यांनी नाशिक शहरातील सर्व रस्त्यांची तातडीने दुरुस्ती करून खड्डेमुक्त नाशिक निर्माण करावे, अशी प्रमुख मागणी केली. तसेच निकृष्ट दर्जाची कामे करणाऱ्या ठेकेदारांना काळ्या यादीत टाकावे, संबंधित अधिकारी आणि दोषी ठेकेदारांवर फौजदारी गुन्हे दाखल करावेत, तसेच रस्ते कामांसाठी जबाबदार असलेल्या अधिकारी आणि लोकप्रतिनिधींची जबाबदारी निश्चित करावी, अशी मागणीही यावेळी करण्यात आली.

या मागण्यांवर तातडीने कार्यवाही न झाल्यास यापुढे अधिक तीव्र आणि व्यापक लोकआंदोलन उभारण्यात येईल, असा इशाराही नासिक वाचवा अभियानाच्या पदाधिकाऱ्यांनी दिला.

या आंदोलनात नासिक वाचवा अभियानाचे राजेंद्र बागुल, गणेश बर्वे, वामन तामखाने, संजय जाधव, वसंतराव वझरे, भीमा बागुल, संजय परदेशी, आशिष बागुल, मनोज मंडाले, अंकुश राऊत, मुक्तेश्वर शेट्टीवार, शशांक हिरे, गणेश चौधरी, राजेंद्र कोथमिरे, विदेश लाड आणि जितेंद्र बागुल यांच्यासह अभियानाचे पदाधिकारी, कार्यकर्ते तसेच अनेक नागरिक मोठ्या संख्येने सहभागी झाले.

नाशिकमधील रस्त्यांच्या दुरवस्थेचा प्रश्न दिवसेंदिवस गंभीर होत असून, प्रशासनाने तातडीने प्रभावी उपाययोजना करून नागरिकांना सुरक्षित आणि खड्डेमुक्त रस्ते उपलब्ध करून द्यावेत, अशी मागणी आंदोलनाच्या माध्यमातून करण्यात आली.