साकीनाका पोलिसांची उल्लेखनीय कामगिरी; 15 वर्षांपासून फरार असलेल्या आरोपीस अटक

मुंबई ब्यूरो | अनिल सावरे 

मुंबई, दि. 30 : साकीनाका पोलीस ठाण्याच्या हद्दीतील 2010 सालच्या गंभीर गुन्ह्यातील तब्बल 15 वर्षांपासून फरार असलेल्या आरोपीला साकीनाका पोलिसांनी अटक केली आहे. आरोपीविरुद्ध अंधेरी येथील प्रथम वर्ग न्याय दंडाधिकारी न्यायालयाने स्टँडिंग अरेस्ट वॉरंट जारी केले होते.

साकीनाका पोलीस ठाण्यात 2010 साली भारतीय दंड संहितेच्या विविध कलमांन्वये गुन्हा दाखल करण्यात आला होता. या प्रकरणातील आरोपी अयुब मोहम्मद रफात चौधरी (वय 38) हा गेल्या अनेक वर्षांपासून फरार होता.

गुन्हा दाखल झाल्यानंतर आरोपी न्यायालयात हजर राहत नसल्याने अंधेरी येथील प्रथम वर्ग न्याय दंडाधिकारी न्यायालयाने त्याच्याविरुद्ध स्टँडिंग अरेस्ट वॉरंट जारी केले होते. मात्र, आरोपी दीर्घकाळ पोलिसांना चकवा देत होता.

दरम्यान, 29 जुलै 2026 रोजी साकीनाका पोलीस ठाण्याच्या तपास पथकाला गोपनीय बातमीदारामार्फत आरोपीबाबत महत्त्वाची माहिती मिळाली. आरोपी हा सफाळे नाका, विरार (पश्चिम) परिसरात वास्तव्यास असल्याची माहिती मिळाल्यानंतर पोलिसांनी तातडीने त्या ठिकाणी सापळा रचला.

पोलिसांनी केलेल्या खात्रीशीर माहितीनुसार आरोपीचा शोध घेऊन त्याला ताब्यात घेतले. त्यानंतर आरोपीविरुद्ध न्यायालयाने जारी केलेल्या स्टँडिंग अरेस्ट वॉरंटची पडताळणी करण्यात आली. पडताळणीनंतर आरोपीस अटक करून पुढील कायदेशीर कारवाईसाठी न्यायालयासमोर हजर करण्यात आले.

तब्बल 15 वर्षांपासून फरार असलेल्या आरोपीला अटक करून न्यायालयाने जारी केलेल्या स्टँडिंग अरेस्ट वॉरंटची बजावणी करण्यात साकीनाका पोलीस ठाण्याच्या तपास पथकाला यश आले आहे.

ही कारवाई मुंबई पोलीस आयुक्त देवेन भारती, पोलीस सह आयुक्त मनोजकुमार शर्मा, अपर पोलीस आयुक्त पश्चिम प्रादेशिक विभाग अमित देशमुख, पोलीस उपआयुक्त पश्चिम परिमंडळ-3 दत्ता नलावडे तसेच सहायक पोलीस आयुक्त साकीनाका विभाग यांच्या मार्गदर्शनाखाली करण्यात आली.

साकीनाका पोलीस ठाण्याचे वरिष्ठ पोलीस निरीक्षक अविनाश मांडले यांच्या प्रत्यक्ष देखरेखीखाली तपास पथकातील पोलीस अंमलदारांनी ही कारवाई यशस्वी केली. आरोपीचा दीर्घकाळ शोध घेऊन त्याला अटक करण्यात पोलिसांना यश आल्याने साकीनाका पोलिसांच्या कामगिरीचे कौतुक होत आहे.