विकासकामांचा बारावा वार्षिक अहवाल पंतप्रधान नरेंद्र मोदी यांना सादर; खासदार श्रीरंग बारणे यांना सोशल मीडियाच्या प्रभावी वापराचा सल्ला

पुणे प्रतिनिधी : रोहन सोनाळे 

पिंपरी : मावळ लोकसभा मतदारसंघाचे शिवसेना खासदार श्रीरंग बारणे यांनी मतदारसंघातील विकासकामांचा बारावा वार्षिक अहवाल पंतप्रधान नरेंद्र मोदी यांची सोमवारी भेट घेऊन त्यांना सादर केला. या भेटीदरम्यान मावळ लोकसभा मतदारसंघातील विविध प्रलंबित तसेच पूर्ण झालेल्या विकासकामांबाबत सविस्तर चर्चा करण्यात आली.

खासदार श्रीरंग बारणे हे दरवर्षी आपल्या मतदारसंघातील कामांचा अहवाल प्रसिद्ध करतात. त्यांच्या तिसऱ्या कार्यकाळातील हा दुसरा, तर आतापर्यंतचा बारावा वार्षिक अहवाल आहे. हा अहवाल पंतप्रधान नरेंद्र मोदी यांना सादर करण्यात आला.

अहवाल स्वीकारताना पंतप्रधान मोदी यांनी दरवर्षी विकासकामांचा अहवाल तयार करून तो जनतेसमोर मांडण्याच्या उपक्रमाचे कौतुक केले. तसेच खासदार बारणे यांना शुभेच्छा देत मतदारसंघातील विकासकामांची माहिती अधिकाधिक नागरिकांपर्यंत पोहोचविण्यासाठी डिजिटल माध्यमांचा आणि सोशल मीडियाचा प्रभावी वापर करण्याचा सल्ला दिला.

विकासकामांचा अहवाल ई-बुक स्वरूपात प्रसिद्ध करण्याचा सल्ला

मावळ लोकसभा मतदारसंघाची लोकसंख्या सुमारे २६ लाख असल्याने प्रत्येक नागरिकाशी थेट संपर्क ठेवणे आव्हानात्मक आहे. त्यामुळे विकासकामे आणि केंद्र व राज्य सरकारच्या विविध कल्याणकारी योजनांची माहिती नागरिकांपर्यंत पोहोचविण्यासाठी सोशल मीडिया आणि आधुनिक डिजिटल माध्यमांचा प्रभावी वापर करणे आवश्यक असल्याचे पंतप्रधानांनी सांगितले.

विकासकामांचा वार्षिक अहवाल ‘ई-बुक’ स्वरूपात तयार करून सोशल मीडियावर प्रसिद्ध करावा, जेणेकरून मतदारसंघातील जास्तीत जास्त नागरिकांना विकासकामांची माहिती सहज उपलब्ध होईल, असा महत्त्वपूर्ण सल्ला पंतप्रधान नरेंद्र मोदी यांनी खासदार श्रीरंग बारणे यांना दिला.

कार्यकर्ते आणि सोशल मीडिया यांच्या माध्यमातून केंद्र व राज्य सरकारच्या योजना, विविध विकासकामे तसेच त्यातून नागरिकांना मिळणारे लाभ यांची माहिती मोठ्या प्रमाणावर जनतेपर्यंत पोहोचविता येते. त्यामुळे आधुनिक संपर्क माध्यमांचा योग्य वापर केल्यास जनतेशी संवाद अधिक प्रभावी होऊ शकतो, असेही पंतप्रधानांनी यावेळी सूचित केले.

विकासकामे जनतेपर्यंत पोहोचविण्याचा संकल्प

पंतप्रधान नरेंद्र मोदी यांच्या या मार्गदर्शनानंतर मावळ लोकसभा मतदारसंघात केंद्र आणि राज्य सरकारच्या माध्यमातून झालेली विकासकामे अधिक प्रभावीपणे नागरिकांपर्यंत पोहोचविण्याचा संकल्प खासदार श्रीरंग बारणे यांनी व्यक्त केला.

वार्षिक अहवालाच्या माध्यमातून वर्षभरातील कामांचा लेखाजोखा नागरिकांसमोर ठेवण्याची परंपरा पुढेही कायम ठेवण्यात येणार असून, आगामी काळात डिजिटल माध्यमांचा अधिक प्रभावी वापर करण्यावर भर दिला जाणार आहे.

अहवालात विकासकामांसह खासदारकीच्या कामाचा लेखाजोखा

या वार्षिक अहवालामध्ये मावळ लोकसभा मतदारसंघात करण्यात आलेल्या विविध विकासकामांची माहिती, मतदारसंघातील प्रलंबित प्रश्न आणि त्यासाठी करण्यात आलेल्या पाठपुराव्याचा समावेश आहे.

तसेच खासदार श्रीरंग बारणे यांनी लोकसभेत सादर केलेली खासगी विधेयके, लोकसभेतील उपस्थिती, वर्षभरात घेतलेल्या विविध बैठका आणि मतदारसंघाच्या विकासासाठी केलेल्या प्रयत्नांचा सविस्तर लेखाजोखा या अहवालात देण्यात आला आहे.

या अहवालामुळे मतदारसंघातील नागरिकांना खासदारांनी वर्षभरात केलेल्या कामांची तसेच लोकसभेतील सहभागाची माहिती एकाच ठिकाणी उपलब्ध होणार आहे.