वाल्मिकनगर राम मंदिराच्या जलालपूर शिवारातील जागेवर डल्ला; गैरव्यवहार प्रकरणी धर्मदाय विभागाच्या नोटिसा

नाशिक | प्रतिनिधी : पंचवटीतील वाल्मिकनगर येथील श्रीराम मंदिराच्या नावावरील जलालपूर शिवारातील जागेच्या कथित गैरव्यवहार प्रकरणी धर्मदाय सहआयुक्त, नाशिक कार्यालयाने संबंधित व्यक्तींना कारणे दाखवा नोटिसा बजावल्या आहेत. या कारवाईमुळे परिसरात मोठी खळबळ उडाली आहे.

मंदिराच्या नावावर असलेल्या जागेचे कागदोपत्री फेरफार करून परस्पर विक्री केल्याचा आरोप समोर आल्यानंतर प्रशासनाने या प्रकरणाची गंभीर दखल घेतली. प्राथमिक चौकशीत अनेक संशयास्पद व्यवहार समोर आल्याची माहिती सूत्रांकडून मिळत आहे.

संबंधितांना स्पष्टीकरण मागवले

धर्मदाय विभागाने नोटिसांमध्ये स्पष्ट विचारणा केली आहे की, कोणत्या अधिकारावर आणि कोणत्या कायदेशीर प्रक्रियेनुसार मंदिराची जागा विकण्यात आली? संबंधितांना ठराविक मुदतीत उत्तर देण्याचे आदेश देण्यात आले असून समाधानकारक स्पष्टीकरण न दिल्यास पुढील कठोर कारवाईचा इशारा देण्यात आला आहे.

स्वतंत्र चौकशी सुरू

या प्रकरणात निरीक्षक स्तरावर स्वतंत्र चौकशी सुरू असून संशयितांची यादी तयार करण्यात आल्याचे सांगितले जात आहे. प्रत्येक व्यवहाराची तपासणी केली जात असून संबंधितांवर प्रशासनाची बारकाईने नजर असल्याचे समजते.

गिरीश महाजन यांची कठोर भूमिका

दरम्यान, राज्याचे मंत्री गिरीश महाजन यांनीही या प्रकरणावर कठोर भूमिका घेत, “राम मंदिराच्या जागेवर डल्ला मारणाऱ्यांना सोडले जाणार नाही,” असा इशारा दिला होता. त्यानंतर प्रशासनाने हालचाली वेगाने करत नोटिसा बजावण्यास सुरुवात केली.

पुढील टप्प्यात कठोर कारवाईची शक्यता

धर्मदाय विभागाच्या सूत्रांनुसार, पुढील टप्प्यात खालील कारवाया होण्याची शक्यता आहे :

बेकायदेशीर व्यवहार रद्द करणे

फेरफार केलेल्या नोंदी रद्द करणे

संबंधितांविरुद्ध फौजदारी गुन्हे दाखल करणे

परिसरात संतापाची लाट

या संपूर्ण प्रकरणामुळे पंचवटी परिसरात संतापाचे वातावरण असून धार्मिक स्थळांच्या मालमत्तेवर डोळा ठेवणाऱ्यांविरोधात कठोर भूमिका घेण्याची मागणी वाल्मिकनगर येथील कुष्ठपीडित बांधवांकडून करण्यात येत आहे.