मुख्यमंत्री देवेंद्र फडणवीस यांच्या उपस्थितीत एअर इंडिया इमारत हस्तांतरण करार पूर्ण

मुंबई, प्रतिनिधी : दि. 2 : मंत्रालयाजवळील महत्त्वाची एअर इंडिया इमारत महाराष्ट्र शासनाने खरेदी केली असून, एअर इंडिया ॲसेट होल्डिंग कंपनी आणि राज्य शासनाच्या सार्वजनिक बांधकाम विभाग यांच्यातील करारनाम्यांचे अधिकृत हस्तांतरण मुख्यमंत्री देवेंद्र फडणवीस यांच्या प्रमुख उपस्थितीत पार पडले.

मंत्रिमंडळ बैठकीनंतर मंत्रिमंडळ सभागृहात आयोजित करण्यात आलेल्या विशेष कार्यक्रमात करारनाम्यांच्या हस्तांतरणाची प्रक्रिया पूर्ण करण्यात आली.

यावेळी उपमुख्यमंत्री सुनेत्रा अजित पवार, पर्यटन मंत्री शंभूराज देसाई, सार्वजनिक बांधकाम मंत्री शिवेंद्रसिंह राजे भोसले, मुख्य सचिव राजेश अग्रवाल, सार्वजनिक बांधकाम विभागाचे अप्पर मुख्य सचिव मिलिंद म्हैसकर, मुंबई शहर जिल्हाधिकारी आंचल गोयल तसेच एअर इंडिया कंपनीचे वाणिज्य अधिकारी उपस्थित होते.

मंत्रालय परिसरातील धोरणात्मकदृष्ट्या महत्त्वाची मानली जाणारी एअर इंडिया इमारत राज्य शासनाच्या मालकीत आल्यानंतर प्रशासकीय कामकाजासाठी तसेच भविष्यातील विविध शासकीय गरजांसाठी तिचा उपयोग होणार असल्याची अपेक्षा व्यक्त केली जात आहे.

या हस्तांतरणामुळे राज्य शासनाच्या पायाभूत सुविधा बळकटीकरणाच्या प्रयत्नांना चालना मिळणार असून मंत्रालय परिसरातील प्रशासकीय सुविधा विस्तारासाठीही मदत होणार आहे.