पिंपरी-चिंचवडमध्ये ‘हरित पिंपरी-चिंचवड अभियान’; वाढत्या प्रदूषणावर मात करण्यासाठी महापौर रवि लांडगे यांचा मोठा निर्णय

पुणे प्रतिनिधी रोहन सोनाळे 

पिंपरी-चिंचवड : शहरात वाढते नागरीकरण, वायू प्रदूषण, वाढती उष्णता, घटती हरितक्षेत्रे आणि बदलते हवामान यामुळे नागरिकांच्या आरोग्यावर गंभीर परिणाम होत आहेत. उष्णतेच्या लाटा, खालावलेली हवा गुणवत्ता आणि अनियमित पावसाच्या पार्श्वभूमीवर पर्यावरणीय संतुलन पुन्हा प्रस्थापित करण्यासाठी ‘हरित पिंपरी-चिंचवड अभियान’ राबविण्याचा महत्त्वपूर्ण निर्णय महापौर रवि लांडगे यांनी घेतला आहे.

पर्यावरण संवर्धनासाठी मोठे पाऊल

राज्याचे मुख्यमंत्री देवेंद्र फडणवीस यांनी राज्यभर वृक्ष लागवडीचा संकल्प जाहीर केल्यानंतर त्याच प्रेरणेने तसेच नागरिकांकडून मिळालेल्या सकारात्मक सूचनांचा विचार करून हे अभियान हाती घेण्यात येत आहे.

महापौरांनी स्पष्ट केले की, स्वच्छ, निरोगी आणि शाश्वत पर्यावरण मिळणे ही फक्त प्रशासनाची जबाबदारी नसून प्रत्येक नागरिकाची सामूहिक जबाबदारी आहे.

“एक झाड लावा, प्रदूषण दूर पळवा!”

या अभियानांतर्गत प्रत्येक नागरिकाने किमान एक झाड लावून त्याच्या संगोपनाची जबाबदारी स्वीकारावी, असे आवाहन करण्यात आले आहे.

शहरात कुठे होणार वृक्षारोपण?

महापालिकेच्या सर्व क्षेत्रीय कार्यालयांमार्फत पुढील ठिकाणांचे सर्वेक्षण करून वृक्षारोपण केले जाणार आहे:

मोकळ्या जागा

उद्याने

रस्त्यांवरील डिव्हायडर

नव्याने विकसित होणारे रस्ते

शासकीय व महापालिका इमारती परिसर

नद्या व नाले परिसर

देशी वृक्षप्रजातींना प्राधान्य

पर्यावरणाशी सुसंगत, कमी पाणी लागणाऱ्या आणि अधिक टिकाऊ देशी वृक्षप्रजातींची निवड करण्यात येणार आहे. पावसाळ्यापूर्वी सर्व तयारी पूर्ण करून पावसाळ्यात मोठ्या प्रमाणावर वृक्ष लागवड केली जाणार आहे.

तीन वर्षे संगोपनाची जबाबदारी

लावण्यात येणाऱ्या प्रत्येक रोपाचे किमान तीन वर्षे संगोपन, पाणीपुरवठा आणि संरक्षण सुनिश्चित करण्यात येणार आहे. आधुनिक तंत्रज्ञानाच्या मदतीने प्रत्येक झाडाची नोंदणी, निरीक्षण आणि प्रगतीचा आढावा घेतला जाईल.

नागरिकांच्या सहभागावर भर

या अभियानात नागरिक, स्वयंसेवी संस्था, पर्यावरणप्रेमी, गृहनिर्माण संस्था, शैक्षणिक संस्था, सामाजिक संघटना, लोकप्रतिनिधी आणि पदाधिकारी यांचा व्यापक सहभाग निश्चित केला जाणार आहे.

“एक नागरिक – एक झाड” हा संकल्प शहरभर रुजवून हे अभियान लोकचळवळ बनवण्याचा प्रयत्न असेल.

महापौरांचा संदेश

“निसर्ग वाचविणे म्हणजे आपल्या पुढील पिढ्यांचे भविष्य सुरक्षित करणे. चला, आपण सर्व मिळून हरित पिंपरी-चिंचवड घडवूया,” असे आवाहन महापौर रवि लांडगे यांनी केले आहे.