कसबा बावडा सांडपाणी प्रकल्पाची मंत्री पंकजा मुंडे यांनी केली पाहणी

प्रतिनिधी: उमेश जाधव 

७६ एमएलडी सांडपाण्यावर SBR तंत्रज्ञानाद्वारे प्रक्रिया; प्रक्रिया केलेले पाणी पुनर्वापरासाठी योग्य बनविण्याच्या कामाची घेतली माहिती

कोल्हापूर, दि. ३ (जिमाका) : पर्यावरण व वातावरणीय बदल, पशुसंवर्धन मंत्री पंकजा मुंडे यांनी आज कसबा बावडा येथील सांडपाणी प्रक्रिया प्रकल्पाला भेट देऊन प्रकल्पाची पाहणी केली. यावेळी त्यांनी सांडपाण्यावर करण्यात येणाऱ्या प्रक्रियेची माहिती घेतली तसेच प्रक्रिया करून तयार करण्यात आलेल्या पाण्याची पाहणी केली.

कसबा बावडा येथे कोल्हापूर महानगरपालिकेच्या वतीने सुमारे ७६ एमएलडी सांडपाण्यावर SBR (Sequencing Batch Reactor) तंत्रज्ञानाद्वारे प्रक्रिया करण्यात येते. प्रक्रिया केलेले पाणी पुनर्वापरासाठी योग्य बनविण्याचे काम या प्रकल्पात केले जाते.

प्रक्रिया केलेल्या पाण्याबद्दल समाधान

प्रकल्पाच्या पाहणीदरम्यान मंत्री पंकजा मुंडे यांनी येथे ट्रीटमेंट करून तयार करण्यात आलेल्या पाण्याबद्दल समाधान व्यक्त केले. प्रकल्पातील कामकाजाबद्दल त्यांनी जल अभियंता हर्षदीप घाडगे यांचे कौतुक केले.

सांडपाणी प्रक्रिया प्रकल्पाच्या माध्यमातून उपलब्ध होणाऱ्या प्रक्रिया केलेल्या पाण्याचा योग्य पुनर्वापर करता येणे हे जलसंधारण आणि पर्यावरणाच्या दृष्टीने महत्त्वाचे असल्याचे यावेळी अधोरेखित झाले.

तीन नाल्यांमधून सांडपाण्याची आवक

कसबा बावडा येथील या प्रकल्पामध्ये विविध नाल्यांमधून सांडपाण्याची आवक होते. त्यामध्ये जयंती नाल्यातून सुमारे ५९ एमएलडी, बापट कॅम्प नाल्यातून ११.५ एमएलडी, तर लाईन बाजार नाल्यातून ५.५ एमएलडी सांडपाणी येते.

या सांडपाण्यावर SBR तंत्रज्ञानाच्या माध्यमातून प्रक्रिया करून ते पुनर्वापरासाठी योग्य बनविण्यात येते.

अधिकाऱ्यांकडून प्रकल्पाची माहिती

पाहणीदरम्यान संबंधित अधिकाऱ्यांनी मंत्री पंकजा मुंडे यांना प्रकल्पाच्या कार्यपद्धतीची तसेच सांडपाण्याच्या आवकेची आणि प्रक्रियेची माहिती दिली.

यावेळी आमदार अमल महाडिक, महापौर रूपाराणी निकम, जिल्हाधिकारी डॉ. विजय राठोड, महानगरपालिका आयुक्त डॉ. राजेंद्र भारूड, जल अभियंता हर्षदीप घाडगे, जनसंपर्क अधिकारी मोहन सूर्यवंशी यांच्यासह इतर अधिकारी उपस्थित होते.

सांडपाणी व्यवस्थापनाला महत्त्व

कसबा बावडा येथील सांडपाणी प्रक्रिया प्रकल्पातून मोठ्या प्रमाणातील सांडपाण्यावर प्रक्रिया केली जात असल्याने पंचगंगा नदी प्रदूषण नियंत्रणाच्या दृष्टीने या प्रकल्पाचे महत्त्व आहे. प्रक्रिया केलेल्या पाण्याचा पुनर्वापर वाढविण्याच्या दृष्टीनेही अशा प्रकल्पांची कार्यक्षमता आणि योग्य देखभाल महत्त्वाची ठरणार आहे.